Марк 15 - Мукъаддес Китап

Иса аким Пилатнынъ огюнде

¹ ‌Саба танъ аткъанынен, баш руханийлер, акъсакъаллар, Къанун оджалары ве бутюн Юксек Шура топланып, мушавере яптылар. Сонъ, Исанынъ къолларыны багълап, Пилатнынъ огюне алып бардылар.

² Пилат Исадан: – Еудийлернинъ Падишасы Сен оласынъмы? – деп сорады. Иса онъа: – Буны сен озюнъ айтасынъ, – деп джевап берди.

³ Баш руханийлер Оны чокъ шейлерде къабаатлай эдилер.

⁴ Пилат Онъа даа бир кере: – Сенинъ ич бир джевабынъ ёкъмы? Бакъса, Санъа къаршы къабаатлавлар пек чокъ! – деди.

⁵ Лякин Иса ич бир джевап бермеди. Бу, Пилатны пек шашырды.

Иса хачкъа мыхланмакъ ичюн бериле

⁶ Эр Песах Байрамында Пилат халкъ истеген бир мабюсни азат эткен.

⁷ О вакъыт Барабба ве башкъа исьянджылар зинданда отура эди. Олар исьян котерип, бир адам ольдюргенлер.

⁸ Халкъ Пилаткъа келип, ондан эр даим япкъан ишни эда эткенини сорай башлады.

⁹ Пилат олардан: – Истейсизми, сизге еудийлернинъ Падишасыны азат этейим? – деп сорады.

¹⁰ О, баш руханийлер Исаны пахыллап теслим эткенлерини анълай эди.

¹¹ Баш руханийлер исе, Онынъ ерине Бараббаны азат эткенини талап этинъ деп, халкъны къозгъалдылар.

¹² Пилат олардан кене: – Сизлер еудийлернинъ Падишасы деп адландыргъан адамнен не япайым? – деп текрарлап сорады.

¹³ – Оны хачкъа мыхлап къой! – деп къычырды олар.

¹⁴ Пилат исе: – О не яманлыкъ япты? – деди. Амма олар даа бетер багъырып: – Оны хачкъа мыхлап къой! – дедилер.

¹⁵ Халкънынъ козюне кирмеге истеген Пилат оларнынъ огюне Бараббаны чыкъарып йиберди. Исаны исе къамчылап, хачкъа мыхламакъ ичюн аскерлерге берди.

Исаны масхара этелер

¹⁶ Аскерлер Исаны преториягъа алып бардылар ве анда бутюн арбий болюкни топладылар.

¹⁷ Исанынъ устюне мор тюслю урба кийдирдилер ве башына тикенден орюльген тадж кечирдилер.

¹⁸ Сонъ: – Яшасын еудийлернинъ Падишасы! – деп къычырдылар.

¹⁹ Таякъларнен Онынъ башына урып, бетине тюкюрип ве алдында тиз чёкип, седжде эттилер.

²⁰ Оны шойле масхара эткен сонъ, мор тюслю урбасыны чыкъарып, Озюнинъ урбаларыны кийдирдилер ве хачкъа мыхламакъ ичюн алып кеттилер.

Исаны хачкъа мыхлайлар

²¹ ‌Эскендер ве Руфуснынъ бабасы, киренели Симон адлы бир адам тарладан келип, шу ерден кечип кетеята эди. Бу адамны Исанынъ хачыны котерип бармагъа меджбур эттилер.

²² Исаны «Къафа Ери» манасыны анълаткъан, Голгофа деген ерге алып кельдилер.

²³ Онъа мюр къошулгъан шарап бердилер, лякин О ичмеди.

²⁴ Бундан сонъ Исаны хачкъа мыхлап астылар ве, джереп чекип, ким не аладжакъ деп, Онынъ урбаларыны пайлаштырдылар.

²⁵ Оны хачкъа мыхлап аскъанда, саба саат докъуз эди.

