Нун огълу Ехошуа 15 - Мукъаддес Китап

Ехуда къабилесининъ пайы

¹ Ехуда къабилесининъ топракъ пайы, сойларына коре, Эдом сынъырларына къадар, Негевде яткъан Цин сахрасына къадар, дженюпке тараф узана эди.

² Оларнынъ дженюбий сынъыры Олю денъизнинъ дженюп тарафында олгъан корьфезден башлап,

³ Акъреплер тёпелигининъ дженюп тарафындан кечип, Цинге тараф девам эте ве Къадеш-Барнеагъа коре дженюпке котериле эди. Сонъ Хецроннынъ янындан кечип, Аддаргъа тараф кете ве Къаркъагъа тараф чевире эди.

⁴ Сонъ Ацмондан кечип, Мысырнынъ сынъырында олгъан вадийге тараф котерилип, Акъ денъиз янында бите эди. Будыр оларнынъ дженюп сынъыры.

⁵ Шаркъ сынъыры – Иорданнынъ агъзынадже баргъан Олю денъиз. Шималь сынъыры Иордан агъзынынъ янындаки денъиз корьфезинден башлап,

⁶ Бет-Хогълагъа котерилип, Бет-Араванынъ шималь тарафындан кечип, Рубен огълу Боханнынъ ташынадже девам эте эди.

⁷ Сонъ сынъыр Акъор вадийден Девирге тараф котерилип, шимальге, озенден дженюпте яткъан Адуммим тёпелигининъ къаршысында олгъан Гилгалгъа чевире эди. О, Эн-Шемешнинъ сувларына узанып, Эн-Рогель янында бите эди.

⁸ Сонъ сынъыр евуслылар шеэри олгъан Ерусалимнинъ дженюбий тарафындан Бен-Хинном вадийине тараф котериле эди. Андан сынъыр Рефаим вадийининъ шималь четинде ерлешкен Хинном вадийинден гъарпта яткъан дагънынъ тёпесине котериле эди.

⁹ Дагъ тёпесинден сынъыр Нефтоах чокърагъына узана, андан да Эфрон дагъынынъ шеэрлерине, сонъ Баалагъа, я да Кирьят-Яримге тараф чевире эди.

¹⁰ Сонъ Бааладан гъарпкъа Сеир дагъына тараф чевире, Ярим, я да Кесалон дагъынынъ шималь тарафындан кечип, Бет-Шемешке тараф тюше ве Тимнадан кече эди.

¹¹ О, Экрон дагъынынъ шималь тарафындан кечип, Шиккеронгъа чевире, Баала дагъындан кечип, тап Явнеэльге бара эди. Сынъырнынъ сонъу Акъ денъиз янында бите эди.

¹² Гъарбий сынъыр – Акъ денъизнинъ ялысы. Ехуда огъулларынынъ, сойларына коре, чевре-четининъ сынъырлары бойледир.

Къалев Хеврон ве Девир шеэрлерини запт эте

¹³ РАББИ буюргъаны киби, Ехошуа Ефунненинъ огълу Къалевге Ехуда огъулларынынъ арасында топракъ пайыны берди – Кирьят-Арбаны, я да Хеврон шеэрини. Анакъ бабасынынъ ады Арба эди.

¹⁴ Къалев андан Анакънынъ учь огълуны къувалады: Шешайны, Ахиманны ве Талмайны, – Анакънынъ балаларыны.

¹⁵ Андан Къалев Девир шеэрининъ адамларына къаршы кетти. Девир эвель Кирьят-Сефер деп адлана эди.

¹⁶ – Кирьят-Сеферге атылып оны запт эткен адамгъа мен озь къызым Акъсаны акъайгъа берерим, – деди Къалев.

¹⁷ Шеэрни Къалевнинъ къардашы олгъан Кеназнынъ огълу Отниэл запт этти, ве Къалев онъа озь къызы Акъсаны акъайгъа берди.

¹⁸ Бир кунь Акъсаны бабасындан тарла сорамакъны огреттилер. О, онъа кельгенде, эшектен тюшти. Къалев ондан: – Не истейсинъ? – деп сорады.

