Лука 23 - Мукъаддес Китап

Иса Пилатнынъ огюнде

¹ ‌Оларнынъ эписи турып, Исаны Пилатнынъ алдына алып кеттилер.

² Оны къабаатламагъа башлап: – Бу Адам халкъымызны ёлдан ура. Озюни Месих Падиша деп, императоргъа салым тёлемекке кедер эте, – дедилер.

³ Пилат Исадан: – Еудийлернинъ Падишасы Сен оласынъмы? – деп сорады. Иса онъа джевап берип: – Буны сен озюнъ айтасынъ, – деди.

⁴ Пилат баш руханийлерге ве халкъкъа: – Мен бу адамда ич бир къабаат тапмайым, – деди.

⁵ Лякин олар айткъанында къатты турып: – Галилеядан башлап бу ергедже, бутюн Еудиеде озь огретювини даркъатып, О, халкъны баштан чыкъара, – дедилер.

Исаны Иродгъа ёллайлар

⁶ Буны эшитип, Пилат: – Бу адам Галилеяданмы? – деп сорады.

⁷ Исанынъ Иродгъа бойсунгъан виляеттен олгъаныны билип, Оны шу куньлерде Ерусалимде олгъан Иродгъа ёллады.

⁸ Ирод Исаны корип пек къуванды. О, Иса акъкъында баягъы хаберлер эшитип, чокътан берли Оны корьмеге истей ве О япкъан бирде-бир аджайип шейни озь козюнен корьмеге умют эте эди.

⁹ Ирод Исагъа бир чокъ суаль берди, амма Иса бирине де джевап къайтармады.

¹⁰ Этрафында тургъан баш руханийлер ве Къанун оджалары исе Онынъ устюне къабаатлар ягъдыра эдилер.

¹¹ Ирод аскерлеринен берабер Исаны ашалап масхара этти, Онъа ачыкъ тюсте паалы урбалар кийдирип, Пилатнынъ алдына къайтарып йиберди.

¹² Бу адиседен эвель бир-бирине душманлыкъта олгъан Ирод ве Пилат шу куньден башлап дост олдылар.

Исаны хачкъа мыхламакъ ичюн берелер

¹³ Пилат баш руханийлерни, башлыкъларны ве халкъны бир ерге чагъырып,

¹⁴ оларгъа: – Сиз бу адамны манъа: «Халкъны баштан чыкъара», – деп кетирдинъиз. Амма мен Ондан козьлеринъиз огюнде эр шейни сорадым ве сиз Онъа юклеген къабаатлардан бирисини биле тапмадым, – деди.

¹⁵ – Ирод да ич бир къабаат тапмагъаны ичюн, Оны бизге къайтарып ёллады. Бойлеликнен, бу адам олюм джезасына ляйыкъ ич бир шей япмагъан.

^16-17 Мен Оны бир джезалап, бошатып йибереджем, – деди.

¹⁸ Халкъ исе бир агъыздан: – Буны гъайып эт! Бизге Бараббаны чыкъарып йибер! – деп къычырды.

¹⁹ Барабба исе шеэрде исьян котергени ве адам ольдюргени ичюн зиндангъа атылгъан эди.

²⁰ Пилат Исаны бошатмакъ истеп, лафыны девам этеджек олды,

²¹ амма топлангъанлар эп: – Оны хачкъа мыхлап къой! Хачкъа! – деп къычырдылар.

²² Пилат учюнджи кере оларгъа: – О не яманлыкъ япты? Мен Онда олюмге ляйыкъ ич бир къабаат тапамайым. Мен Оны бир джезалап, бошатып йибереджем, – деди.

²³ Лякин олар бар сеслеринен къычырып, Исаны хачкъа мыхланмасыны талап эттилер. Ахыр-сонъу халкънынъ ве баш руханийлернинъ къычыргъанлары устюн чыкъты,

²⁴ ве Пилат оларнынъ талабыны ерине кетирмеге къарар чыкъарды.

²⁵ Олар сорап тургъан, адам ольдюргени ичюн зиндангъа атылгъан исьянджыны азатлыкъкъа чыкъарды, Исаны исе оларнынъ элине берди.

Исаны хачкъа мыхлайлар

²⁶ Исаны алып кетеяткъанларда, тарладан келеяткъан Симон адлы киренели бир адамны туттылар, онъа Исанынъ хачыны юкледилер, Исанынъ артындан бармагъа меджбур эттилер.

²⁷ Исанынъ артындан пек чокъ адам кетмекте эдилер. Чокъ къадын Онынъ ичюн кокюслерине урып, агъламакъта эдилер.

²⁸ Иса оларгъа айланып: – Эй, Ерусалим къызлары! Меним огърумда агъламанъыз. Озюнъиз ве балаларынъыз огърунда агъланъыз.

