Левийлилер 8 - Мукъаддес Китап

Муса Харунны ве огъулларыны айырып азиз эте

¹ РАББИ Мусагъа бойле деди:

² – Харунны, огъулларыны, урбаларны, ягълав ичюн зейтюн ягъыны, гуна ичюн къурбан оларакъ бузавны, эки къочкъарны ве бир сепет такос пителерни ал да,

³ бутюн джемаатны Корюшюв Чадырынынъ кириши янына топла.

⁴ Муса РАББИ онъа буюргъаныны япты, ве бутюн джемаат Корюшюв Чадырынынъ кириши огюнде топланды.

⁵ Сонъ Муса джемааткъа бойле деди: – РАББИ буны япмагъа буюрды.

⁶ Муса Харунны ве огъулларыны огге чыкъарып, оларны сувнен ювундырды.

⁷ Сонъ Харуннынъ устюне тюп урба кийдирди, белини къушакънен багълады, усть урбаны кийдирди, устюнден эфодны къойды, эфодны пекитмек ичюн, белини эфоднынъ къушагъынен багълады.

⁸ Эфоднынъ устюнден кокректеки торбаны кийдирди ве торбанынъ ичине Ур ве Тум алетлерини къойды.

⁹ Башына чалманы кийдирди, чалманынъ огюнден алтын тахтачыкъны, яни Азизлик Таджыны пекитти. Бу, РАББИнинъ Мусагъа буюргъаны эди.

¹⁰ Сонъ Муса ягълав ягъыны алды ве Мескенни ве онынъ ичиндеки эр бир шейни сюртип эляллады.

¹¹ Бу ягъны еди кере къурбан ерининъ чевре-четине септи ве сонъ ягънен къурбан якъыладжакъ ерни, эм бутюн алетлерини, эм савутны ве онынъ саджаягъыны ягълады ве бойле этип, оларны эляллады.

¹² Сонъ бираз ягълав ягъыны Харуннынъ башына тёкти ве бойле этип, оны ягълады ве эляллады.

¹³ Сонъ Муса Харуннынъ огъулларыны огге чыкъарып, устьлерине тюп урбаларны кийдирди ве беллерини къушакъларнен багълады, башларына сарыкълар багълады. Бу, РАББИнинъ Мусагъа буюргъаны эди.

¹⁴ Сонъра Муса гуна ичюн къурбан оларакъ бузавны кетирди. Харун ве онынъ огъуллары гуна ичюн къурбанлыкъ бузавнынъ башына къолларыны къойды.

¹⁵ Муса бузавны сойды, къаныны алып, къурбан ерининъ бойнузларына эр тарафлама пармагъынен сюртти ве къурбан ерини эляллады, къалгъан къаныны къурбан ерининъ тюбюне тёкти ве онынъ ичюн одеме этип, азиз этти.

¹⁶ Сонъ ич алетлериндеки бутюн ягъны ве къара джигерининъ ягъыны, эки буйрегини ягъларынен берабер алды. Муса оларны къурбан еринде якъты.

¹⁷ Бузавны, терисини ве арамлыкъларыны алып, ордудан тыш олгъан ерде якъты. Бу, РАББИнинъ Мусагъа буюргъаны эди.

¹⁸ Сонъ Муса бутюнлей якъыладжакъ къурбан оларакъ къочкъарны кетирди. Харун ве онынъ огъуллары къолларыны къочкъарнынъ башына къойды.

¹⁹ Муса оны сойды, къаныны къурбан ерининъ чевре-четине септи.

²⁰ Къочкъарны парчалады ве эм башыны, эм парчаларыны, эм ягъыны атеште якъты.

²¹ Ич алетлерини ве аякъларыны сувнен ювды. Сонъ Муса бутюн къочкъарны къурбан ерининъ устюнде якъты. Бу – бутюнлей якъыладжакъ къурбандыр, атеште якъыладжакъ къурбан, РАББИге хош къокъудыр. Бу, РАББИнинъ Мусагъа буюргъаны эди.

²² Сонъ Муса башкъа, азиз этюв къочкъарыны алып кетирди. Харун ве онынъ огъуллары къолларыны къочкъарнынъ башына къойды.

²³ Муса къочкъарны сойды, бираз къаныны алып, Харуннынъ онъ къулагъынынъ мемесине, онъ къолунынъ баш пармагъына ве онъ аягъынынъ баш пармагъына сюртти.

²⁴ Сонъ Муса Харуннынъ огъулларыны кетирди ве оларнынъ онъ къулакъларынынъ мемелерине, онъ къолларынынъ баш пармакъларына ве онъ аякъларынынъ баш пармакъларына бираз къан сюртти. Сонъ Муса къанны къурбан ерининъ чевре-четине септи.

²⁵ Къочкъарнынъ ягъыны: къуйрукъ ягъыны, ич алетлериндеки бутюн ягъны, къара джигернинъ ягъыны, эки буйрегини ягъларынен берабер ве онъ аягъыны алды.

²⁶ Сонъ РАББИнинъ огюнде тургъан такос питеге толу сепеттен бир такос питени, ягънен басылгъан бир такос питени, пишкен сонъ устюне ягъ сюртюльген такос питени алды ве айваннынъ ягъынынъ ве онъ аягъынынъ устюне къойды.

²⁷ Буларнынъ эписини Муса Харуннынъ ве огъулларынынъ къолларына берди. Олар буны РАББИнинъ огюнде салландырыладжакъ бахшыш оларакъ котерди.

²⁸ Муса буны оларнынъ къолларындан алып, бутюнлей якъыладжакъ къурбаннен берабер къурбан еринде якъты. Булар – руханийлерни айырып азиз этмек ичюн къурбан, РАББИге атеште якъыладжакъ къурбан ве хош къокъудыр.

²⁹ Сонъ Муса къочкъарнынъ тёшини алды ве РАББИнинъ огюнде салландырыладжакъ бахшыш оларакъ котерди. Азиз этюв къочкъарындан шу къысым Мусанынъ пайы эди. Бу, РАББИнинъ Мусагъа буюргъаны эди.

³⁰ Муса ягълав ягъыны ве къурбан ерининъ устюндеки бираз къанны алды, Харунгъа ве урбасына, огъулларына ве урбаларына септи. Бойле этип, Харунны ве урбаларыны, огъулларыны ве урбаларыны айырып азиз этти.

³¹ Муса Харунгъа ве онынъ огъулларына бойле деди: – Корюшюв Чадырынынъ кириши янында этни пиширинъиз ве анда азиз этюв сепетиндеки пителернен берабер ашанъыз. Манъа: «Харун ве огъуллары оны ашасын», – деген эмир берильген эди.

³² Эттен ве пителерден къалгъаныны якъынъыз.

³³ Азиз этилювинъизнинъ куньлери толсун деп, еди кунь девамында Корюшюв Чадырынынъ кириши янында олунъыз. Сизинъ азиз этилювинъиз еди кунь девам этсин.

³⁴ Бугунь япылгъан эр шейни РАББИ буюрды. Олар – сизлер ичюн одемедир.

³⁵ Корюшюв Чадырынынъ кириши огюнден айырылмайып, еди кунь девамында гедже-куньдюз РАББИнинъ бекчилери олунъыз. Буны япмасанъыз, оледжексинъиз. Манъа бойле эмир берильген эди.

³⁶ Харун ве онынъ огъуллары РАББИ Мусанен бутюн буюргъанларыны беджердилер.