¹⁹ – Манъа бир бахшыш бер, – деди къызы. – Сен манъа Негевде топракъ бердинъ, энди сув чокъракъларыны да бер. Ве Къалев онъа юкъары ве ашагъы сув чокъракъларыны да берди.

Ехуда къабилесининъ шеэрлери

²⁰ Ехуда къабилесининъ топракъ пайы, сойларына коре, будыр:

²¹ Ехуда къабилесининъ энъ дженюп тарафында, Негевде, Эдом мемлекетининъ сынъырына тараф олгъан шеэрлер мына: Къавцеэл, Эдер, Ягур,

²² Кина, Димона, Адада,

²³ Кедеш, Хацор, Йитнан,

²⁴ Зиф, Телем, Беалот,

²⁵ Хацор-Хадатта, Кериот-Хецрон (яни Хацор),

²⁶ Амам, Шема, Молада,

²⁷ Хацар-Гъадда, Хешмон, Бет-Пелет,

²⁸ Хацар-Шуал, Беэр-Шева, Бизиотья,

²⁹ Баала, Иим, Эцем,

³⁰ Элтолад, Кесил, Хорма,

³¹ Цикълагъ, Мадманна, Сансанна,

³² Леваот, Шилхим, Айин, Риммон – койлеринен берабер 29 шеэр.

³³ Алчакълыкъта олгъан шеэрлер булардыр: Эштаол, Цора, Ашна,

³⁴ Заноах, Эн-Гъанним, Таппуах, Энам,

³⁵ Ярмут, Адуллам, Сокъо, Азекъа,

³⁶ Шаараим, Адитаим, Гедера (яни Гедеротаим) – койлеринен берабер 14 шеэр.

³⁷ Ценан, Хадаша, Мигдал-Гъад,

³⁸ Дилеан, Мицпа, Ёкътеэл,

³⁹ Лакиш, Боцкъат, Эглон,

⁴⁰ Къаббон, Лахмас, Китлиш,

⁴¹ Гедерот, Бет-Дагон, Наама, Маккеда – койлеринен берабер 16 шеэр.

⁴² Ливна, Этер, Ашан,

⁴³ Ифтах, Ашна, Нецив,

⁴⁴ Кеила, Акъзив, Мареша – койлеринен берабер докъуз шеэр.

⁴⁵ Этрафындаки шеэрлер ве койлеринен берабер Экрон шеэри;

⁴⁶ Экрондан гъарпта яткъан – Ашдоднынъ янында олгъан эписи шеэрлер койлеринен берабер;

⁴⁷ Ашдод ве этрафындаки эписи шеэрлер ве койлер; Гъаза ве этрафындаки эписи шеэрлер ве койлер. Сынъырлары Мысыр вадийи ве улу денъизге къадар узана эди.

⁴⁸ Дагъларда олгъан шеэрлер: Шамир, Яттир, Сокъо,

⁴⁹ Данна, Кирьят-Санна (яни Девир),

⁵⁰ Анав, Эштемо, Аним,

⁵¹ Гошен, Холон ве Гило – койлеринен берабер он бир шеэр.

⁵² Арав, Дума, Эшан,

⁵³ Яним, Бет-Таппуах, Афекъа,

⁵⁴ Хумта, Кирьят-Арба (яни Хеврон) ве Циор – койлеринен берабер докъуз шеэр.

⁵⁵ Маон, Къармел, Зиф, Ютта,

⁵⁶ Йизреэл, Ёкъдеам, Заноах,

⁵⁷ Къаин, Гива ве Тимна – койлеринен берабер он шеэр.

⁵⁸ Халхул, Бет-Цур, Гедор,

⁵⁹ Маарат, Бет-Анот ве Элтекон – койлеринен берабер алты шеэр.

⁶⁰ Кирьят-Баал (яни Кирьят-Ярим), ве Рабба – койлеринен берабер эки шеэр.

⁶¹ Сахрада олгъан шеэрлер: Бет-Арава, Миддин, Секъакъа,

⁶² Нившан, Туз Шеэри ве Эн-Геди – койлеринен берабер алты шеэр.

⁶³ Ехуда огъуллары Ерусалимде яшагъан евуслыларны къувалап оламадылар, ве онынъ ичюн олар бу куньге къадар Ехуда огъулларынен берабер Ерусалимде яшайлар.