Лука 4 - Мукъаддес Китап

Исаны сахрада Шейтан сынай

¹ Иса Мукъаддес Рухкъа толып, Иордан озенинден къайтты. Рух Оны сахрагъа алып кетти.

² Анда Шейтан Исаны къыркъ кунь девамында сынавдан кечирди. О куньлерде Иса бир шей ашамай эди ве сонъунда пек ач олды.

³ Шейтан Онъа: – Эгер Сен Алланынъ Огълу олсанъ, мына бу ташкъа айт, отьмек олсун, – деди.

⁴ Иса онъа джевап берип: – Алланынъ Китабында язылгъан ки, яшамакъ ичюн адамгъа ялынъыз аш ашамакъ етерли дегиль.

⁵ Сонъ Шейтан Исаны юксек бир ерге чыкъарып, бир ань ичинде Онъа дюньянынъ эписи падишалыкъларыны косьтерди.

⁶ Шейтан Исагъа: – Мен бу падишалыкъларны, оларнынъ бутюн къудретинен ве шан-шуретинен берабер Санъа берерим. Олар эписи манъа берильгенлер, ве мен оларны истегениме береджем.

⁷ Шунынъ ичюн, Сен манъа бель буксенъ, эписи Сенинъки оладжакъ, – деди.

⁸ Иса онъа джевап берип: – Алланынъ Китабында бойле язылгъан: Раббинъе Алланъа белинъни бук, тек Онъа ибадет эт, – деди.

⁹ Сонъ Шейтан Оны Ерусалимге алып кельди ве Алла Сарайынынъ тёпесине турсатып: – Эгер Сен Алланынъ Огълу олсанъ, Озюнъни бу ерден ашагъа ташла.

¹⁰ Алланынъ Китабында язылгъан ки, О, Сени къорчаламагъа Озь мелеклерине эмир этер,

¹¹ олар Сени къолларында котерип кетерлер, аякъларынъ ташкъа сюрюнмез.

¹² Иса онъа: – Бойле деп язылгъан: Раббинъни, сенинъ Алланъны сынама, – деди.

¹³ Шейтан, Исаны сынамагъа битирип, вакътынджа Оны къалдырып кетти.

Иса Галилеяда хызмет этмеге башлай

¹⁴ Иса Мукъаддес Рухнынъ къудретинен Галилеягъа къайтып кельди. Онынъ акъкъында хабер бутюн этрафларда даркъалды.

¹⁵ Иса оларнынъ синагогаларында адамларны окъута, ве эписи адамлар Оны шуретлей эди.

Исаны Назаретте ред этелер

¹⁶ ‌Бир кунь Иса Назарет шеэрине кельди. О, анда осип-буюген эди. Эр вакъыт япкъаны киби, раатлыкъ куню синагогагъа барды. Алланынъ Китабыны окъумакъ ичюн тургъанда,

¹⁷ Онъа Ешая пейгъамбернинъ китабыны бердилер. Иса китапны ачып:

^18-19 – Устюмде Раббининъ Руху булуна; О, мени ягънен сюртип, алчакъгонъюллилерге хайырлы хабер бермеге, эсирлерге – азатлыкъ, сокъурларгъа – козьлери ачылгъаны акъкъында айтмагъа, азап чеккенлерни къуртармагъа, Раббининъ разылыкъ йылы кельгенини беян этмеге ёллады, – деп язылгъан ерини тапып окъуды.

²⁰ Сонъ Иса, китапны къапатып, хызметчиге берди ве ерине отурды. Синагогадакилер эписи Онъа дикъкъатнен бакътылар.

²¹ Иса оларгъа: – Язылгъан сёзлер сиз Мени динълеген вакъытта, бугунь беджерильди, – деди.

²² Эписи Онынъ акъкъында яхшы шейлер айта эдилер, Онынъ агъзындан чыкъкъан хайырлы сёзлерге шаша эдилер. Лякин бир-биринден: – Я О, Юсуфнынъ огълу дегильми? – деп сорай эдилер.

²³ Иса оларгъа: – Сиз эльбетте Манъа: «Эй, эким, озюнъни озюнъ тедавийле», деген ибарени айтаджакъсыз. «Биз Къафарнаумда олгъан шейлерни эшиттик. Энди буны Озь ветанынъда да яп», дейджексиз, – деди.

