Левийлилер 9 - Мукъаддес Китап

Харуннынъ къурбан чалувы

¹ Секизинджи куню Муса Харунны, огъулларыны ве Исраиль акъсакъалларыны чагъырды.

² Харунгъа бойле деди: – Бугъалардан озюнъе гуна ичюн къурбан оларакъ бир бузавны ве бутюнлей якъыладжакъ къурбан оларакъ бир къочкъарны ал. Оларнынъ экиси де къусурсыз олсун. Оларны РАББИнинъ огюне алып кетир.

³ Исраиль огъулларына буюр, олар гуна ичюн къурбан оларакъ бир йыллыкъ эчкини, эм де бутюнлей якъыладжакъ къурбан оларакъ бир йыллыкъ бузавны ве къойны алсынлар. Айванлар къусурсыз олмакъ керек.

⁴ Даа аманлыкъ къурбаны оларакъ бир бугъаны ве бир къочкъарны алсынлар ве оларны РАББИнинъ огюне кетирсинлер, зейтюн ягъынен къарыштырылгъан ашлыкъ бахшышыны да кетирсинлер. Бугунь сизге РАББИ корюнеджектир.

⁵ Мусанынъ бутюн буюргъанларыны Корюшюв Чадырынынъ кириши огюне алып кетирдилер. РАББИнинъ огюнде бутюн джемаат топланды.

⁶ Муса: – РАББИнинъ сизлерге буюргъаныны япынъыз. Сонъра сизге РАББИнинъ Шурети корюнеджек, – деди.

⁷ Муса Харунгъа: – Къурбан ерининъ янына бар, гуна ичюн къурбанынъны ве бутюнлей якъыладжакъ къурбанынъны алып кетир, озюнъ ве халкъ ичюн одеме эт. Халкънынъ адындан къурбан чал ве халкъ ичюн одеме эт. Бу – РАББИнинъ буюргъаныдыр, – деди.

⁸ Харун къурбан ерининъ янына барды, озь адына гуна ичюн къурбанлыкъ бузавны чалды.

⁹ Огъуллары онъа къанны кетирдилер, ве о, пармагъыны къангъа батырып, къурбан ерининъ бойнузларына сюртти, къалгъан къанны къурбан ерининъ тюбюне тёкти.

¹⁰ Гуна ичюн къурбаннынъ ич ягъыны, буйреклерини ве къара джигернинъ ягъыны, РАББИ Мусагъа буюргъаны киби, къурбан ерининъ устюнде якъты.

¹¹ Этини ве терисини исе ордудан тышта атеште якъты.

¹² Сонъ бутюнлей якъыладжакъ къурбанны чалды. Огъуллары онъа къанны кетирдилер. Харун къанны къурбан ерининъ чевре-четине септи.

¹³ Бутюнлей якъыладжакъ къурбанны: къурбаннынъ эписи къысымларыны ве башыны Харунгъа бердилер. Харун эписини къурбан ерининъ устюнде якъты.

¹⁴ Ич алетлеринен аякъларыны сувнен ювды ве бутюнлей якъыладжакъ къурбаннынъ устюнде, къурбан еринде якъты.

¹⁵ Бундан сонъ Харун халкънынъ адына къурбанны алып кетирди. Халкънынъ адына гуна ичюн къурбан текени алып чалды ве, биринджи къурбанны киби, оны да гуна ичюн къурбан оларакъ кетирди.

¹⁶ Бутюнлей якъыладжакъ къурбанны о, кереги киби алып кетирди.

¹⁷ Ашлыкъ бахшышларыны да алып кетирди. Авучларыны ашлыкъкъа толдурып, къурбаннынъ устюне къойып якъты. Бу, сабадаки бутюнлей якъыладжакъ къурбанлардан гъайры эди.

¹⁸ Халкънынъ адына аманлыкъ къурбаны оларакъ бугъаны ве къочкъарны чалды. Харуннынъ огъуллары онъа бираз къан кетирдилер, ве Харун къурбан ерининъ чевре-четине къан септирди.

¹⁹ Онъа бугъанынъ ич ягъыны, къочкъарнынъ ич ягъыны: къуйрукъ ягъыны, ич алетлериндеки ягъны, буйреклерни ве къара джигернинъ ягъыны кетирдилер,

²⁰ ич ягъыны тёш къысмына къойдылар, ве Харун ягъларны къурбан ерининъ устюнде якъты.

²¹ Муса буюргъаны киби, Харун тёш этини ве онъ аягъыны салландырыладжакъ бахшыш оларакъ РАББИнинъ огюне котерди.

²² Гуна ичюн къурбанны, бутюнлей якъыладжакъ къурбанны ве аманлыкъ къурбаныны кетирген сонъ, Харун халкъкъа догъру къолларыны узатып, оларгъа яхшылыкъ тиледи ве ашагъы тюшти.

²³ Муса ве Харун Корюшюв Чадырына кирдилер. Андан тышары чыкъкъан сонъ, халкъкъа яхшылыкъ тиледилер. О заман РАББИнинъ Шурети бутюн халкъкъа корюнди.

²⁴ РАББИнинъ огюнден атеш чыкъты ве къурбан ерининъ устюндеки бутюнлей якъыладжакъ къурбанны ве ич ягъларыны бутюнлей якъты. Бутюн халкъ буны корьди. Эписи къуванчтан къычырдылар ве ерге бетлеринен тийдилер.