Лука 22 - Мукъаддес Китап

Баш руханийлернинъ гизли ниетлери

¹ ‌Песах денильген Маясыз Пишкен Пите Байрамы якъынлаша эди.

² Баш руханийлернен Къанун оджалары халкътан къоркъып, Исаны ольдюрмеге имкян къыдыра эдилер.

³ О вакъыт он экиден бириси олгъан, Искариот деп адландырылгъан Иуданынъ ичине Шейтан кирди.

⁴ Иуда барып, баш руханийлернен ве Сарай къаравулларынынъ башлыкъларынен Исаны насыл этип якъаламакъ акъкъында анълашты.

⁵ Олар севинип, Иудагъа пара бермек къарарына кельдилер.

⁶ Иуда бунъа разы олды. Халкъ олмагъанда, оларгъа Исаны сатмакъ ичюн келишкен вакъыт къыдыра башлады.

Песах ашына азырланув

⁷ ‌Маясыз Пишкен Пите Байрамынынъ куню кельди. Онда адамлар Песах къозусыны къурбан чала эдилер.

⁸ Иса Пётрнен Юханны ёллап: – Барынъыз да, бизге Песах ашыны азырланъыз, – деди.

⁹ Олар Исадан: – Ашны къайда азырлайджагъымызны истейсинъ? – деп сорадылар.

¹⁰ Иса оларгъа: – Шеэрге киргенинъизде, сизге бир бардакъ сув котерип кеткен адам расткеледжек, – деди. – Онынъ пешинден барып, о кирген эвге киринъиз

¹¹ ве эв саибине шойле денъиз: «Оджа сенден: “Шегиртлеримнен Песах ашыны ашайджакъ одамыз къайда?” – деп сорай».

¹² О адам сизлерге юкъары къатта, энди эр шейи азырлангъан, бир балабан оданы косьтерир. Анда керек шейлерни азырланъыз, – деди.

¹³ Шегиртлер барып, эр шейни Иса айткъаны киби таптылар ве Песах ашыны азырладылар.

Иса шегиртлеринен берабер Песах ашыны ашай

¹⁴ Вакъты-саати кельгенде, Иса он эки эльчинен берабер софра этрафында ер алды

¹⁵ ве оларгъа: – Сизнен бу Песах ашыны ашамакъны азап чекмезден эвель пек арзу эттим.

¹⁶ Сизлерге айтам: Алланынъ Падишалыгъында Песах олмагъандже, бу ашны ашап оламайджам, – деди.

¹⁷ Къадени элине алып, шукюр этти ве: – Буны алынъыз да, озьара пайлашынъыз.

¹⁸ Сизлерге айтам: Алланынъ Падишалыгъы кельмегендже, Мен бу вакъыттан башлап, юзюм мейвасынынъ ичимлигини ичмейджем, – деди.

¹⁹ Сонъ отьмекни алды, шукюр этип парчалады, шегиртлерине берип: – Бу сиз ичюн берильген Меним тенимдир. Мени анъмакъ ичюн буны япынъыз, – деди.

²⁰ Аштан сонъ оларгъа къадени узатып, шойле деди: – Бу къаде – сиз ичюн тёкюлеяткъан къанымнен кучьке кирген янъы васиеттир.

²¹ Амма бакъынъыз! Мени саткъан адам Меннен берабер бир софрада отурмакъта.

²² Эбет, Инсан Огълунынъ кетеджеги эвельден тайин этильди. Лякин Оны саткъан адамнынъ алына беля!

²³ Эльчилер, олардан къайсы бири буны япаджакъ экени акъкъында бир-биринден сорап башладылар.

Ким буюкче?

²⁴ Шегиртлернинъ арасында, олардан къайсы энъ буюк олгъаны акъкъында бир тартышма чыкъты.

²⁵ Лякин Иса оларгъа: – Башкъа миллетлернинъ падишалары озь халкълары устюнде эфендилик этелер. Оларнынъ укюмдарлары «яхшылыкъ япкъанлар» деп адланалар.

