Матта 17 - Мукъаддес Китап

Исанынъ корюниши денъише

¹ ‌Алты кунь кечкен сонъ, Иса янына Пётрны, Якъупны ве онынъ къардашы Юханны алды ве тек оларнен берабер бир дагъгъа котерильди.

² Исанынъ бутюн корюниши оларнынъ козьлери огюнде денъишти: Онынъ бети кунеш киби парылдады, урбасы исе козь къамаштырып бем-беяз олды.

³ Бакъса, оларнынъ огюнде Муса ве Ильяс пейда олдылар да, Исанен субетлешип башладылар.

⁴ Пётр Исагъа: – Раббим, бу ерде бизге не яхшы я! Эгер истесенъ, мен мында учь чалаш къурайым: бириси Санъа, бириси Мусагъа ве бириси Ильяскъа олсун, – деди.

⁵ Пётр бу сёзлерни даа айткъанда, апансыздан бир нур сачкъан булут пейда олып, оларны кольгесинен къапатты. Шу булут ичинден бир сес чыкъты: – Бу Меним севимли Огълумдыр, Мен Ондан разым! Оны динъленъиз!

⁶ Бу сесни эшиткен шегиртлер буюк бир къоркъуда юзьлерини ерге берип йыкъылдылар.

⁷ Иса оларнынъ янына келип, оларгъа тийди де: – Къоркъманъыз, турунъыз! – деди.

⁸ Шегиртлер козьлерини котерип, янларында Исадан гъайры кимсени корьмедилер.

⁹ Дагъдан тюшкенде, Иса шегиртлерине: – Инсан Огълу олюлерден тирильмегендже, мында корьген шейлерни кимсеге айтманъыз, – деп буюрды.

¹⁰ Шегиртлери Ондан: – Не ичюн Къанун оджалары: «Башта Ильяс кельмек керек», – дейлер? – деп сорадылар.

¹¹ Иса оларгъа джевап берип: – Бу керчек, башта Ильяс келип, эр шейни азырламакъ керек, – деди.

¹² – Мен сизлерге айтам: Ильяс энди кельди, амма оны танымадылар ве онен истеген шейлерни яптылар. Шойле де Инсан Огълу оларнынъ къолларындан чокъ азап чекмеге меджбур.

¹³ О вакъытта шегиртлер, Иса оларгъа Сувгъа Батырыджы Ягъя акъкъында айткъаныны анъладылар.

Иса джин ургъан баланы тедавийлей

¹⁴ Олар халкъкъа къайтып кельгенде, Исагъа бир адам якъынлашып, тиз чёкти де:

¹⁵ – Эфендим, огълума мерамет эт! Онда тутарыкъ хасталыгъы бар, о пек чекише. Сыкъ-сыкъ де атешке, де сувгъа дала, – деди.

¹⁶ – Баламны Сенинъ шегиртлеринъе кетирдим, амма олар оны тедавийлеп оламадылар.

¹⁷ – Эй, имансыз ве бозукъ адамлар! Не вакъыткъадже сизлернен оладжам?! Не къадаргъадже сизлерге даянаджам?! Баланы бу ерге, Меним алдыма кетиринъиз! – деди Иса.

¹⁸ Иса джинге чыкъмагъа эмир берди, ве джин чыкъты, бала исе шу ань тедавийленди.

¹⁹ Сонъ шегиртлер, Иса бир Озю къалгъанда, Онъа якъынлашып: – Биз джинни не ичюн къувып чыкъаралмадыкъ? – деп сорадылар.

^20-21 Иса оларгъа: – Сизинъ иманынъыз аз. Сизге догърусыны айтам: сизинъ бир хардал урлугъы къадар иманынъыз олгъанда, сиз мына бу дагъгъа: «Бу ерден о ерге кочь», – дейджексиз, ве о кочеджек. Сонъ сиз япалмайджакъ шей олмайджакъ, – деди.

Иса кене Озь олюми ве тирилюви акъкъында айта

²² Иса шегиртлеринен Галилеяда олгъанда, О, оларгъа: – Инсан Огълуны адамларнынъ къолуна тутып береджеклер

²³ ве ольдюреджеклер, амма учюнджи куню О, тириледжек, – деди. Сонъ шегиртлерни буюк бир гъам басты.

Алла Сарайынынъ салымы акъкъында

²⁴ Олар Къафарнаумгъа кельгенлеринде, Алла Сарайынынъ салымыны топлайыджылар Пётрнынъ алдына келип: – Сизлернинъ Оджанъыз Сарай салымыны береми? – деп сорадылар. Пётр: – Бере! – деди.

²⁵ О эвге кирген сонъ, Иса биринджи лаф ачты: – Симон, сенинъ фикиринъ насыл? Бу дюнья падишалары салым я да бергини кимден алалар? Озь огъулларынданмы я да ябанджыларданмы?

²⁶ – Ябанджылардан, – деди Онъа Пётр. – Ойле олса, озь огъуллары салымдан азат экен де, – деди Иса.

²⁷ – Амма салым топлайыджыларнынъ джаныны агъыртмамакъ ичюн, сен гольге барып балыкъ къармагъы ташла. Биринджи тутулгъан балыкъны алып, агъзыны ачсанъ, бир акъча тапарсынъ. Акъчаны алып, экимиз ичюн оларгъа салым бер, – деди Иса.