Нехемья 12 - Мукъаддес Китап

Руханийлернинъ ве левийлилернинъ адлары

¹ Шеалтиэлнинъ огълу Зеруббавелнен ве Ешуанен кельген руханийлер ве левийлилер шулардыр: Серая, Йирмея, Эзра,

² Амарья, Маллукъ, Хаттуш,

³ Шекъанья, Рехум, Меремот,

⁴ Иддо, Гиннетой, Авия,

⁵ Миямин, Маадья, Билгъа,

⁶ Шемая, Ёярив, Едая,

⁷ Саллу, Амокъ, Хилкия, Едая. Булар – Ешуанынъ заманында руханийлернинъ ве оларнынъ агъа-къардашларынынъ башлыкълары.

⁸ Левийлилер: Ешуа, Биннуй, Къадмиэл, Шеревья, Ехуда, Маттанья ве онынъ къардашлары (Маттанья макътав йырлары ичюн джевапкяр эди),

⁹ эм де ибадетлерде оларнынъ къаршысында тургъан агъа-къардашлары Бакъбукъя ве Унний.

Руханийлернинъ несиллер джедвели

¹⁰ Ешуа – Ёякимнинъ бабасы, Ёяким – Эльяшивнинъ бабасы, Эльяшив – Ёяданынъ бабасы,

¹¹ Ёяд – Ёнатаннынъ бабасы, Ёнатан – Яддуанынъ бабасы эди.

¹² Ёякимнинъ заманында руханийлернинъ къоранта башлыкълары шулар эди: Мерая – Серая къорантасынынъ башлыгъы, Хананья – Йирмея къорантасынынъ башлыгъы,

¹³ Мешуллам – Эзра къорантасынынъ башлыгъы, Ехоханан – Амарья къорантасынынъ башлыгъы,

¹⁴ Ёнатан – Мелику къорантасынынъ башлыгъы, Юсуф – Шеванья къорантасынынъ башлыгъы,

¹⁵ Адна – Харим къорантасынынъ башлыгъы, Хелкъай – Мераёт къорантасынынъ башлыгъы,

¹⁶ Зекерья – Иддо къорантасынынъ башлыгъы, Мешуллам – Гиннетон къорантасынынъ башлыгъы,

¹⁷ Зикрий – Авия къорантасынынъ башлыгъы, Пилтай – Миньямин ве Моадья къоранталарынынъ башлыгъы,

¹⁸ Шаммуа – Билгъа къорантасынынъ башлыгъы, Ехонатан – Шемая къорантасынынъ башлыгъы,

¹⁹ Маттенай – Ёярив къорантасынынъ башлыгъы, Уззий – Едая къорантасынынъ башлыгъы,

²⁰ Къаллай – Саллай къорантасынынъ башлыгъы, Эвер – Амокъ къорантасынынъ башлыгъы,

²¹ Хашавья – Хилкия къорантасынынъ башлыгъы, Нетанэл – Едая къорантасынынъ башлыгъы.

Руханийлер къоранталарынынъ башлыкълары

²² Левийлилер къоранта башлыкълары оларакъ Эльяшив, Ёяда, Ёханан ве Яддуа заманларында язылгъан эдилер. Руханийлер Фарс падишасы Дарьявешнинъ заманында джедвельге язылгъан эдилер.

²³ Левий огъуллары, къоранта башлыкъларынынъ адлары Эльяшивнинъ огълу Ёханан куньлерине къадар тарих китабында язылгъан эди.

²⁴ Левийлилернинъ башлыкълары: Хашавья, Шеревья ве Къадмиэлнинъ огълу Ешуа. Агъа-къардашлары оларнынъ къаршысында тура эдилер ве Алланынъ адамы Давутнынъ къарарына коре, бир такъым экинджи такъымнынъ къаршысында Аллагъа шукюр эте ве Оны макътай эдилер.

²⁵ Маттанья, Бакъбукъя, Овадья, Мешуллам, Талмон ве Акъкъув къапуджылар эдилер ве къапуларнынъ огюндеки анбарларны да къаравуллай эдилер.

²⁶ Олар Ёякимнинъ заманларында (Ёяким – Ешуанынъ огълу, Ешуа – Ёцадакънынъ огълу) ве виляет башлыгъы Нехемьянынъ ве кятип олгъан руханий Узеирнинъ заманларында яшай эдилер.

Ерусалим диварыны багъышлайлар

²⁷ Ерусалим диварыны багъышлагъанда, левийлилерни эр ерден чагъырттылар ве оларгъа Ерусалимге кельмеге буюрдылар. Олар диварны багъышламагъа, къуванмагъа, шукюрлернен ве макътавларнен йырламагъа ве зиллер, арфа ве сантырда чалмагъа керек эдилер.

