Левийлилер 4 - Мукъаддес Китап

Бильмейип япылгъан гуна ичюн къурбан

¹ РАББИ Мусагъа бойле деди:

² – Исраиль огъулларына бойле деп айт: Бир адам бильмейип, РАББИнинъ насылдыр эмирини бозгъанда ве гуна къазангъанда, эмирлерининъ бирине къаршы бир шейни япкъанда,

³ я да ягънен сюртюльген руханий гуна къазанып, халкъны къабаатлы эткенде, о заман япкъан гунасы ичюн яш къусурсыз бузавны гуна ичюн къурбан оларакъ РАББИге кетирсин.

⁴ О бузавны Корюшюв Чадырынынъ киришине, РАББИнинъ огюне кетирсин, къолуны бузавнынъ башына къойсун да, оны РАББИнинъ огюнде сойсун.

⁵ Сонъ ягънен сюртюльген руханий бузавнынъ бираз къаныны алып, Корюшюв Чадырына алып кирсин.

⁶ Руханий озь пармагъыны къангъа батырсын да, РАББИнинъ огюнде, Мукъаддес Ернинъ пердеси огюне еди кере сепсин.

⁷ Сонъ руханий РАББИнинъ огюнде, Корюшюв Чадырындаки къокъулы отларны якъмакъ ичюн ернинъ бойнузларына бираз къан сюртсюн. Бузавнынъ бутюн къалгъан къаныны Корюшюв Чадырынынъ кириши огюнде тургъан, айванларны бутюнлей якъмакъ ичюн къурбан ерининъ тюбюне тёксюн.

⁸ Руханий гуна ичюн къурбанлыкъ бузавындан бутюн ич ягъыны чыкъарсын. Ич алетлериндеки ягъны, бутюн ич ягъыны,

⁹ эки буйрекни ве устюндеки ягъны, баджагъындаки ягъны ве къара джигериндеки ве буйреклериндеки ягъны айырсын.

¹⁰ Аманлыкъ къурбанындан алынгъаны киби япсын, ве руханий шу шейлерни айванларны бутюнлей якъмакъ ичюн къурбан еринде якъсын.

¹¹ Бузавнынъ терисини, этини, башыны, аякъларыны, ич алетлерини, кубресини,

¹² бузавнынъ бутюн къалгъан шейлерини ордудан тышары, темиз ерге, куль сепильген ерге чыкъарсын да, одунларда якъсын. Оны куль сепильген ерде якъмакъ керек.

¹³ Исраильнинъ бутюн джемааты бильмейип гуна къазангъанда, бутюн топлашув буны бильмейип япкъанда, РАББИнинъ эмирлерине къаршы бир шей япкъанда, япмагъа олмагъан шейни япып къабаатлы олгъанда,

¹⁴ оларнынъ япкъан гуналары ачылгъан вакъытта олар бутюн джемаат адындан яш бузавны гуна ичюн къурбан оларакъ кетирсинлер де, оны Корюшюв Чадыры огюне къойсунлар.

¹⁵ Джемаат акъсакъаллары РАББИнинъ огюнде бузавнынъ башына къолларыны къойсунлар ве РАББИнинъ огюнде оны сойсунлар.

¹⁶ Сонъ ягънен сюртюльген руханий бузавнынъ бираз къаныны Корюшюв Чадырына кирсетсин.

¹⁷ Руханий озь пармагъыны къангъа батырсын да, РАББИнинъ огюнде, перденинъ огюне еди кере сепсин.

¹⁸ Сонъ руханий РАББИнинъ огюндеки, Корюшюв Чадыры ичиндеки къокъулы отлар якъыладжакъ ернинъ бойнузларына бираз къан сюртсюн. Бузавнынъ бутюн къалгъан къаныны Корюшюв Чадырынынъ кириши огюнде тургъан къурбан ерининъ тюбюне тёксюн.

¹⁹ Бутюн ич ягъыны чыкъарсын ве оны къурбан еринде якъсын.

²⁰ Гуна ичюн бузавнен япылгъан шейлерни шу бузавнен япсын. Руханий бойле япмакъ керек. Бойле этип, руханий олар ичюн одеме этер, ве олар багъышланырлар.

²¹ Сонъ бузавны ордудан тышары чыкъарсын ве, биринджи бузавны якъкъаны киби, якъсын. Бу – джемаатнынъ гунасы ичюн къурбандыр.

²² Бир башлыкъ бильмейип гуна къазангъанда, Алласы РАББИнинъ эмирлерине къаршы япмагъа олмагъан шейлерни япып, къабаатлы олгъанда,

²³ гунасы онъа ачылгъан вакъытта, къурбан оларакъ къусурсыз текени кетирсин,

²⁴ къолуны текенинъ башына къойсун, оны РАББИнинъ огюнде, бутюнлей якъыладжакъ къурбанларнынъ союлгъан еринде сойсун. Будыр – гуна ичюн къурбан.

²⁵ Руханий озь пармагъынен гуна ичюн къурбаннынъ бираз къаныны алып, къурбан якъыладжакъ ернинъ бойнузларына сюртсюн, къалгъан къанны къурбан якъыладжакъ ернинъ тюбюне тёксюн.

²⁶ Бутюн ич ягъыны, аманлыкъ къурбанынынъ ич ягъы дайын, къурбан ерининъ устюнде якъсын. Бойле этип, руханий башлыкъ ичюн одеме этер, ве о, багъышланыр.

²⁷ Халкънынъ бирде-бир адамы бильмейип гуна къазангъанда, РАББИнинъ эмирлерине къаршы япмагъа олмагъан шейлерни япып, къабаатлы олгъанда,

²⁸ гунасы онъа ачылгъан вакъытта, япкъан гунасы ичюн къурбан оларакъ къусурсыз эчкини кетирсин,

²⁹ къолуны гуна ичюн къурбаннынъ башына къойсун, эчкини бутюнлей якъыладжакъ къурбанлар союлгъан ерде сойсун.

³⁰ Руханий озь пармагъынен гуна ичюн къурбаннынъ бираз къаныны алып, айванларны бутюнлей якъмакъ ичюн къурбан ерининъ бойнузларына сюртсюн, къалгъан къанны къурбан ерининъ тюбюне тёксюн.

³¹ Бутюн ич ягъыны, аманлыкъ къурбанындан айырылгъаны киби, айырсын, руханий оны къурбан ерининъ устюнде якъсын, ве о, РАББИге хош къокъу олсун. Бойле этип, руханий шу адам ичюн одеме этер, ве о, багъышланыр.

³² Эгер бир адам гуна ичюн къурбан оларакъ бир къойны кетирмеге истесе, къусурсыз ыргъачы къойны кетирсин,

³³ гуна ичюн къурбаннынъ башына къолуны къойсун, къойны бутюнлей якъыладжакъ къурбанлар союлгъан еринде сойсун.

³⁴ Руханий озь пармагъынен гуна ичюн къурбаннынъ бираз къаныны алып, айванларны бутюнлей якъмакъ ичюн къурбан ерининъ бойнузларына сюртсюн, къалгъан къанны къурбан ерининъ тюбюне тёксюн.

³⁵ Бутюн ич ягъыны, аманлыкъ къурбаны олгъан къойдан айырылгъаны киби, айырсын да, руханий оны къурбан ерининъ устюнде РАББИге якъыладжакъ къурбан оларакъ якъсын. Бойле этип, руханий онынъ гунасы ичюн одеме этер, ве о, багъышланыр.