Левийлилер 7 - Мукъаддес Китап

Къабаат ичюн къурбан акъкъында башкъа къаиделер

¹ Мына къабаат ичюн къурбан акъкъында къанундыр. Бу – улу азизликтир.

² Къабаат ичюн къурбанны бутюнлей якъыладжакъ къурбан союлгъан ерде соймакъ керек. Къаныны къурбан ерининъ чевре-четине сепмек керек.

³ Оны кетирген адам къурбаннынъ бутюн ягъыны: къуйругъыны ве ич алетлерини къаплагъан ягъны,

⁴ эки буйрекни ве устюндеки ягъны, баджагъындаки ягъны ве къара джигериндеки ве буйреклериндеки ягъны айырсын.

⁵ Руханий бунынъ эписини къурбан еринде РАББИге атеште якъыладжакъ къурбан оларакъ якъсын. Бу – къабаат ичюн къурбандыр.

⁶ Руханийлер несилининъ эписи акъайлары буны ашамагъа мумкюнлер. Оны азиз ерде ашамакъ керек. Бу – улу азизликтир.

⁷ Эм гуна ичюн къурбан акъкъында, эм къабаат ичюн къурбан акъкъындаки къанун бирдир: къурбан эти одеме эткен руханийнинъ олсун.

⁸ Руханий бир адамнынъ бутюнлей якъыладжакъ къурбанны кетиргенде, къурбаннынъ териси руханийнинъ олсун.

⁹ Фурунда пиширильген эр бир ашлыкъ бахшышы, къолтавада я да тенеке тавада азырлангъан эр бир аш оны кетирген руханийнинъки олсун.

¹⁰ Зейтюн ягъынен къарыштырылгъан эр бир ашлыкъ бахшышы я да къуру ашлыкъ бахшышы Харуннынъ эписи огъулларынынъки олсун.

Аманлыкъ къурбаны акъкъында башкъа къаиделер

¹¹ Мына РАББИге кетирильген аманлыкъ къурбаны акъкъында къанун.

¹² Эгер бирев шукюр оларакъ оны кетирсе, шукюр къурбанынен берабер о, зейтюн ягъынен къарыштырылгъан такос пителерни, устьлерине зейтюн ягъы сюртюльген такос пителерни, зейтюн ягъынен къарыштырылгъан энъ яхшы богъдай унундан япылгъан отьмеклерни кетирмек керек.

¹³ Такос пителерден гъайры о, озь аманлыкъ, шукюр къурбаны оларакъ экши хамырдан япылгъан отьмеклерни де алып кетирсин.

¹⁴ Бутюн бахшышлардан бирде-бир шейни РАББИге котериледжек бахшыш оларакъ кетирсин. Бу – аманлыкъ къурбанынынъ къаныны сепкен руханийнинъки олсун.

¹⁵ Шукюр этювининъ аманлыкъ къурбанынынъ этини кетирильген куню ашамакъ керек, сабагъадже оны къалдырмакъ олмаз.

¹⁶ Бир адам адакъ оларакъ я да озь истегинен къурбан кетиргенде, бу къурбанны о кетирильген куню ашамакъ керек, ве эртеси куню къалгъаныны ашамакъ мумкюн.

¹⁷ Учюнджи куню эт къалса, оны якъмакъ керек.

¹⁸ Эгер бир адам аманлыкъ къурбанынынъ этини учюнджи куню ашаса, бу къурбан къабул олунмаз. О – пис шейдир. О, оны кетирген адамгъа сайылмаз, о этни ашагъан адам гуна къазаныр.

¹⁹ Арам шейге тийген этни ашамагъа олмаз, оны атеште якъмакъ керек. Элял этни исе эр бир эляллангъан адамнынъ ашамагъа акъкъы бар.

²⁰ Эгер насылдыр адам, устюнде арамлыгъы олып, РАББИнинъ аманлыкъ къурбанынынъ этини ашаса, о джан халкъындан ёкъ этильмек керек.

²¹ Эгер насылдыр адам бир арам шейге токъунса: адамнынъ арамлыгъына, арам айвангъа, насылдыр арам махлюкъкъа тийсе ве РАББИнинъ аманлыкъ къурбанындан этни ашаса, о джан халкъындан ёкъ этильмек керек.

²² РАББИ Мусагъа бойле деди:

²³ – Исраиль огъулларына бойле деп айт: Бугъанынъ, къойнынъ я да текенинъ ягъыны ашаманъыз.

²⁴ Ольген айваннынъ я да кийик айванлар парчалагъан айваннынъ ягъыны насылдыр ишке къулланмагъа мумкюн, амма оны ашаманъыз.

²⁵ Эгер бир адам РАББИге атеште якъыладжакъ къурбан оларакъ айванларнынъ ягъыны ашаса, о джан халкъындан ёкъ этилир.

²⁶ Яшагъан ерлеринъизде не къушнынъ, не де айваннынъ къаныны ашаманъыз.

²⁷ Эгер бир адам насылдыр къанны ашаса, о джан халкъындан ёкъ этильмек керек.

²⁸ РАББИ Мусагъа бойле деди:

²⁹ – Исраиль огъулларына бойле деп айт: РАББИге аманлыкъ къурбаныны кетирген адам бу къурбаннынъ бир къысмыны РАББИге бахшыш оларакъ кетирмек керек.

³⁰ О, озь къолларынен, РАББИге атеште якъыладжакъ къурбан оларакъ айваннынъ тёшини ве онынъ ягъыны кетирмек керек. О, РАББИнинъ огюнде салландырыладжакъ бахшыш олсун.

³¹ Руханий ягъны къурбан ерининъ устюнде якъсын, тёш исе Харунгъа ве онынъ огъулларына олсун.

³² Айваннынъ онъ аягъыны, котериледжек бахшыш оларакъ, руханийге беринъиз.

³³ Харуннынъ огъулларындан къайсы аманлыкъ къурбанынынъ къаныны ве ягъыны кетирсе, онъа, пай оларакъ, арттаки онъ аягъыны беринъиз.

³⁴ Мен Исраиль огъулларынынъ аманлыкъ къурбанларындан салландырыладжакъ тёшни ве котериледжек аякъны алып, руханий Харунгъа ве онынъ огъулларына Исраиль огъулларындан эбедий пай оларакъ айырдым.

³⁵ Харун ве онынъ огъуллары РАББИнинъ огюнде руханийлик вазифесини башлагъан кунюнден бу оларнынъ пайлары олсун.

³⁶ Олар Исраиль огъулларындан айырылгъан ве вазифеге ягънен сюртюльген куню РАББИ бу пайларны оларгъа бермеге буюрды. Бу – несиллеринъиз ичюн эбедий низамнамедир.

³⁷ Будыр бутюн якъыладжакъ къурбан, ашлыкъ бахшышы, гуна ичюн къурбан, къабаат ичюн къурбан, вазифеге тайинленюв ичюн къурбан ве аманлыкъ къурбаны акъкъында къанундыр.

³⁸ РАББИ оны Мусагъа Синай дагъында буюрды. О куню Синай сахрасында о, Исраиль огъулларына РАББИге бахшышлар кетирмеге эмир этти.