Нахум 2 - Мукъаддес Китап

Ниневе шеэри акъкъында пейгъамберлик

¹ Санъа къаршы йыкъыджы котериле! Къавийлештирильген ерлеринъни къорчала, ёлларынъны къору, дженкке азырлан, кучюнъни топла!

² Душманлар Исраильни ве Якъупны хараплагъан олсалар да, юзюм пытакъларыны сыдырып алгъаны киби, оларнынъ барлыгъыны тартып алгъан олсалар да, РАББИ эм Исраильнинъ шерефини, эм Якъупнынъ шерефини гъайрыдан тиклейджек.

³ Кучьлю къараманларнынъ къалкъанлары къырмызы, орду аскерлери къызыл кийгенлер, дженк арабалары уруш ичюн азырлангъан, оларнынъ мадени атеш киби парылдай, мызракълар орманы саллана.

⁴ Дженк арабалары сокъакълар бою ашыкъа, кенъ мейданларда тез кетелер. Олар алев киби йылтырайлар, йылдырым киби парылдайлар.

⁵ О, озь батырларыны чагъыра, амма олар ёлунда сюрюнелер. Шеэр диварларына чыкъмагъа ашыкъалар, амма шеэр энди алкъагъа алынды.

⁶ Озенлерни токътаткъан къапулар ачыла, ве сарай йыкъыла.

⁷ Къарар чыкъарылды: къыраличени союндыралар ве алып кетелер. Онынъ къадын къуллары, гогерджин киби инъильдеп, кокюслерине гъамнен уралар.

⁸ Эвель-эзельден Ниневе шеэри сувгъа толу хавуз киби эди, шимди исе эр кес, акъып кеткен сув киби, къача. «Токъта, токъта!» – деп оларгъа къычыралар, амма кимсе артына бакъмай.

⁹ Тартып алынъыз кумюшни, чайпанъыз алтынны! Къыйметли шейлернинъ сонъу ёкъ. Чешит тюрлю паалы шейлер чокъ!

¹⁰ Шеэрни чайпай, бошата, ёкъ этелер. Юреклер ирий, тизлер къалтырай. Эр кеснинъ бедени агъыра, эр кеснинъ бети къарара.

¹¹ Къайда энди арслан къобасы? Арслан балалары авгъа чыкъкъан ер къайда? Арсланлар къорантасы ич кимседен къоркъмайып юрген ерлери къайда?

¹² Арслан, озь балаларыны тойдурмакъ ичюн, чокъ парчалады, хырсызлады, ыргъачылары ичюн чокъ богъды, озь къобасыны авгъа толдурды, яшагъан ерлерини парчалангъан этке толдурды.

¹³ – Мен санъа къаршы чыкътым, – дей Ордуларнынъ РАББИси. – Дженк арабаларынъны якъаджагъым, арслан балаларынъ къылычнен ольдюриледжек. Энди сен ер юзюнде авгъа чыкъмайджакъсынъ, эльчилеринънинъ сеси башкъа эшитильмейджек.