Лука 14 - Мукъаддес Китап

Иса сув хасталыгъынен чекишкен адамны тедавийлей

¹ Бир раатлыкъ куню Иса ферисе башлыкъларындан бирининъ эвине ашамагъа кельди. Анда адамлар Онынъ артындан дикъкъатнен бакъа эди.

² Исанынъ къаршысында сув хасталыгъынен чекишкен бир адам отурды.

³ Иса Къанун оджаларына ве фериселерге мураджаат этип: – Къанунгъа коре раатлыкъ куню тедавийлемек мумкюнми, я да мумкюн дегильми? – деп сорады.

⁴ Олар индемедилер. Иса хастагъа тийип, оны тедавийледи де, йиберди.

⁵ Сонъ Къанун оджаларына: – Сизден биринъизнинъ огълу я да огюзи къуюгъа тюшип кетсе, раатлыкъ куню олгъанына бакъмайып, оны шу ань чыкъарып алмаз эдинъизми? – деди.

⁶ Олар бунъа ич бир джевап тапып оламадылар.

Алчакъгонъюллик ве мусафирсеверлик акъкъында

⁷ Мусафирлер энъ сайгъылы ерлерде отурмагъа тырышкъаныны корьген Иса оларгъа кинаели икяе айтты:

⁸ – Эгер сени тойгъа чагъырсалар, сайгъылы ер алма, чюнки мусафирлер арасында сенден урьметли адам олмакъ мумкюн.

⁹ О вакъыт экинъизни чагъыргъан эв саиби келип, санъа: «Бу ерни онъа бошатып бер», – дер. Сен исе утана-утана, энъ арттаки ерге кечмеге меджбур оладжанъ.

¹⁰ Аксине, давет олунгъан сонъ, барып ашагъыдаки ерге ерлеш. О вакъыт сени чагъыргъан адам келип, санъа: «Достум, мында, тёрге чыкъ», – дер. Сонъ башкъа мусафирлернинъ козюнде сенинъ урьметинъ артаджакъ.

¹¹ Эр бир озюни юксельткен адам алчакълатыладжакъ. Озюни алчакълаткъан исе юксельтиледжек.

¹² Сонъ Иса Оны чагъыргъан ферисеге: – Уйлелик я да акъшамлыкъ япкъанда, достларынъны, агъа-къардашларынъны, сой-сопларынъны ве зенгин къомшуларынъны давет этме. Чюнки сонъ олар да сени чагъырып къаршылыгъынъны берерлер, ве о, санъа мукяфат олур.

¹³ Аксине, байрам япкъанда, фукъаре, сакъат, топал ве кёрларны чагъыр.

¹⁴ О вакъыт сен бахтлы олурсынъ, чюнки олар санъа яхшылыкъ къайтарып оламазлар. Инсафлы адамлар тирильгенде исе, санъа яхшылыкъ къайтаджакъ, – деди.

Акъшам ашына чагъырылгъанлар акъкъында кинаели икяе

¹⁵ ‌Мусафирлерден бириси буны эшитип, Исагъа: – Алланынъ Падишалыгъында ашап-ичеджек адам бахтлыдыр! – деди.

¹⁶ Иса исе онъа бойле деди: – Бир адам буюк акъшам ашы берип, чокъ мусафир чагъыргъан.

¹⁷ Акъшам ашыны ашамагъа вакъыт кельгенде: «Буюрынъыз, эр шей азыр», – деп, чагъырылгъан адамларны давет этмек ичюн къулуны ёллай.

¹⁸ Амма эписи бири-бири артындан афу сорап башлайлар. Биринджиси: «Мен тарла сатын алдым, оны барып бакъмакъ керегим. Риджа этем, мени багъышла», – дей.

¹⁹ Экинджиси: «Мен беш чифт огюз сатын алдым, яхшы экенлерми, деп, оларны сынамакъ керегим. Риджа этем, мени багъышла», – дей.

²⁰ Учюнджиси: «Мен эвлендим, шунынъ ичюн келялмайджам», – дей.

²¹ Къул къайтып келип, эфендисине буларны айта. Эв саиби ачувланып, къулуна: «Тез ол, шеэрнинъ сокъакъ ве сокъачыкъларына бар да, фукъаре, сакъат, кёр ве топалларны бу ерге алып кель», – дей.

²² Къул барып келип: «Эфендим, буюргъанынъны беджердим, амма даа бош ерлер бар», – дей.

²³ О вакъыт эфенди къулуна: «Ёллар ве ёлчыкълар бою кечип, эписини мында кельсинлер, деп къандыр. Эвим толсун, – дей.

²⁴ – Сизге айтам: башта чагъырылгъан адамлардан ич бириси меним акъшамлыкъ ашымны ашамайджакъ!»

Исанынъ артындан юрмекнинъ фияты

²⁵ Исанен берабер чокътан-чокъ адам юре эди. О оларгъа таба чевирилип:

²⁶ – Эгер Манъа кельген адам озюнинъ ана-бабасыны, апайыны, бала-чагъасыны, агъа-къардашыны, тата-къызкъардашыны ве озь джаныны биле кореджек козю олмаса, о, Меним шегиртим оламаз.

²⁷ Ким озь хачыны котерип артымдан юрмесе, Меним шегиртим оламаз.

²⁸ Сизден биринъиз къулле къурмагъа истесе, оны битирмек ичюн пара етерми, деп башта отурып чекеджек масрафларыны саймазмы?

²⁹ Ойле олмаса, темельни къойып, ишни битирмек къолундан кельмесе, буны корьген эписи адамлар:

³⁰ «Бу адам къуруджылыкъны башлады да, битирип оламады», – деп масхара этеджеклер.

³¹ Бир падиша башкъа падишагъа къаршы дженк этмеге азырланса, он бинъ аскеримнен манъа къаршы кельген падишанынъ йигирми бинъ аскеринен дженклешмеге кучюм етер экенми, деп башта отурып тюшюнмек керек.

³² Кучю етмесе, душман даа узакъ олгъанда, онынъ алдына эльчилерни ёллап барышыкъ сорар.

³³ Шойле де, сизден ич биринъиз озюнинъ бутюн барлыгъыны къалдырмагъандже, Меним шегиртим оламаз.

Ярамай туз

³⁴ Туз – яхшы шей. Амма туз тузлугъыны джойса, онынъ леззетини насыл къайтармакъ мумкюн?

³⁵ Бойле тузны не топракъкъа, не кубреге къошмагъа ярашмай. Оны алып аталар. Къулагъы барлар буны эшитсинлер! – деди.