Нун огълу Ехошуа 13 - Мукъаддес Китап

Запт этильмеген топракълар

¹ Ехошуа къартайып, баягъы яшкъа кирген сонъ, РАББИ онъа бойле деди: – Сен къартайып баягъы яшкъа кирдинъ, пай оларакъ алынаджакъ топракълар исе даа чокъ.

² Даа енъильмеген топракълар мына: фелестинлилернинъ эписи виляетлери, гешурлыларнынъ бутюн мемлекети,

³ Мысырдан шаркъта яткъан Шихор дерьясындан башлап, шимальде яткъан Экроннынъ сынъырларынадже, ханаанлыларнынъ деп сайылгъан, амма беш фелестинли укюмдарларнынъ топрагъы – Гъаза, Ашдод, Ашкелон, Гъат ве Экрон шеэрлери ве аввалыларнынъ виляетлери.

⁴ Дженюпте ханаанлыларнынъ бутюн топрагъы: сидонлыларнынъ Меара шеэринден башлап Афекке къадар, аморлыларнынъ сынъырларынадже;

⁵ гиваллыларнынъ топрагъы ве шаркъта олгъан бутюн Ливан дагълары: Хермон дагъынынъ этегинде яткъан Баал-Гъаддан башлап Лево-Хаматкъа къадар.

⁶ Мен Исраиль огъулларынынъ огюнден Ливандан башлап Мисрефот-Маимгедже дагъларда эписи яшагъанларны, эписи сидонлыларны къуваларым. О топракъны, санъа буюргъаным киби, Исраильге пай этип бер.

⁷ Топракъны болип, докъуз къабилеге ве Менашше къабилесининъ ярысына асабалыкъкъа бер.

⁸ Менашше къабилесининъ экинджи ярысы, рубенлилер ве гъадлылар, РАББИнинъ къулу Муса оларгъа тайинлегени киби, Иорданнынъ шаркъий тарафында топракъ пайыны энди алдылар.

⁹ Оларнынъ топрагъы – Арнон озенининъ ялысындаки Ароэрден, вадийнинъ ортасында олгъан шеэрден ве Медева тегизлигинден башлап Дивонгъадже,

¹⁰ Хешбонда аммонлыларнынъ сынъырларына къадар падишалыкъ эткен аморлыларнынъ падишасы Сихоннынъ эписи шеэрлери,

¹¹ Гилад, гешурлыларнынъ ве маакъалыларнынъ виляетлери, бутюн Хермон дагълыгъы ве Салекъагъадже олгъан бутюн Башан,

¹² Башандаки Огнынъ бутюн падишалыгъы. (Ог Аштарот ве Эдрей шеэрлеринде падишалыкъ эткен эди. Муса енъип къувалагъан рефалылардан о бир озю къалгъан эди.)

¹³ Исраиль огъуллары гешурлыларны ве маакъалыларны къуваламадылар, ве бу куньге къадар гешурлылар ве маакъалылар Исраильнинъ арасында яшайлар.

¹⁴ Левийнинъ къабилесине Муса топракъ пайыны бермеди, чюнки РАББИ айткъанына коре, оларнынъ къысмети – Исраиль Алласы олгъан РАББИнинъ къурбанларыдыр.

Рубен къабилесининъ пайы

¹⁵ Рубен къабилесининъ сойларына Мусанынъ бергени будыр:

¹⁶ Арнон дерьясынынъ ялысындаки Ароэр шеэри ве вадийнинъ ортасында ерлешкен шеэрден башлап, Медева шеэрининъ янындаки бутюн тегизлик,

¹⁷ Хешбон шеэри ве тегиз ерлерде олгъан эписи шеэрлер, Дивон, Бамот-Баал, Бет-Баал-Меон,

¹⁸ Яхац, Кедемот, Мефаат,

¹⁹ Кирьятаим, Сивма ве вадийдеки байырда тургъан Церет-Шахар,

²⁰ Бет-Пеор, Фисга дагъынынъ этеклери ве Бет-Ешимот,

²¹ тегиз ерлерде олгъан эписи шеэрлер ве Хешбонда падишалыкъ эткен аморлыларнынъ падишасы Сихоннынъ бутюн падишалыгъы. Муса оны ве эписи Мидьян ёлбашчыларыны – Эвий, Рекем, Цур, Хур ве Реваны енъди. Олар Сихоннынъ башлыкълары олып, о мемлекетте яшай эдилер.

²² Дженкте ольдюрильгенлерден гъайры, исраиллилер келеджекте не оладжагъыны айткъан Беор огълу Беламны ольдюрдилер.

²³ Рубен огъулларынынъ топракъ сынъырлары Иордан озенине къадар бара эдилер. Рубенлилер сойларынынъ топракъ асабалыгъы, шеэрлери ве койлери будыр.

Гъад къабилесининъ пайы

²⁴ Гъад къабилесине, Гъаднынъ огъулларына Мусанынъ бергени будыр:

²⁵ Язер топрагъы, Гиладнынъ эписи шеэрлери ве Раббанынъ янында олгъан Ароэрге къадар аммонлыларнынъ яры топрагъы,

²⁶ Хешбондан башлап Рамат-Мицпегедже, Бетоним, Маханаимден башлап Девир топрагъынадже;

²⁷ вадийде исе – Бет-Харам, Бет-Нимра, Сукъкъот, Цафон ве Хешбон падишасы Сихоннынъ падишалыгъындан къалгъан парча. Топракънынъ сынъыры Иорданнынъ шаркъий тарафында Киннерет денъизине къадар эди.

²⁸ Гъадлылар сойларынынъ топракъ асабалыгъы, шеэрлери ве койлери будыр.

Менашше къабилесининъ шаркъий пайы

²⁹ Менашше къабилесининъ ярысына, сойларына коре, Муса бергени будыр:

³⁰ сынъыры олгъан Маханаимден башлап бутюн Башан, Башан падишасы Огнынъ бутюн падишалыгъы, Башанда олгъан Яирнинъ эписи койлери, алтмыш шеэр.

³¹ Гиладнынъ ярысы, Аштарот ве Эдрей шеэрлери – башанлы Огнынъ падишалыкъ шеэрлери – Менашше огълу Макир эвлятларына, яни макирлилернинъ ярысына сойларына коре берильген эди.

³² Будыр Ерихоннынъ къаршысында, Иорданнынъ шаркъ тарафында, Моав тегизлигинде Муса берген топракъ пайлары.

³³ Левий къабилесине исе Муса топракъ асабалыгъыны бермеди. О, оларгъа айткъаны киби, оларнынъ пайы – Исраильнинъ Алласы олгъан РАББИдир.