²⁹ Мына ойле куньлер келеята ки: «Не де бахтлыдыр ич догъурмагъан, къысыр ве бала эмиздирмеген къадынлар», – дейджеклер.

³⁰ О вакъыт дагъларгъа: «Устьлеримизге тюшюнъиз!» ве байырларгъа: «Бизни къапатынъыз!» – дейджеклер.

³¹ Шуны ем-ешиль терекке япсалар, къуругъан терекке не япар экенлер? – деди.

³² Исанен бирликте олюмге эки айдутны да алып кете эдилер.

³³ Къафа деген ерге кельген сонъ, Исаны ве Онен бирликте эки джинаетчини, бирисини Онынъ онъ тарафында, башкъасыны сол тарафында хачларгъа мыхлап астылар.

³⁴ Иса: – Баба! Оларны багъышла. Не япкъанларыны озьлери де бильмейлер, – деди. Аскерлер джереп чекип, Исанынъ урбаларыны озьара пайлаштылар.

³⁵ Халкъ исе анда турып сейир эте эди. Башлыкълар Исаны мыскъыллап: – Башкъаларыны къуртара эди де, барсын энди, эгер О, акъикъатен Алла сайлагъан Месих олса, Озюни къуртарсын! – деп куле эдилер.

³⁶ Онынъ устюнден аскерлер де къылына эдилер. Исанынъ янына келип, Онъа экши ичимлик берип:

³⁷ – Еудийлернинъ Падишасы олсанъ, Озюнъни къуртарса! – дей эдилер.

³⁸ Исанынъ башы устюне: «Бу – еудийлернинъ Падишасы» деген язы бар эди.

³⁹ Хачкъа асылып тургъан джинаетчилерден бириси Иса акъкъында куфюр сёзлер айтып: – Сен Месих дегильсинъми? Озюнъни де, бизни де къуртар! – деди.

⁴⁰ Экинджиси исе оны токътатып: – Сен Алладан къоркъмайсынъмы? Сен озюнъ О киби хачкъа мыхлангъансынъ, – деди.

⁴¹ – Биз япкъан ишлеримиз ичюн укюм этильдик ве акъкъымызны аламыз. Амма бу адам ич бир ярамазлыкъ япмагъан.

⁴² Сонъ о: – Иса! Озь Падишалыгъынъа киргенде, мени унутма! – деди.

⁴³ Иса онъа джевап берип: – Санъа догърусыны айтам: сен даа бугунь Меннен берабер дженнет багъчасында оладжакъсынъ, – деди.

Исанынъ олюми

⁴⁴ ‌Бу вакъиа саат он экилерде олды. Сонъ саат учьке къадар бутюн дюньяны къаранлыкъ басты,

⁴⁵ ве кунеш къарарды. Алла Сарайынынъ Энъ Мукъаддес Одасында перде тёпеден ашагъадже экиге болюнип йыртылды.

⁴⁶ Иса къатты сеснен къычырып: – Бабам! Рухумны Сенинъ къолунъа берем! – деди. Бу сёзлернен джан берди.

⁴⁷ Буны корьген юзбашы: – Акъикъатен, бу адам къабаатсыз экен! – деп, Алланы шерефледи.

⁴⁸ Сейир этмек ичюн топланып кельген бутюн халкъ олгъан шейни корип, кокрегине ура-ура эвлерине къайтты.

⁴⁹ Исаны бильгенлер ве Галилеядан Онынъ пешинден кельген къадынлар узакъта турып, бакъмакъта эдилер.

Исанынъ дефн этилюви

⁵⁰ Еудий Шуранынъ азасы Юсуф яхшы ве инсафлы бир адам олып,

⁵¹ еудийлернинъ Ариматея шеэринде яшап, Алланынъ Падишалыгъыны умютнен беклей эди. О, Шуранынъ къарарындан ве ишинден разы олмай эди.

⁵² Юсуф Пилаткъа барып, Исанынъ тенини истеди.

⁵³ Оны хачтан тюшюрип, кетен безге сарды ве къая ичинде оюлгъан, даа ич кимсе дефн этильмеген къабирге яткъызды.

⁵⁴ О кунь джума кунюнинъ акъшамы эди, еудийлернинъ раатлыкъ кунюнинъ башланмасына аз вакъыт къалгъан эди.

⁵⁵ Исанен бирликте Галилеядан кельген къадынлар Юсуфнынъ артындан кетип, къабирни ве Исаны дефн этильгенини корьдилер.

⁵⁶ ‌Эвлерине къайтып, дефн ичюн къокъулы ягъларнен мюр азырладылар. Амма раатлыкъ куню олар Къанунгъа бойсунып, бир иш япмадылар.