²⁸ Йырджылар Ерусалимнинъ чевре-этрафларындан ве нетофалыларнынъ койлеринден,

²⁹ Бет-Гилгалдан, Гева тарлаларындан ве Азмавет тарлаларындан топлаштылар. (Йырджылар Ерусалимнинъ этрафында озьлерине койлер къургъан эдилер.)

³⁰ Руханийлер ве левийлилер элялландылар, сонъ халкъны, къапуларны ве диварны элялладылар.

³¹ Сонъра мен Ехуда башлыкъларыны диваргъа чыкъардым ве, макътавларны йырласын деп, эки буюк йырджылар такъымы къойдым. Бириси диварнынъ сагъ тарафындан Кубре Къапусына кетти.

³² Оларнынъ артындан бу адамлар кеттилер: Хошая ве Ехуда башлыкъларынынъ ярысы,

³³ Азарья, Узеир, Мешуллам,

³⁴ Ехуда, Биньямин, Шемая, Йирмея,

³⁵ боразан чалгъанлардан, руханийлернинъ огъулларындан: Зекъарья (Зекъарья – Ёнатаннынъ огълу, Ёнатан – Шемаянынъ огълу, Шемая – Маттаньянынъ огълу, Маттанья – Микъаянынъ огълу, Микъая – Закъкъурнынъ огълу, Закъкъур – Асафнынъ огълу)

³⁶ ве онынъ къардашлары Шемая, Азарел, Милалай, Гилалай, Маай, Нетанэл, Ехуда ве Хананий Алланынъ адамы Давутнынъ чалгъы алетлерини котерип кеттилер, оларнынъ огюнде Узеир кятип кетти.

³⁷ Чокъракъ Къапусынынъ янында ве къаршысында олар Давут Шеэрининъ мердивенинден чыкътылар ве Давутнынъ эви тёпесинден кечип, Сув Къапусына догъру шаркъ тарафкъа кеттилер.

³⁸ Экинджи йырджылар такъымы исе сол тарафтан кетти. Онынъ артындан мен ве халкънынъ ярысы Собалар Къуллесинден Кенъ диваргъа,

³⁹ сонъра Эфраим Къапусындан, Эски Къапу ве Балыкъ Къапуларындан кечип, Хананел Къуллесинден ве Юз Къуллесинден Къойлар Къапусына кельдилер ве Къаравуллар Къапусында токътадылар.

⁴⁰ Сонъ йырджылар такъымларынынъ экиси де Алланынъ Эви янында турдылар. Мен ве башлыкъларнынъ ярысы да токътадыкъ.

⁴¹ Руханийлер Эльяким, Маасея, Миньямин, Микъая, Эльёэнай, Зекъарья, Хананья боразанларнен берабер,

⁴² Маасея, Шемая, Элазар, Уззий, Ехоханан, Малкия, Элам ве Эзер турдылар. Йырджылар къычырып йырладылар. Оларнынъ башлыгъы Йизрахья эди.

⁴³ Алла оларгъа буюк къуванч багъышлады, ве о куню олар чокъ къурбанлар кетирдилер ве пек къувандылар. Эм къадынлар ве балалар къувандылар, ве Ерусалимнинъ къуванчы узакъкъа эшитильди.

Алланынъ Сарайында кене ибадет этелер

⁴⁴ Шу куню бахшышлар, биринджи махсуллар ве онда бир пайлар ичюн ве анбарлар ичюн джевапкяр оладжакъ адамларны къойдылар. Анбарджылар шеэр дживарындаки тарлалардан руханийлер ве левийлилер ичюн къануний пайларны топлайджакъ эдилер. Ехуда халкъы хызмет эткен руханийлерге ве левийлилерге пек севине эди.

⁴⁵ Руханийлер ве левийлилер исе Аллагъа хызмет эте эдилер ве эляллав хызметини беджере эдилер. Давут ве онынъ огълу Сулейманнынъ къарарына коре, олар къапуджылар ве йырджылар олдылар.

⁴⁶ Эвель-эзельден Давутнынъ ве Асафнынъ заманларында йырджыларнынъ башлыкълары ве Аллагъа багъышлангъан макътав ве шукюр йырлары бельгиленген эди.

⁴⁷ Зеруббавел заманында ве Нехемья заманында бутюн исраиллилер йырджыларгъа ве къапуджыларгъа эр куньлюк пайларны бере эдилер, левийлилерге азизликлерни айыра эдилер, левийлилер исе азизликлернинъ бир къысмыны Харун огъулларына бере эдилер.