Нахум 3 - Мукъаддес Китап

Ниневенинъ ёкъ этилюв себеби

¹ Къан тёккен шеэрге беля! О, ялангъа ве ягъмагъа толу, мында ягъмаджылыкъ токътамай.

² Къамчы къакъылмасы ве айлангъан копчеклернинъ сеси, ат туякъларынынъ патырдысы ве дженк арабасынынъ гудюрдиси эшитиле.

³ Атлылар чапа, къылыч парылдай, мызракълар ялтырай. Чокътан-чокъ олюлер, оба-оба джесетлер ята. Олюлернинъ сайысы ёкъ, адамлар юргенде, олюлерге сюрюне.

⁴ Бу, фаишенинъ буюк ороспулыгъы ичюн олды. О – дюльбер, усталыкънен этне япа, ороспулыкъларынен халкъларны алдата, этнесинен къабилелерни озюне къул япа.

⁵ – Мен санъа къаршы чыкъам! – дей Ордуларнынъ РАББИси. – Урбаларынънынъ этегини бетинъе котерип, халкъларгъа аврет ерлеринъни корьсетеджегим, айыбынъны падишалыкъларгъа ачаджагъым.

⁶ Сени писликлерге булаштыраджагъым, сени ашалайджагъым ве масхара этеджегим.

⁷ Сени корьген эр ким сенден къачып: – Ниневе харап олды! Оны ким аджыйджакъ? Сенинъ гонълюнъни аладжакъ кимни тапайым? – дейджек.

⁸ Сен Но-Амон шеэринден яхшысынъмы? О, озенлер арасында ерлешкен эди, чевре-чети сув эди, денъиз оны къорчалай, Нил дерьясы онынъ дивары эди.

⁹ Хуш мемлекети – онынъ къудрети, Мысыр да онъа сынъырсыз кучь берди. Пут мемлекети ве ливиялылар онъа ярдымгъа келе эдилер.

¹⁰ Амма оны да сюргюн эттилер, эсир алдылар. Сабийлери биле эр бир сокъакъларнынъ кошелеринде ольдюрильди, мырзалары ичюн джереп чекильди, онынъ буюк акъайлары зынджырнен багъланды.

¹¹ Сен де сархош оладжакъсынъ, сен де гизленип, душманларынъдан сакъланув ерини къыдыраджакъсынъ.

¹² Сенинъ къалелеринъ пишкен инджир мейваларына толу терекке бенъзей: эгер оны сильксенъ, ашамагъа истегеннинъ агъзына догъру тюшеджек.

¹³ Бутюн аскерлеринъ – апайлар киби. Мемлекетинъ душманларынъа ачыкъ, атеш шеэрнинъ къапу мандалларыны ашайджакъ.

¹⁴ Алкъагъа алынаджакъ вакътына сув ташып къой, къалелеринъни къавийлештир. Чамур тап, балчыкъ тапта, кирпичлер ичюн къалыфларны азырла.

¹⁵ Сени анда атеш ашап битиреджек, къылыч сени кеседжек. Озюнъ тыртыр я да сарынчкъа киби чокъ олсанъ да, атеш тыртырларгъа ошап, сени ашайджакъ.

¹⁶ Алыш-веришчилеринъ кок йылдызларындан чокъ олды, амма олар, сарынчкъа киби, мемлекетинъни талайджакъ ве учып кетеджеклер.

¹⁷ Къаравулларынъ – чегертки киби чокъ, орду башлыкъларынъ да – сарынчкъа сюрюси кибидир. Сувукъ олгъанда, олар ташлар арасында аралыкъларда сакъланалар, кунеш чыкъкъанда исе, учып кетелер, ве къайда олгъанларыны бильмезсинъ де.

¹⁸ Эй, Ашшур падишасы! Сенинъ ёлбашчыларынъ юкълай, мырзаларынъ раатлана, халкъынъ дагъларда дагъылды, оны топлайджакъ киши ёкъ.

¹⁹ Сенинъ яранъа илядж ёкъ, сени ургъан уруш – олюм ярасыдыр. Сенинъ акъкъынъда эшитеджек эр ким къуванып, эль чырпаджакъ, чюнки битмез ачувынъны дуймагъан кимсе къалмады.