Нун огълу Ехошуа 19 - Мукъаддес Китап

Шимеон къабилесининъ пайы

¹ Экинджи джереп Шимеонгъа, сойларына коре Шимеон огъулларынынъ къабилесине тюшти. Оларнынъ топракъ пайы Ехуда огъулларынынъ топрагъында эди.

² Оларнынъ топракъ пайында бойле шеэрлер бар эди: Беэр-Шева, Шева, Молада,

³ Хацар-Шуал, Бала, Эцем,

⁴ Элтолад, Бетул, Хорма,

⁵ Цикълагъ, Бет-Маркъавот, Хацар-Суса,

⁶ Бет-Леваот ве Шарухен – койлеринен берабер 13 шеэр;

⁷ Айин, Риммон, Этер ве Ашан – койлеринен берабер дёрт шеэр.

⁸ Ондан гъайры, Баалат-Беэрге, яни Негевде ерлешкен Рамагъа баргъандже, бу шеэрлернинъ чевре-четинде олгъан эписи койлер оларнынъки эдилер. Шимеон огъулларынынъ къабилесининъ, сойларына коре олгъан топракъ пайлары будыр.

⁹ Шимеон огъулларынынъ пайы Ехуда огъулларынынъ топракъ пайындан алынгъан эди, чюнки Ехуда огъулларынынъ пайы пек чокъ эди. Шунынъ ичюн Шимеон огъуллары озь пайыны оларнынъ топракълары арасындан алдылар.

Зевулун къабилесининъ пайы

¹⁰ Учюнджи джереп Зевулун къабилесине, сойларына коре тюшти. Оларнынъ пай сынъыры Саридгедже бара эди.

¹¹ Гъарпкъа о, денъизге ве Маралагъадже барып, Даббешетке къошулып, Ёкънеам янында олгъан озенгедже узана эди.

¹² Саридден сынъыр шаркъкъа, кунь догъгъан тарафкъа, Кислот-Таворнынъ топракъларына барып, Давераткъадже узана ве Яфиягъа котериле эди.

¹³ Сонъ о, шаркъкъа, Гъат-Хефер ве Эт-Къацинге тараф кетип, Риммонгъа котерилип, Неагъа айлана эди.

¹⁴ Андан сынъыр шимальде Ханнатонгъа тараф айланып, Ифтах-Эль вадийинде бите эди.

¹⁵ Пайгъа даа Къаттат, Нахалал, Шимрон, Идала ве Бет-Лехем шеэрлери кире эдилер – койлеринен берабер 12 шеэр.

¹⁶ Будыр Зевулун огъулларынынъ, сойларына коре олгъан топракъ пайы, будыр оларнынъ шеэр ве койлери.

Йиссакъар къабилесининъ пайы

¹⁷ Дёртюнджи джереп Йиссакъаргъа, Йиссакъар огъулларына, сойларына коре тюшти.

¹⁸ Оларнынъ сынъыры бойле шеэрлерге узана эди: Йизреэл, Кесуллот, Шунем,

¹⁹ Хафараим, Шион, Анахарат,

²⁰ Раббит, Кишион, Эвец,

²¹ Ремет, Эн-Гъанним, Эн-Хадда, Бет-Паццец.

²² Сынъыры Тавор, Шахацума ве Бет-Шемешке къошулып, Иорданнынъ янында бите эди – койлеринен берабер 16 шеэр.

²³ Будыр Йиссакъар огъуллары къабилесининъ, сойларына коре олгъан топракъ пайы, будыр оларнынъ шеэр ве койлери.

Ашер несилининъ пайы

²⁴ Бешинджи джереп Ашер къабилесине, сойларына коре тюшти.

²⁵ Онынъ топрагъында бойле шеэрлер бар эди: Хелкъат, Халий, Бетен, Акъшаф,

²⁶ Алламмелек, Амад, Мишал. Гъарпта сынъыр Къармел ве Шихор-Ливнаткъа къошула,

²⁷ шаркъкъа Бет-Дагонгъа тараф айлана, Зевулун топрагъына ве Ифтах-Эль вадийине къошулып, Къавулнынъ сол тарафындан кечип, Бет-Эмек ве Неиэлге тараф шимальге кете эди.