²⁶ Сизде исе ойле олмасын! Аранъыздан ким буюк олса, озюни энъ кучюк киби тутсун. Ким башлыкъ олса, хызметчи киби олсун.

²⁷ Къайсы бири буюк? Софра башында ер алгъанмы я да хызмет этип тургъанмы? Софра башында ер алгъан дегильми? Мен исе аранъызда хызмет эткен киби олдым!

²⁸ Сынав кечкен вакъытларымда Меннен берабер сиз эдинъиз.

²⁹ Шу себептен, Падишалыкъта башлыкъ этмеге акъкъыны Бабам Манъа бергени киби, Мен бу акъны сизге берем.

³⁰ Сонъ Меним Падишалыгъымда софрада отурып ашап-ичерсиз, тахтларгъа отурып, Исраильнинъ он эки къабилесине укюм этеджексиз, – деди.

Иса Пётрнынъ ёлдан уруладжагъы акъкъында эвельден айта

³¹ ‌Иса: – Симон, Симон! Мына, Шейтан сизни сынамакъ ве ун киби электен кечирмек ичюн рухсет сорады.

³² Лякин Мен, имандан таймасын, деп сен ичюн ялвардым. Сен Манъа къайтып кельгенинъде, къардашларынънынъ иманыны къавийлештир, – деди.

³³ Симон Исагъа джевап берип: – Рабби! Мен Сеннен зиндангъа да, олюмге де бармагъа азырым! – деди.

³⁴ Иса онъа: – Санъа шуны айтам, Пётр: бугунь хораз къычырмаздан эвель, сен Менден учь кере вазгечеджексинъ, – деди.

Чувал, торба ве къылыч

³⁵ Иса шегиртлерине: – Мен сизни акъчасыз, торбасыз, аякъкъапсыз ёллагъанымда, бир шейде эксиклигинъиз олдымы? – деди. – Ич бир шейде олмады! – деп джевап берди олар.

³⁶ – Энди кимнинъ акъчасы олса, озюнен алсын. Кимнинъ торбасы олса, оны да алсын. Кимнинъ къылычы олмаса, урбасыны сатып, къылыч сатын алсын.

³⁷ Сизлерге айтам: «джинаетчилернен бир сайылды» язылгъан сёзлер Менде беджерильмек керек. Меним акъкъымда айтылгъан сёзлернинъ эписи ерине кельмек керек, – деди оларгъа Иса.

³⁸ Шегиртлер: – Рабби, мына бу ерде эки къылыч бар! – дедилер. – Етер! – деди Иса.

Зейтюн дагъында

³⁹ Эвден чыкъып, адети боюнджа Иса Зейтюн дагъына кетти. Шегиртлери де Онынъ артындан кеттилер.

⁴⁰ О ерге кельгенде, Иса оларгъа: – Сынавдан кечмек ичюн, дува окъунъыз, – деди.

⁴¹ Озю исе олардан бир таш атув месафесине четке барды да, тиз чёкип дува окъуп башлады:

⁴² – Баба! Эгер истесенъ, бу азаплар къадесини Менден ал! Амма Меним дегиль, Сенинъ истегинъ эда этильсин!

⁴³ Шу арада коктен бир мелек Исагъа корюнип, Онъа къувет бере башлады.

⁴⁴ Иса олюм азабында олып, даа буюк кучьнен дува окъуй башлады. Ондан чыкъкъан тер ерге тамгъан къан тамчыларына ошай эди.

⁴⁵ Дува окъугъан сонъ турып, Иса шегиртлерининъ янына кельди. Оларны къайгъыдан юкълап къалгъан алда корьди.

⁴⁶ Оларгъа: – Сиз не ичюн юкълайсыз? Къана турынъыз да, сынавдан кечмек ичюн, дува окъунъыз, – деди.

Исаны якъалайлар

⁴⁷ ‌Иса даа бу сёзлерни айткъанда, топлашып кельген адамлар пейда олдылар. Он экиден бири Иуда адлы адам, башкъаларнынъ огюне чыкъып, Исагъа якъынлашты да, Оны опьмеге ынтылды.