²⁶ Хачта: «Еудийлернинъ Падишасы» – деп, Онынъ къабаатыны косьтерген язы бар эди.

^27-28 Исанен берабер эки айдутны – бирисини Онынъ онъ тарафында, башкъасыны сол тарафында хачкъа мыхладылар.

²⁹ Кечип кетеяткъанлар башларыны саллап, Исагъа куфюр сёзлер айта эдилер: – Эй, Сен, Алланынъ Сарайыны йыкъкъан ве учь кунь ичинде къургъан адам! – дедилер.

³⁰ – Озюнъни къуртарса, хачтан тюшсе!

³¹ Баш руханийлер ве Къанун оджалары да, оларгъа къошулып, Оны мыскъыллай эдилер. Олар бир-бирине: – Башкъаларны къуртара эди, Озюни исе къуртарып оламай!

³² Бу Месих, Исраильнинъ Падишасы, хачтан тюшсюн. О вакъыт биз буны корип, инанырмыз! – дей эдилер. Исанен берабер хачларгъа мыхлангъанлар да Оны сёге эдилер.

Исанынъ олюми

³³ Уйле вакътындан саат учьке къадар бутюн дюньяны къаранлыкъ басты.

³⁴ Саат учьте Иса къатты сеснен: – Элои, Элои, лема савахтани? – деп къычырды. Бу сёзлернинъ терджимеси: «Аллам, Аллам! Сен не ичюн Мени къалдырып кеттинъ?» – демектир.

³⁵ О ерде тургъанларнынъ базылары, буны эшитип: – Бакъынъыз, О, Ильясны чагъыра, – дедилер.

³⁶ Бириси исе, чапып барып, сюнгерни экши шарапкъа батырып, таякъ уджуна илиштирди де, Исагъа узатты. Сонъ: – Токътанъыз, бакъайыкъ, Ильяс келип, Оны хачтан тюшюрир экенми? – деди.

³⁷ Амма Иса, даа бир кере къычырып, сонъки нефесини чыкъарды.

³⁸ Шу ань Алланынъ Сарайындаки перде тёпеден ашагъадже йыртылып, экиге болюнди.

³⁹ Исанынъ къаршысында тургъан юзбашы, Онынъ джан бергенини корип: – Акъикъатен бу Адам – Алланынъ Огълу экен! – деди.

⁴⁰ О ерде узакътан бакъып тургъан къадынлар бар эди. Олар арасында магдалалы Мерьем, кучюк Якъупнен Йосенинъ анасы Мерьем ве Саломе бар эдилер.

⁴¹ Иса Галилеяда олгъанда, олар Онъа хызмет этип, пешинден юре эдилер. О ерде Исанен Ерусалимге кельген башкъа къадынлар да бар эди.

Исанынъ дефн этилюви

⁴² Энди акъшам олгъан эди. Бу – азырланув куню, яни раатлыкъ кунюнинъ арфеси эди.

⁴³ Шуранынъ итибарлы азасы, Алла Падишалыгъыны беклеген ариматеялы Юсуф, бутюн джесюрлигини топлап, Пилатнынъ огюне барды ве Исанынъ джеседини сорады.

⁴⁴ Пилат Исанынъ бойле тез ольгенине шашты. Юзбашыны чагъырып: – О, чокътан ольдими? – деп сорады.

⁴⁵ Юзбашыдан джевап алгъан сонъ, джесетни Юсуфкъа берди.

⁴⁶ Юсуф кетен без сатын алды, Исаны хачтан тюшюрип, безнен Онынъ тенини сарды. Сонъ Исаны къаяда оюлгъан къабирде дефн этти, бир ташны юварлатып кетирип, къабирнинъ агъзыны къапатты.

⁴⁷ Магдалалы Мерьем ве Йосенинъ анасы Мерьем Исанынъ дефн этильген ерини корьдилер.