Лука 13 - Мукъаддес Китап

Тёвбе этмесенъиз, оледжексиз

¹ О вакъыт бир къач адам Исагъа келип, галилеялылар акъкъында айттылар. Къурбан чалгъан вакъытта бу галилеялыларны Пилат ольдюрген ве бойле этип, къурбанларнынъ къаныны оларнынъ къанынен къарыштыргъан эди.

² Иса адамларгъа джевап берип: – Сиз, эписи башкъа галилеялылардан бу адамлар гуналы олгъаны ичюн оларнен бойле шей олды, деп тюшюнесизми?

³ Ёкъ! Лякин тёвбе этмесенъиз, эпинъиз олар киби гъайып олурсыз.

⁴ Я анавы он секиз адамнынъ устюне Силоам шеэриндеки къулле йыкъылып, ольдюргени? Сиз оларны Ерусалимде яшагъан эписи адамлардан даа къабаатлы деп тюшюнесизми?

⁵ Сизге ёкъ дейим. Лякин тёвбе этмесенъиз, эпинъиз олар киби гъайып олурсыз, – деди.

Мейвасыз инджир тереги акъкъында кинаели икяе

⁶ Иса бойле бир кинаели икяени айтты: – Бир адамнынъ юзюм багъында инджир тереги сачылгъан экен. О адам анда барып, терекнинъ устюнде мейва къыдыра, лякин тапалмай.

⁷ Сонъ юзюмджиге: «Мен учь йыл девамында мында келип, бу инджирнинъ устюнде мейва къыдырам, лякин оны тапмайым. Оны кесип ташла, топракънынъ кучюни не ичюн алсын?» – дей.

⁸ Юзюмджи исе онъа джевап берип: «Эфенди, оны даа бир йылгъа къалдырса. Мен онынъ чевре-четини къазып, топракъны кубрелерим,

⁹ бельки келеджек йылгъа мейва берип башлар. Эгер бермесе, кесип ташларсынъ», – дей.

Иса дёрт букюльген къадынны раатлыкъ кунюнде тедавийлей

¹⁰ Раатлыкъ куню Иса бир синагогада адамларны огрете эди.

¹¹ О ердеки бир къадын он секиз йыл девамында арам рухтан къыйналып хасталангъан, дёрт букюльген, белини догъуртып оламай экен.

¹² Иса оны корьгенинен, янына чагъырып: – Сен хасталыгъынъдан къуртарылдынъ, – деди.

¹³ Сонъ къолларыны къадыннынъ башына къойды. Къадын бирден догърулып, Аллагъа шукюр этти.

¹⁴ Исанынъ раатлыкъ куню къадынны тедавийлегенине ачувланып, синагоганынъ башлыгъы халкъкъа: – Иш ичюн алты кунь бар. Тедавийленмеге раатлыкъ куню дегиль, шу куньлери келинъиз, – деди.

¹⁵ Рабби исе онъа джевап берип: – Эй, экиюзьлюлер! Раатлыкъ куню олгъанына бакъмайып, эр биринъиз огюзинъизни я да эшегинъизни ашлавдан чезип сувармагъа алып бармаймы?

¹⁶ Я бу къадын Ибраимнинъ къызы. Шейтан оны он секиз йыл девамында багълап туткъан. Аджеба онынъ багъларыны раатлыкъ кунюнде чезмек мумкюн дегильми? – деди.

¹⁷ Исанынъ бу сёзлери Онъа къаршылыкъ косьтергенлернинъ эписини утандырды. Бутюн халкъ исе Иса япкъан эписи аджайип ишлерге къувана эди.

Хардал урлугъы акъкъында кинаели икяе

¹⁸ Иса: – Алланынъ Падишалыгъы неге ошай? Оны ненен тенъештирейим?

¹⁹ О, бир хардал урлугъына ошай. Бир адам оны алып озь багъчасында сача. Урлукъ осип терек киби юксек ола. Онынъ пытакълары арасында къушлар ювалар ясайлар, – деди.

Мая акъкъында кинаели икяе

²⁰ Сонъ къошып: – Алланынъ Падишалыгъыны ненен тенъештирейим?

²¹ О, маягъа ошай. Къадын оны алып, учь буюк савут унгъа ташлай ве бутюн хамырыны къабарта, – деди.

Тар къапу

²² Иса Ерусалим тарафына ёл алып, шеэр-койлерден кечип адамларны огрете эди.

²³ Насылдыр бир адам Онъа суаль берди: – Рабби, тек аз адамлар къуртарыладжакълармы? – деди. Иса оларгъа:

²⁴ – Тар къапудан кирмек ичюн арекет этинъиз. Сизге айтам: чокъ адам анда кирмеге арекет этеджеклер, амма кирип оламайджакълар.

²⁵ Эв Саиби турып къапуны къапаткъанда, сиз тышарыда къалып: «Рабби! Бизге ачып бер!» – деп къапуны такъылдата башлайджакъсыз. Лякин О сизге: «Ким ве къайдан олгъанынъызны бильмейим», – деп джевап береджек.

²⁶ О вакъыт сиз: «Биз Сеннен берабер ашап-ичтик. Сен бизим мейданларымызда огрете эдинъ», – дейджексиз.

²⁷ О исе: «Сизге айтам: ким ве къайдан олгъанынъызны бильмейим. Эй, инсафсыз шейлерни япкъанлар, козюмден ёкъ олунъыз!» – деп джевап береджек.

²⁸ Ибраимни, Исхакъны, Якъупны ве эписи пейгъамберлерни – Алланынъ Падишалыгъында, озюнъизни исе – тышарыгъа къувулгъанынъызны корьген вакъытта агълап, тишлеринъизни гъыджырдатаджакъсыз.

²⁹ Шаркъ ве гъарптан, шималь ве дженюптен адамлар келип, Алланынъ Падишалыгъында софра башында ер аладжакълар.

³⁰ О вакъыт бир къач сонъундакилер биринджи, биринджилер исе сонъунда оладжакълар, – деди.

Иса Ерусалим ичюн агълай

³¹ ‌Шу вакъыт бир къач ферисе келип: – Чыкъ, кет мындан. Сени Ирод ольдюрмеге истей, – дедилер.

³² Иса оларгъа: – Барып, о тилькиге айтынъ: Мен бугунь ве ярын джинлерни къувып, адамларны тедавийлейджем. Учюнджи куню исе Озь ишимни битиреджем.

³³ Амма бугунь, ярын ве о бир кунь Озь ёлумны девам этмек керегим. Пейгъамберни Ерусалимден башкъа ерде ольдюрильмеси олмайджакъ шейдир, – деди.

³⁴ – Эй, Ерусалим, Ерусалим! Пейгъамберлерни ольдюрген ве онъа ёлланылгъан адамларны ташларнен ургъан шеэр! Тавукъ озь чипчелерини къанатлары астында насыл топласа, Мен де къач кере сенинъ балаларынъны Озь яныма топламагъа истедим, сизлер исе истемединъиз.

³⁵ Мына, сизинъ эвинъиз сизге къалдырылгъан тура! Сизге айтам: «Раббининъ Ады иле Келеяткъанны шуретленъиз!» – демегендже, Мени корьмейджексиз.