Левийлилер 5 - Мукъаддес Китап

Не вакъыт гуна ичюн къурбанны кетирмек керек

¹ Бир адам джинаетнинъ шааты олгъанда, оны корьгенде я да онынъ акъкъында бильгенде, шаатлыкъ этмеге къаргъышнен чагъырувны эшитсе, лякин ич бир шейни бильдирмесе, озь башына къабаат къазаныр.

² Эгер бириси бир арам шейге токъунса: арам кийик айваннынъ олюсине, башкъа арам айваннынъ джеседине, я да арам махлюкънынъ джеседине тийсе, онынъ бу шей акъкъында хабери олмаса да, о арамланыр ве къабаатлы олур.

³ Я да эгер о, адамнынъ арамлыгъына, насыл олса олсун арамлыгъына тийсе, ве о буны башта бильмейип, сонъундан хабери олса, о къабаатлыдыр.

⁴ Эгер бир адам акъылсызлыкътан насылдыр яман я да яхшы шейни япмагъа емин этсе, ве о буны башта бильмейип, сонъундан хабери олса, о бу иште къабаатлыдыр.

⁵ Мына бу айтылгъан гуналардан биринде къабаатлы олгъанда, адам озь къабаатыны бойнуна алмакъ керек

⁶ ве озь къабааты ичюн РАББИге къой-эчкилер сюрюсинден къозуны я да улакъны къабаат ичюн къурбан оларакъ алып кетирмек керек. Сонъ руханий онынъ гунасы ичюн одеме этер.

⁷ Эгер къозуны кетирип оламаса, озь къабааты ичюн эки кийик гогерджин я да эки гогерджин баласыны алып РАББИге кетирсин. Биринджиси – гуна ичюн къурбан, экинджиси – бутюнлей якъыладжакъ къурбан олсун.

⁸ О, оларны руханийге кетирсин де, башта гуна ичюн къурбанлыкъ къушны алып, онынъ бойнуны сындырсын, амма айырмасын.

⁹ Къурбаннынъ базы къаныны къурбан ерининъ янына сепсин, къалгъан къанына исе къурбан ерининъ тюбюне акъмагъа ёл берсин. Бу – гуна ичюн къурбандыр.

¹⁰ Экинджисини, низамнаме боюнджа, бутюнлей якъыладжакъ къурбан оларакъ кетирсин. Бойлеликнен, руханий онынъ япкъан гунасы ичюн одеме этер, ве о, багъышланыр.

¹¹ Эгер адам эки кийик гогерджинни я да эки гогерджин баласыны алып кетирип оламаса, гунасы ичюн къурбан оларакъ энъ яхшы богъдай унунен толу чанакъ кетирсин. Уннынъ устюне зейтюн ягъыны къоймасын, темиз къокъулы майны да тёкмесин, чюнки бу – гуна ичюн къурбандыр.

¹² Бу пайны руханийге кетирсин, руханий ондан толу бир авуч хатыра пайы оларакъ алсын да, РАББИге атеште якъыладжакъ къурбан оларакъ къурбан ери устюнде якъсын. Бу – гуна ичюн къурбандыр.

¹³ Бойле этип, руханий онынъ насылдыр айтылгъан гуна япкъаны ичюн одеме этер, ве о, багъышланыр. Къалгъан богъдай уну, ашлыкъ бахшышы киби, руханийге къалсын.

Къабаат ичюн къурбанлар

¹⁴ РАББИ Мусагъа бойле деди:

¹⁵ – Бир адам бильмейип, РАББИнинъ азизликлерине къаршы гуна япып, имансыз арекет этсе, къабааты ичюн РАББИге къой сюрюсинден къусурсыз къочкъарны кетирсин. Онынъ кумюш фияты мукъаддес шекель чекисине коре, сен бильдирген акъкъынъа тенъ кельсин. Бу – къабаат ичюн къурбандыр.

¹⁶ О, бозгъан мукъаддес шей ичюн акъкъыны берсин, бу одевнинъ беш пайында бир пайыны къошсун ве руханийге берсин. Руханий къабаат ичюн къурбанлыкъ къочкъарынен онынъ ичюн одеме этер, ве о, багъышланыр.

¹⁷ Бир адам япмагъа олмагъан шейлерни япып, РАББИнинъ бир эмирини бозып ве бильмейип къабаатлы олса, о, гунакяр олур.

¹⁸ О адам сен кескен фиятынъа коре къабаат ичюн къурбан оларакъ къусурсыз къочкъарны алып, руханийге кетирсин. Руханий онынъ бильмейип япкъан къабааты ичюн одеме этер, ве о, багъышланыр.

¹⁹ Бу – къабаат ичюн къурбандыр. Шу адам РАББИнинъ огюнде къабаатлы олды.