⁴⁸ Иса онъа: – Иуда, сен Инсан Огълуны опип сатасынъмы? – деди.

⁴⁹ Исанынъ янындаки шегиртлери не оладжагъыны анълап: – Рабби, къылычларнен урайыкъмы? – дедилер.

⁵⁰ Олардан бириси баш руханийнинъ къулуны урып, онынъ онъ къулагъыны кести.

⁵¹ О вакъыт Иса: – Етер, токътанъыз! – деди де, къулнынъ къулагъына къол тийдирип, оны тедавийледи.

⁵² Сонъ Оны алмагъа кельген баш руханийлерге, Сарай къаравулларынынъ башлыкъларына ве акъсакъалларгъа: – Сизлер айдут тутаджакъ киби, къылыч ве таякъларнен силяланып кельдинъиз!

⁵³ Мен эр кунь Алланынъ Сарайында сизинъ аранъызда олгъанымда, Манъа къол котермей эдинъиз. Амма шимди сизинъ вакътынъыз, къаранлыкънынъ укюми, – деди.

Пётр Исадан вазгече

⁵⁴ Олар Исаны якъалап, баш руханийнинъ эвине алып бардылар. Узакътан оларнынъ пешинден Пётр кетти.

⁵⁵ Азбарнынъ ортасында атеш якъып, этрафында адамлар отурмакъта эдилер. Пётр о адамларнынъ арасында отурды.

⁵⁶ Бир хызметчи къыз онынъ атеш янында отургъаныны корип, онъа тикилип бакъты да: – Онен берабер бу адам да эди! – деди.

⁵⁷ Пётр къадынгъа: – Эй, къадын, мен Оны танымайым! – деп инкяр этти.

⁵⁸ Бираздан сонъ башкъа бир адам Пётрны корип: – Сен де олардан бириси оласынъ! – деди. Пётр онъа да: – Адам, мен олардан бириси дегилим! – деди.

⁵⁹ Бир саат къадар кечкен сонъ, даа бириси: – Акъикъатта, Онен берабер бу адам да олгъан. О Галилеядан да, – деди ишанчнен.

⁶⁰ Пётр онъа да: – Акъай, сен не айткъанынъны бильмейим, – деди. О вакъыт, Пётр лафыны даа битирмегенде, хораз къычырды.

⁶¹ Рабби Иса айланып, Пётргъа бакъты. Шу ань Пётр Раббининъ онъа: «Бугунь хораз къычырмаздан эвель, сен учь кере Менден вазгечеджексинъ», – деген сёзлерини хатырлады.

⁶² Азбардан чыкъып, окюр-окюр агълай башлады.

⁶³ ‌Исаны тутып тургъан адамлар исе Оны мыскъыллап котеклей башладылар.

⁶⁴ Онынъ козьлерини багълап: – Пейгъамберлигинъни косьтер, бизге Сени ким ургъаныны айт! – дей эдилер.

⁶⁵ Онъа даа чокъ куфюр сёзлер айта эдилер.

Иса Юксек Шура алдында

⁶⁶ Сабадан халкънынъ акъсакъаллары ве баш руханийлернен Къанун оджалары топланып, Исаны озьлерининъ Юксек Шурасына алып бардылар.

⁶⁷ – Месих Сенсинъми? Бизлерге джевап бер! – дедилер. Иса оларгъа: – Сизлерге айтсам, инанмайджакъсынъыз.

⁶⁸ Суаль берсем, джевап бермейджексинъиз.

⁶⁹ Лякин бундан сонъ Инсан Огълу Къудретли Алланынъ онъ тарафында отураджакъ, – деди.

⁷⁰ О вакъыт эписи бирден: – Демек, Сен Алланынъ Огълусынъмы? – деп сорадылар. – Мен О экенимни озюнъиз айтасыз, – деди оларгъа Иса.

⁷¹ Олар исе: – Бизге даа насыл шаатлыкъ керек? Онынъ агъзындан озюмиз эшиттик! – дедилер.