²⁴ Сонъ Иса девам этти: – Сизге догърусыны айтам: озь ветанында къабул этильген пейгъамбер ёкъ.

²⁵ Керчектен, сизге айтам: Ильяснынъ девринде, учь бучукъ йыл ягъмур ягъмагъанда ве бутюн ерлерде буюк ачлыкъ олгъанда, Исраильде чокъ тул къадынлар бар эди.

²⁶ Амма Ильяс оларнынъ ич бирисине ёлланылмагъан, тек Сидон янындаки Царефат шеэринде яшагъан бир тул къадынгъа ёлланылгъан эди.

²⁷ Эль-Яса пейгъамбернинъ девринде Исраильде лепра хасталыгъына огърагъанлар чокъ эди. Амма олардан ич бириси эляллап тедавийленмеген эди, тек бир суриели Нааман тедавийленген эди.

²⁸ Бу сёзлерни эшитип, синагогадакилер эписи ачувландылар.

²⁹ Олар атылып турдылар ве Исаны шеэрден чыкъарып, Назарет ерлешкен дагънынъ тёпесине кетирдилер. Оны къаядан ашагъа атмагъа истедилер.

³⁰ Лякин Иса оларнынъ арасындан кечип, о ерни къалдырды.

Иса арам рухны къувалай

³¹ ‌Иса Галилеядаки Къафарнаум шеэрине кельди. Раатлыкъ куньлери адамларны огрете эди.

³² Эписи Исанынъ огретювине шаша, чюнки О, къудретнен айта эди.

³³ Синагогада, ичинде арам рух олгъан бир адам бар эди. О, кучьлю сеснен багъырып:

³⁴ – Эй, назаретли Иса, Санъа бизден не керек? Сен бизни гъайып этмеге кельдинъми? Мен Сенинъ ким олгъанынъны билем. Сен Алланынъ Азизисинъ!

³⁵ Иса джинге шойле эмир этип: – Сус да, бу адамдан чыкъ! – деди. Джин адамны эписининъ огюнде йыкътырды ве онъа ич бир зарар кетирмейип, ичинден чыкъты.

³⁶ Эписи шашып къалдылар ве бир-бирине: – Бу насыл шей? Онынъ о къадар укюми ве къудрети бар ки, О, арам рухларгъа биле буюра, олар исе чыкъалар, – дедилер.

³⁷ Онынъ акъкъында хабер бутюн этрафларгъа даркъалды.

Иса Пётрнынъ къайнанасыны тедавийлей

³⁸ ‌Иса синагогадан чыкъып, Симоннынъ эвине кетти. Симоннынъ къайнанасы юксек сыджакънен хаста ята эди. Онъа ярдым этсин деп, Исагъа риджа эттилер.

³⁹ Иса къадыннынъ янына барып, эгильди ве хасталыкъкъа токътамагъа буюрды, ве хасталыкъ шу ань къадынны къалдырды. Къадын бирден турып, оларгъа софраны донатты.

⁴⁰ Кунь баткъанда, адамлар Исанынъ алдына чешит тюрлю хасталыкъларнен къыйналгъан сой-сопларыны алып кельдилер. О, эр бир хастагъа къолларыны къойып, оларны тедавийледи.

⁴¹ Чокъ адамнынъ ичинден джинлер чыкъып: «Сен Алланынъ Огълусынъ!» – деп къычыра эдилер. Иса оларны сусмагъа меджбур этти, буны айтмагъа ясакъ этти. Олар исе, О, Месих олгъаныны биле эдилер.

Иса синагогаларда огрете

⁴² ‌Танъ аткъанда, Иса шеэрден чыкъып, адам олмагъан ерге кетти. Халкъ исе Оны къыдырып башлады. Оны тапып, меджбур этип къалдырмагъа тырыштылар.

⁴³ Амма Иса оларгъа: – Мен Алланынъ Падишалыгъы акъкъында Къуванчлы Хаберни башкъа шеэрлерде де даркъатмакъ керегим. Мен шунынъ ичюн ёлланылгъаным, – деди.

⁴⁴ Бойледже, О, Еудиенинъ синагогаларында адамларны огретмеге девам этти.