Марк 3 - Мукъаддес Китап

Иса сакъат адамнынъ къолуны тедавийлей

¹ ‌Иса кене синагогагъа кирди. Анда бир къолу сакъатланып къуругъан адам бар эди.

² Раатлыкъ куню бу сакъатны тедавийлер экенми, деп, Оны къабаатламакъ ичюн, артындан бакъып адамлар тура эдилер.

³ Иса, къолу сакъат олгъан адамгъа: – Ортагъа чыкъ! – деди.

⁴ Сонъ оларгъа бойле суаль берди: – Раатлыкъ куню яхшылыкъ я да яманлыкъ япмакъ мумкюнми? Къанун нени рухсет эте? Джан къуртармакъмы я да ольдюрмекми? Олар индемедилер.

⁵ Иса адамларнынъ о къадар таш юрекли олгъанларына къайгъырып, этрафына кедер ве ачувнен бакъты. Къолу сакъат адамгъа исе: – Къолунъны узат! – деди. О, сакъат къолуны узаткъанынен, къолу тюзельди.

⁶ Фериселер исе кетип, шу саат Ироднынъ тарафдарларынен бирликте топлашып, Исаны насыл этип ольдюрмеге акъыл таныштылар.

Иса гольнинъ ялысында чокъ адамны тедавийлей

⁷ Иса шегиртлеринен берабер голь тарафкъа ёл алды. Онынъ артындан Галилея ве Еудиеден пек чокъ адам юрмекте эди.

⁸ Онынъ япкъанларыны эшитип, тап Ерусалим, Идумея, Иордан аркъасындан, Тир ве Сидон виляетлеринден адам акъынтысы кельди.

⁹ Къалабалыкъта сыкъылып къалмамакъ ичюн, Иса шегиртлерине бир къайыкъ азырламакъ керегини айтты.

¹⁰ Чокъ адамны тедавийлегенини билип, чешит хасталыкъларгъа огърагъанлар бир-бирини итеклеп, Онъа токъунмакъ истей эдилер.

¹¹ Джинлер исе Оны корьгенде, ерге йыкъылып: – Сен – Алланынъ Огълусынъ, – деп къычыра эдилер.

¹² Амма Иса, Озю ким олгъаныны бильдирмеге кесен-кес ясакъ эте эди.

Иса он эки шегиртни сайлай

¹³ Ондан сонъ Иса дагъ устюне чыкъып, шегиртлеринден Озю сайлап алгъанларыны чагъырды. Олар Исанынъ янына кельдилер.

^14-15 Янында бутюн вакъыт олсунлар, Алла Сёзюни даркъатсынлар ве инсанлар ичинден джин къувмакъ къудретини алсынлар деп, Иса Озюне он эки эльчини сайлап алды.

¹⁶ О, он эки шегирт сайлагъанларнынъ адлары: Симон (Иса онъа Пётр адыны берди),

¹⁷ Зебедайнынъ огълу Якъуп, онынъ къардашы Юхан (Иса оларгъа Боанергес, я да «Гурюльдюнинъ огъуллары» адыны берди),

¹⁸ Андрей, Филип, Бартоломай, Матта, Тома, Алфейнинъ огълу Якъуп, Фадда, Ветанпервер Симон

¹⁹ ве сонъундан Исагъа хаинлик япкъан Иуда Искариот.

Мукъаддес Рухкъа къаршы айтылгъан куфюр сёзлер акъкъында

²⁰ ‌Бундан сонъ Иса эвине къайтты. Анда кене о къадар адам топланды ки, оларгъа бир тилим отьмек ашамагъа биле вакъыт олмады.

²¹ Исанынъ якъын адамлары буны эшитип: – О акъылдан азды, – деп, Оны алып кетмеге кельдилер.

²² Ерусалимден кельген Къанун оджалары: – Онынъ ичинде Беэльзебул шейтан бар! Шунынъ ичюн О, джинлерни джинлер башлыгъы къуветинен къувып чыкъара! – дедилер.

²³ Иса исе, оларны янына чагъырып, кинаели икяелер айтып башлады: – Шейтан Шейтанны насыл къувып чыкъараджакъ?

²⁴ Эгер бир падишалыкъ озь ичинден болюнсе, о падишалыкъ аякъта туралмаз.

²⁵ Эгер бир эв озь ичинден болюнсе, о эв аякъта туралмаз.

²⁶ Эгер Шейтан озюне къаршы чыкъса, о, аякъ устюнде туралмаз, амма онынъ сонъки куню якъынлашты.

²⁷ Кимсе, кучьлю адамнынъ эвине кирип, онынъ малыны хырсызламаз. Амма башта кучьлю адамны багъласа, бутюн мал-мулькюни хырсызлап кетер.

²⁸ Сизге догърусыны айтам: адамларнынъ япкъан гуналары ве айткъан куфюрликлери багъышланаджакъ.

²⁹ Амма куфюр сёзлерни Мукъаддес Рухкъа къаршы айткъан адам эбедий багъышланмайджакъ, эбедий джезагъа махкюм этиледжек.

³⁰ Иса бу сёзлерни айткъанынынъ себеби шунда ки, базылары: – Оны джин урды, – дей эдилер.

Иса анасы, огълан ве къызкъардашлары акъкъында

³¹ ‌Исанынъ анасынен къардашлары келип чыкътылар. Озьлери эвге кирмейип, Оны чагъырмакъ ичюн бир адамны ёлладылар.

³² Исанынъ этрафында пек чокъ адам бар эди. Олар Онъа: – Ананънен къардашларынъ ве къызкъардашларынъ тышарыда турып, Сени чагъыралар, – дедилер.

³³ Иса оларгъа: – Меним анам ве къардашларым кимдир? – деди.

³⁴ Сонъ этрафында отургъанларгъа бакъып: – Мына, булар Меним анам ве къардашларым!

³⁵ Ким Алланынъ истегини беджерсе, о Меним къардашым, къызкъардашым ве анам, – деди.