Нун огълу Ехошуа 16 - Мукъаддес Китап

Эфраим ве Менашше къабилелерининъ пайлары

¹ Сонъ джереп Юсуф огъулларына тюшти. Оларнынъ пайы Ерихон янында олгъан Иордандан, Ерихон сувларынынъ шаркъ тарафына, сахрадан кечип, Ерихондан Бет-Эль дагъларына тараф узана эди.

² Бет-Эльден, яни Луздан девам этип, Атароткъа, аркълыларнынъ топракъларына кече,

³ сонъ яфлетлилернинъ топракъларына, гъарпкъа, ашагъы Бет-Хорон виляетине ве Гезерге къадар тюше ве Акъ денъиз янында бите эди.

⁴ Юсуфнынъ огъуллары Менашше ве Эфраим озь топракъ пайларыны алдылар.

Эфраим къабилесининъ пайы

⁵ Эфраим къабилесининъ сойларына коре олгъан топракълары будыр: пайларынынъ сынъыры шаркъта яткъан Атарот-Аддардан башлап, юкъары Бет-Хоронгъадже кечип,

⁶ денъизге тараф узана эди. Шимальде яткъан Микметаттан шаркъкъа Таанат-Шилогъа тараф айланып, онынъ артындан шаркъта яткъан Яноахкъа кече эди.

⁷ Сонъ Яноахтан Атароткъа ве Наарагъа тюшип, Ерихонгъа къошула ве Иордангъа чыкъа эди.

⁸ Таппуахтан сынъыр Къана озенине тараф гъарпкъа кете ве денъиз янында бите эди. Будыр Эфраим къабилесининъ, сойларына коре олгъан топракъ пайы.

⁹ Мында даа менашшелилернинъ пайындан эфраимлилерге айырылгъан койлеринен берабер эписи шеэрлер кире эдилер.

¹⁰ Олар Гезерде яшагъан ханаанлыларны къуваламадылар. Бу куньге къадар ханаанлылар Эфраим огъулларынынъ арасында яшайлар ве оларнынъ ыргъатлары олып, агъыр ишлер япалар.