Матта 7 - Мукъаддес Китап

Башкъаларны къабаатлав акъкъында

¹ ‌Кимсени укюм этменъиз, сизни де укюм этмезлер.

² Насыл укюм этсенъиз, шойле де укюм этилирсиз. Насыл ольчювнен ольчесенъиз, ана шу ольчювни де алырсыз.

³ Сен не ичюн къардашынънынъ козюндеки чёпке бакъасынъ, озь козюнъде исе агъачны корьмейсинъ?

⁴ Насыл этип, къардашынъа: «Бер, козюнъдеки чёпни чыкъарып алайым», – дейсинъ? Бакъса, сенинъ козюнъде агъач бар!

⁵ Эй, экиюзьлю! Башта агъачны озь козюнъден чыкъарып ал да, сонъ чёпни къардашынънынъ козюнден насыл чыкъараджагъынъны корерсинъ.

⁶ Мукъаддес олгъан шейни копеклерге берменъиз – олар устюнъизге атылып, сизни парчаларлар. Инджилеринъизни домузлар огюне сепменъиз – оларны таптап ташларлар.

Соранъыз, къыдырынъыз, къакъынъыз

⁷ Соранъыз – сизге бериледжек. Къыдырынъыз – тападжакъсыз. Такъырдатынъыз – сизге ачыладжакъ.

⁸ Эр бир сорагъан ала, къыдыргъан тапа, такъырдаткъангъа къапуны ачалар.

⁹ Огълу бабасындан отьмек сорагъанда, сизинъ аранъызда онъа таш берген адам тапылырмы?

¹⁰ Балыкъ сораса исе, онъа йылан берген сою бармы?

¹¹ Сиз, яман адамлар олып, балаларынъызгъа яхшы бир шей бере билесинъиз. Коклердеки Бабанъыз да Ондан сорагъангъа яхшы шейлерни багъышлар.

¹² Шунынъ ичюн, адамлар сизге не япкъаныны истесенъиз, сиз де оларгъа шуны япынъыз. Бунда бутюн Къанун ве Пейгъамберлернинъ Язылары тура.

Тар къапу

¹³ Тар къапудан киринъиз! Олюмнинъ къапусы кенъ, ве анда алып баргъан ёл пек бол. Шу ёлдан юргенлер де чокъ.

¹⁴ Омюр къапусы исе пек тарашлыкъ, ёлу да тар, бу ёлны тапкъанлар да аз.

Терек ве онынъ мейвалары

¹⁵ ‌Ялан пейгъамберлерден сакът олунъыз! Олар сизинъ алдынъызгъа къозу терисинен къапланып келелер, лякин ичинде йыртыджы къашкъырлардыр.

¹⁶ Оларны япкъан ишлери мейваларындан танырсыз. Когемден юзюм, я да тикенектен инджир джыялармы?

¹⁷ Эр бир яхшы терек яхшы мейва бере, ярамай терек исе ярамай мейва бере.

¹⁸ Яхшы терек ярамай мейва бермей, ярамай терек исе яхшы мейва бермей.

¹⁹ Яхшы мейва бермеген эр бир терекни пычып, атешке ташлайлар.

²⁰ Бойледже, ялан пейгъамберлерни ишлерининъ мейваларындан танырсыз.

Къанун бозгъанлар акъкъында

²¹ ‌Манъа: «Раббим, Раббим!» – дегенлернинъ арасындан Кок Падишалыгъына тек базылары кирип оладжакъ. Анда тек Коклердеки Бабамнынъ истегенини беджергенлер киреджеклер.

²² Шу куню чокъ адамлар Манъа: «Раббим, Раббим! Биз Сенинъ Адынънен пейгъамберлик этмедикми? Сенинъ Адынънен джинлерни къувып чыкъармадыкъмы? Сенинъ Адынънен чокъ аджайип шейлер япмадыкъмы?» – дейджеклер.

²³ О вакъыт Мен оларгъа: «Мен сизни бир вакъыт бильмедим. Эй, Къанунны бозгъанлар, Меним янымдан кетинъиз!» – деп джевап береджем.

Эки эв къуруджы акъкъында

²⁴ Энди, ким Меним бу сёзлеримни эшитип, оларны беджерсе, озь эвини таш устюнде къургъан акъыллы адамгъа ошайджакъ.

²⁵ Ягъмур ягъып, озенлер ташып, еллер эсип, эвнинъ устюне тюшселер биле, таш устюнде къурулгъаны ичюн, эв бозулмаз.

²⁶ Ким Меним сёзлеримни эшитип, оларны беджермесе, озь эвини къум устюнде къургъан акъылсыз адамгъа ошайджакъ.

²⁷ Ягъмур ягъып, озенлер ташып, еллер эсип, эвнинъ устюне тюшселер, эв эшилип, дагъылып кетеджек.

²⁸ Иса бу сёзлерни айтып битиргенинен, адамлар Онынъ огреткенине шаштылар.

²⁹ Иса оларны Къанун оджалары киби дегиль, буюк къудрет берильген адам киби огрете эди.