Нун огълу Ехошуа 17 - Мукъаддес Китап

Менашше къабилесининъ гъарбий пайы

¹ Сонъ джереп Юсуфнынъ биринджи огълу олгъан Менашшенинъ къабилесине тюшти. Дженкте джесюр олгъан Гиладнынъ дедеси Менашшенинъ огълу Макирге Гилад ве Башан шеэрлери айырылгъан эди.

² Менашшенинъ къалгъан огъулларына, сойларына коре, топракъ пайлары айырылгъан эдилер: Авиэзернинъ огъулларына, Хелекнинъ огъулларына, Асриэлнинъ огъулларына, Шекемнинъ огъулларына, Хефернинъ огъулларына ве Шемиданынъ огъулларына. Олар Юсуф огълу Менашшенинъ эвлятлары, сойларына коре олгъан эркеклеридир.

³ Менашше огълу Макир огълу Гилад огълу Хефернинъ огълу Целофехаднынъ огъуллары олмайып, тек къызлары бар эди. Мына оларнынъ адлары: Махла, Ноа, Хогъла, Милкъа ве Тирца.

⁴ Олар руханий Элазаргъа, Нун огълу Ехошуагъа ве башлыкъларгъа келип: – РАББИ Мусагъа бизге топракъ пайыны агъаларымызнынъ арасында бермеге эмир эткен эди, – дедилер. Ве оларгъа, РАББИ буюргъаны киби, эмджелерининъ арасында топракъ пайы берильди.

⁵ Иордан озенинден шаркъта яткъан Гилад ве Башан топракъларындан гъайры, Меннашшенинъ пайына даа он топракъ пайы айырылды.

⁶ Менашше къабилесининъ къызларына огъулларынынъ арасында пай айырылды. Гилад топрагъы исе Менашшенинъ къалгъан огъулларына берильди.

⁷ Менашшенинъ топрагъы Ашерден башлап, Шекемнинъ янында яткъан Микметаткъадже узана эди. Оларнынъ сынъыры андан дженюпке, Эн-Таппуах сакинлерине тараф девам эте эди.

⁸ Таппуах топрагъы Менашшеге берильди, Менашшенинъ сынъырында ерлешкен Таппуах шеэри исе эфраимлилерге берильди.

⁹ Сонъ сынъыр Къана вадийине тараф, дженюпке узана эди. Анда олгъан Эфраимнинъ шеэрлери Менашшенинъ шеэрлери арасында ерлешкен эдилер. Сонъ Менашшенинъ топракъ сынъыры озеннинъ шималь тарафындан кечип, денъиз янында бите эди.

¹⁰ Дженюптеки топракъ Эфраимнинъ, шимальдеки исе Менашшенинъ эди. Менашшенинъ топракълары денъизгедже узанып, шимальде Ашернен, шаркъта Йиссакъарнен сынъырдаш эдилер.

¹¹ Йиссакъар ве Ашер топракъларында Бет-Шеан ве Ивлеам шеэрлери этрафындаки койлеринен берабер, Дорнынъ, Эн-Дорнынъ, Таанакънынъ ве Мегиддонынъ адамлары этрафындаки койлеринен берабер, ве Нафетнинъ учеви Менашшенинъки эдилер.

¹² Менашше огъуллары бу шеэрлернинъ сакинлерини къувып оламадылар, ве ханаанлылар бу топракъта эп яшай къалдылар.

¹³ Исраиллилер кучьке кирген сонъ, ханаанлыларгъа озь ишлерини беджермеге меджбур эттирдилер, амма къуваламадылар.

Юсуф эвлятларынынъ шикяетлери

¹⁴ Юсуфнынъ огъуллары Ехошуадан: – РАББИ бизни багъышлагъаны киби чокъ сайылы олгъанымызгъа бакъмадан, не ичюн сен бизим топракъ пайымызгъа бир джереп чекип, тек бир пайны бердинъ? – деп сорадылар.

¹⁵ – Эгер сиз чокъ сайылы олсанъыз, – деди Ехошуа, – ве Эфраим дагъы сизге тарашлыкъ этсе, ормангъа барып, озьлеринъизге перизлилер ве рефалыларнынъ топракъларында ер темизлеп алынъыз.

¹⁶ Юсуфнынъ огъуллары: – Дагълар бизге тарашлыкъ этелер, лякин тегиз ерлерде, Бет-Шеан шеэринде ве этрафындаки койлерде ве Йизреэл вадийинде яшагъан эписи ханаанлыларда демир дженк арабалары бар, – дедилер.

¹⁷ Ехошуа Юсуфнынъ эвине, Эфраим ве Менашшеге: – Сиз чокъ сайылысынъыз, ве кучюнъиз буюктир. Сизде тек бир джереп олмаз,

¹⁸ дагъ да сизинъ оладжакъ, орман да. Сиз оны темизлерсинъиз, ве о, бутюнлей сизинъ оладжакъ. Ханаанлыларда демир дженк арабалары ве олар кучьлю олгъанына бакъмадан, сиз оларны къуварсынъыз, – деди.