Лука 17 - Мукъаддес Китап

Гуна акъкъында

¹ ‌Иса Озь шегиртлерине бойле деди: – Адамны гунагъа тюшюрген шейлер чокъ, олар эр вакъыт олур. Лякин бунъа себепчи олгъаннынъ алына беля!

² Бу кучюклерден бирисини ёлдан ургъанындан коре, онынъ бойнуна дегирмен ташыны асып, денъизге атылгъаны о ичюн яхшыджа олур эди.

³ Озьлеринъизге сакът олунъыз! Эгер къардашынъ гунагъа огъраса, оны тенбиеле. Эгер тёвбе этсе, оны багъышла.

⁴ Эгер санъа къаршы бир кунь ичинде еди кере гуна япса да, санъа еди кере къайтып келип: «Тёвбе эттим», – десе, оны багъышла.

Иман акъкъында

⁵ Эльчилер Раббиге: – Иманымызны къуветлештир, – дедилер.

⁶ Рабби джевап берип: – Эгер иманынъыз бир хардал урлугъы къадар олса, бу дут терегине: «Тамырынънен къопарылып чыкъ ве денъизге кочип тамыр ат», – десенъиз, терек сизге бойсуныр.

Къулгъа буюрылгъан ишлер

⁷ Биринъизнинъ чобанлыкъ япкъан я да ер сюрген хызметчинъиз тарладан къайткъанда, аранъызда къайсы онъа: «Тез келип, софрагъа отур», – дер?

⁸ Аксине: «Ашымны азырла, ишке бель багълап, аш ашагъанымдже манъа хызмет эт, ондан сонъ озюнъ ашап-ичерсинъ», – демезми?

⁹ Эфенди буюргъан ишлерни беджерген къулгъа тешеккюр этерми?

¹⁰ Сиз де бунъа ошап, буюрулгъан эр бир ишни беджергенден сонъ: «Биз макътавгъа ляйыкъ олмагъан къуллармыз, япаджагъымызны яптыкъ», – денъиз, – деди.

Иса лепрагъа огърагъан он адамны тедавийлей

¹¹ Иса Самарие ве Галилеянынъ сынъырлары бою кечип, Ерусалимге ёл алды.

¹² Бир койге киреяткъанда, лепра хасталыгъына огърагъан он адамны расткетирди. Олар узакъта токътап,

¹³ кучьлю сеснен къычырдылар: – Эй, саибимиз Иса, бизге мерамет эт! – дедилер.

¹⁴ Оларны корьген Иса: – Барып, озьлеринъизни руханийлерге косьтеринъиз, – деди. Олар даа ёлда олгъанда, лепрадан темиз олдылар.

¹⁵ Олардан бириси, озюнинъ тедавийленгенини корип, кучьлю сеснен Алланы шерефлеп артына къайтты.

¹⁶ Исанынъ аякъларына йыкъылып, Онъа тешеккюр бильдирди. Бу адам самариели эди.

¹⁷ Иса: – Темиз олгъанлар он адам эди де? Къалгъан докъузы къайда?

¹⁸ Алланы шерефлемек ичюн бу ябанджы адамдан башкъа ич кимсе къайтып кельмедими? – деди.

¹⁹ Сонъ о адамгъа: – Еринъден тур да кет, сени иманынъ къуртарды, – деди.

Алланынъ Падишалыгъы акъкъында

²⁰ ‌Фериселер Исагъа: – Алланынъ Падишалыгъы не вакъыт келеджек? – деген суальни бердилер. Иса оларгъа джевап берип: – Алланынъ Падишалыгъы козьге корюнип кельмейджек.

²¹ «Бакъ, о бу ерде» я да «Ана о ерде», – деп оламазлар. Бакъынъыз, Алланынъ Падишалыгъы сизинъ аранъыздадыр, – деди.

²² Сонъ Иса шегиртлерине айланып: – Ойле куньлер келеджек ки, Инсан Огълунынъ бир кунюни корьмеге авес этерсиз, амма корип оламазсыз, – деди.

²³ – Сизге: «Мына, О бу ерде» я да «Мына шу ерде», – деселер, барманъыз, оларнынъ артындан чапманъыз.

²⁴ Йылдырым кокни бир уджундан о бир уджуна къадар ярыкълаткъан киби, Инсан Огълу да Озь кунюнде ойле пейда оладжакъ.

²⁵ Лякин ондан эвель О чокъ азап чекип, бу несиль тарафындан ред этильмек керек.

²⁶ Нух куньлеринде насыл олгъан олса, Инсан Огълу келеджек куньлеринде де ойле оладжакъ.

²⁷ Нух сандыкъкъа кирмегендже, адамлар ашап-иче, эвлене, акъайгъа чыкъа эдилер. Сонъ сув ташкъыны келип, эписини гъайып этти.

²⁸ Лутнынъ куньлеринде де ойле олды: адамлар ашап-иче, алыш-вериш япа, сача ве къуруджылыкънен мешгъуль ола эдилер.

²⁹ Лякин Лут Содом шеэринден чыкъкъан куню коктен атеш ве кукюрт ягъып, эписини гъайып этти.

³⁰ Инсан Огълу Озюни косьтереджек кунюнде де тамам ойле оладжакъ.

³¹ О куню дам устюнде олгъан адам эвинде къалдырылгъан шейлерни алмакъ ичюн ашагъа тюшмесин. Тарлада олгъан адам къайтып кельмесин.

³² Лутнынъ апайыны акъылынъызда тутунъыз.

³³ Ким озь джаныны къуртармагъа истесе, оны джояр. Ким озь джаныны гъайып этсе, оны къуртарыр.

³⁴ Сизлерге айтам: шу геджеси бир тёшекте олгъан эки адамдан Алла бирисини аладжакъ, бирисини къалдыраджакъ.

^35-36 Ун чеккен эки къадындан бириси алынаджакъ, экинджиси къалдырыладжакъ.

³⁷ Шегиртлер Исадан: – Рабби, бу вакъиалар къайда оладжакъ? – деп сорадылар. – Олю беден къайда олса, леш къарталлары да анда топлашаджакълар, – деди Иса.