Нун огълу Ехошуа 20 - Мукъаддес Китап

Сакъланмакъ ичюн шеэрлер

¹ РАББИ Ехошуагъа бойле деди:

² – Исраиль огъулларына айт, олар озьлерине сакъланмакъ ичюн шеэрлерни къурсунлар. Мен буны сизге Мусанен айттыргъан эдим.

³ Анда къара фикири олмайып, башкъасыны янъылып ольдюрген адамнынъ къачып кетмеге чареси олсун. Олар тёкюльген къан ичюн акъкъыны аладжакъ адамдан сакъланмакъ ичюн ер олсунлар.

⁴ О шеэрлернинъ бирине къачып кеткен адам шеэр къапулары янына турып, озь иши акъкъында бу шеэр акъсакъалларына айтып берсин. Олар оны озь шеэрине кирсетип, оларда яшамакъ ичюн онъа ер берсинлер.

⁵ Тёкюльген къан ичюн акъкъыны аладжакъ адам оны къувалап кельгенинде, акъсакъаллар къатильни онынъ къолуна бермесинлер, чюнки о, къара фикири олмайып, оны аселет ольдюрмеди ве не тюневин, не де обирскунь о адамдан нефретленди.

⁶ О адам джемаатнынъ огюнде суд этильмек ичюн турмагъандже ве о заман олгъан баш руханий ольмегендже, шеэрде яшасын. Сонъ ольдюрген адам озь эвине, къачып кеткен шеэрине къайтсын.

⁷ Исраиллилер Галилеяда, Нафталий дагъларында Кедеш шеэрни, Эфраим дагъларында Шекем шеэрни ве Ехуданынъ дагъларында Кирьят-Арба, яни Хеврон шеэрини айырдылар.

⁸ Ерихоннынъ къаршысында олгъан Иорданнынъ шаркъий тарафында: Рубеннинъ къабилесинде, тегизликте, сахрада Бецер шеэрини сайладылар, Гъаднынъ къабилесинде Гилад еринде олгъан Рамот шеэрини ве Менашшенинъ къабилесинде Башан еринде олгъан Голан шеэрини сайладылар.

⁹ Башкъа адамны аселет ольдюрмеген эр бир исраилли я да араларында яшагъан эр бир кельмешек бу айырылгъан шеэрлерде, тёкюльген къан ичюн акъкъыны аладжакъ адамнынъ къолундан, джемаат огюнде турмагъандже, къачып кетмеге чареси олсун.