Марк 8 - Мукъаддес Китап

Иса дёрт бинъ адамны тойдура

¹ Шу куньлерде кене чокътан-чокъ адам топланды. Ашамагъа бир шей къалмагъаны ичюн, Иса шегиртлерини янына чагъырып:

² – Халкъны аджыйым. Учь кунь Меним алдымда туралар, ашамагъа исе ич бир шейлери ёкъ.

³ Эгер оларны эвлерине ач къалдырып йиберсем, ёлда такъаттан кесилирлер. Базылары узакъ ерлерден кельгенлер, – деди.

⁴ Шегиртлери бунъа: – Оларны тойдурмакъ ичюн бу сахрада ким, къайдан шу къадар отьмек аладжакъ? – деп, джевап бердилер.

⁵ – Не къадар отьмегинъиз бар? – деп сорады Иса. – Еди дане, – деди шегиртлер.

⁶ Сонъ Иса халкъкъа ерге отурмакъны буюрды. Еди отьмекни алып, шукюр этип парчалады ве даркъатмакъ ичюн шегиртлерине берди. Шегиртлер халкъкъа даркъаттылар.

⁷ Оларда бир къач балыкъ да бар эди. Иса шукюр дувасыны окъуп, оларны да даркъаттырды.

⁸ Халкъ ашап тойды. Артып къалгъан кесеклерни джыйып, еди сепет толдурдылар.

⁹ Шу ерде дёрт бинъге якъын адам бар эди. Сонъ Иса адамларны йиберип,

¹⁰ Озю шегиртлеринен берабер тез-тез къайыкъкъа отурып, Далманута юртуна кельди.

Фериселер бельги талап эте

¹¹ ‌Фериселер чыкъып, Онен давалашып башладылар. Оны сынамакъ ичюн, коктен бир бельги косьтергенини истей эдилер.

¹² Лякин Иса, агъыр нефес алып, оларгъа: – Не ичюн бу несиль бельги талап эте? Сизлерге догърусыны айтам: бу несильге ич бир бельги косьтерильмейджек! – деди.

¹³ Сонъ, оларны къалдырып, кене къайыкъкъа минди ве къаршы ялыгъа ёл алды.

Ирод ве фериселернинъ «маясы» акъкъында

¹⁴ Исанынъ шегиртлери ёлгъа отьмек алмагъа унуткъанлар. Къайыкъта бир отьмектен башкъа бир шей къалмады.

¹⁵ Шу арада Иса, шегиртлерине эмирлер берип: – Манъа бакъынъыз, фериселернен Ироднынъ маясындан сакъынынъыз! – деди.

¹⁶ Олар исе бир-бирине: «Буны отьмек алмагъанымыз ичюн айтты», – дедилер.

¹⁷ Иса, буны билип, оларгъа: – Сиз не ичюн озьара, янымызда отьмек ёкъ, дейсиз? Даа бир шей анъламайсынъызмы? Бунъа акъылынъыз етмейми? Юреклеринъиз даа кёрмы?

¹⁸ Козьлеринъиз бар, амма корьмейсизми? Къулакъларынъыз бар, амма эшитмейсизми? – деди. – Сиз хатырлап оламайсызмы?

¹⁹ Мен беш отьмекни парчалап, беш бинъ адамгъа болип бергенимде, сизлер ашап битирильмеген отьмекни къач сепетке джыйдынъыз? – Он эки сепет, – деди олар.

²⁰ – Мен еди отьмекни парчалап, дёрт бинъ адамгъа болип бергенимде, къач сепет отьмек къалды? – Еди сепет, – дедилер.

²¹ – Ондан сонъ да анъламайсынъызмы? – деди оларгъа Иса.

Иса Бетсайдада кёр адамны тедавийлей

²² Иса Бетсайда коюне кельгенде, Онынъ алдына бир кёр адамны кетирип, онъа тийгенини истедилер.

²³ Иса, сокъурнынъ къолундан тутып, койнинъ ичинден алып чыкъты. Козьлерини тюкюриклеп, къолларыны онынъ башына къойды да: – Бир шейлер коресинъми? – деп сорады.

²⁴ Сокъур башыны котерип: – Адамларны корем, олар тереклерге ошайлар, амма юрелер, – деди.

²⁵ Иса даа бир кере кёрнынъ козьлерине къолларыны тийгизди. Кёр дикъкъатнен бакъып, эр шейни ачыкъ коре башлады. О энди бутюнлей тедавийленди.

²⁶ Иса оны эвине ёллагъанда: – Койге кирме, – деди.

Пётр Исагъа Месих дей

²⁷ Иса озь шегиртлеринен берабер Филипнинъ Кайсареясы этрафындаки койлерге кетти. Ёлда шегиртлеринден: – Адамлар Мени ким деп саялар? – деп сорады.

²⁸ Шегиртлери: – Базылары Сени Сувгъа Батырыджы Ягъя, башкъалары – Ильяс, дигерлери исе – пейгъамберлерден бириси деп саялар, – дедилер.

²⁹ Иса олардан: – Я сиз Мени ким деп саясыз? – деп сорады. Пётр Онъа: – Сен Месихсинъ, – деди.

³⁰ Бундан сонъ Иса шегиртлерине Озю акъкъында кимсеге айтмагъа кесен-кес ясакъ этти.

Иса Озюнинъ азаплары, олюми ве тириледжеги акъкъында эвельден айта

³¹ ‌Иса шегиртлерини огретип башлады ки, Инсан Огълу чокъ азап чекмек, акъсакъаллар, баш руханийлер ве Къанун оджалары тарафындан ред этильмек, ольдюрильмек, амма учюнджи куню тирильмек керек.

³² Иса буны ачыкъ-айдын айта эди. Буны эшиткен Пётр, Исаны четке чекип, Оны азарлап башлады.

³³ Амма Иса, айланып, шегиртлерине бакъты да, Пётрнынъ сёзюни болип: – Ёкъ ол козюмден, Шейтан! Сен Алланынъ ишлерини дегиль, адам ишлерини тюшюнесинъ, – деди.

³⁴ Сонъ Иса халкъны ве шегиртлерини янына чагъырып: – Ким Меним артымдан кетмеге истесе, озюнден вазгечип, озь хачыны котерип, Меним артымдан юрсюн.

³⁵ Ким озь джаныны къуртармагъа истесе, оны джояджакъ. Ким Мен ве Къуванчлы Хабер ичюн джаныны берсе, джаныны къуртараджакъ.

³⁶ Эгер инсан бутюн дюньяны запт этип, озь джанына зарар кетирсе, онъа бундан файда бармы?

³⁷ Инсан, озь джаныны къуртармакъ ичюн, не берер?

³⁸ Ким бу ороспу ве гунакяр несиль арасында Менден ве Меним сёзлеримден утанса, Инсан Огълу да, Алланынъ мукъаддес мелеклеринен берабер Бабасынынъ Шурети иле кельгенде, ондан утаныр, – деди.