²⁸ Сонъ о, Эврон, Рехов, Хаммон ве Къанагъа тараф буюк Сидонгъадже кете эди.

²⁹ Ондан сонъ сынъыр арткъа Рамагъа тараф айлана, пекинген Тир шеэрине кетип, Хосагъа айлана ве Акъзив деген ерде денъиз янында бите эди.

³⁰ Умма, Афек ве Рехов шеэрлери де анда эди. Эписи олып, койлеринен берабер 22 шеэр.

³¹ Будыр Ашер огъуллары къабилесининъ, сойларына коре олгъан топракъ пайы, будыр оларнынъ шеэр ве койлери.

Нафталий къабилесининъ пайы

³² Алтынджы джереп Нафталий огъулларына, сойларына коре тюшти.

³³ Онынъ сынъыры Хелефтен ве Цаананнимдеки эмен орманындан башлап, Адамий-Некевге, Явнеэльге ве Лаккумгъа кетип, Иордан янында бите эди.

³⁴ Сонъ сынъыр гъарпкъа Азнот-Таворгъа айлана, андан Хукъокъкъа тараф кете ве дженюпте Зевулуннынъ топрагъына, гъарпта Ашернинъ топрагъына, шаркъта Ехудагъа ве Иордангъа къошула эди.

³⁵ Пекитильген шеэрлер булар эди: Циддим, Цер, Хаммат, Ракъкъат, Киннерет,

³⁶ Адама, Рама, Хацор,

³⁷ Кедеш, Эдрей, Эн-Хацор,

³⁸ Йирон, Мигдал-Эль, Хорем, Бет-Анат ве Бет-Шемеш – койлеринен берабер 19 шеэр.

³⁹ Будыр Нафталий огъуллары къабилесининъ, сойларына коре олгъан топракъ пайы, оларнынъ шеэрлери ве койлери.

Дан къабилесининъ пайы

⁴⁰ Единджи джереп Дан огъулларына, сойларына коре, тюшти.

⁴¹ Оларнынъ топракъларында бойле шеэрлер бар эди: Цора, Эштаол, Ир-Шемеш,

⁴² Шаалаббин, Аялон, Йитла,

⁴³ Элон, Тимна, Экрон,

⁴⁴ Элтеке, Гиббетон, Баалат,

⁴⁵ Ехуд, Бене-Беракъ, Гъат-Риммон,

⁴⁶ Ме-Яркон ве Яффанынъ къаршысында олгъан Ракъкъон шеэри виляетинен берабер.

⁴⁷ Дан огъуллары Лешем шеэрине къаршы дженк этип чыкътылар ве оны запт этип, шеэр адамларыны къылычнен ольдюрдилер, озьлерине асабалыкъкъа алдылар ве анда яшамакъ ичюн ерлештилер. Олар Лешем шеэрини баба-дедесининъ адынен, яни «Дан» деп адландырдылар.

⁴⁸ Будыр Дан огъуллары къабилесининъ, сойларына коре олгъан топракъ пайы, будыр шеэр ве койлери.

Нун огълу Ехошуанынъ пайы

⁴⁹ Топракъларны сынъырларына коре пай этип битирген сонъ, исраиллилер озь араларында Нун огълу Ехошуагъа да пай айырдылар.

⁵⁰ РАББИ буюргъаны киби, олар онъа о озюне сорагъан Эфраим дагъларында ерлешкен Тимнат-Серах шеэрини бердилер. Ехошуа о шеэрни янъыдан къурды ве анда яшап башлады.

⁵¹ Шилода, Корюшюв Чадырынынъ кириши янында, руханий Элазар, Нун огълу Ехошуа ве сойларынынъ башлыкълары Исраиль огъуллары къабилелерине РАББИнинъ огюнде джереп чекип берген топракъ пайлары будыр. Бунынънен топракънынъ пай этильмеси битти.