Левийлилер 27 - Мукъаддес Китап

Раббиге айырылып азиз олгъан шейлер акъкъында

¹ РАББИ Мусагъа бойле деди:

² – Исраиль огъулларына бойле айт: Бир адам башкъа адамнынъ джаныны белли бир фияткъа коре РАББИге багъышламагъа адагъыны бергенде,

³ 20 яшындан 60 яшынадже олгъан эркекнинъ фияты, мукъаддес шекель чекисине коре, 50 кумюш олсун.

⁴ Эгер къадын олса, фияты 30 кумюш олсун.

⁵ Беш яшындан башлап 20 яшынадже олгъан огъланнынъ фияты 20 кумюш, къызнынъ фияты он кумюш олсун.

⁶ Бир айлыкътан беш яшына къадар огъланнынъ фияты беш кумюш, къызнынъ фияты учь кумюш олсун.

⁷ Алтмыш я да даа буюк яшта олгъан акъайнынъ фияты 15 кумюш, къадыннынъ фияты он кумюш олсун.

⁸ Лякин бир адам адакъ парасыны берип оламаса, адамны руханийге алып барсынлар, ве руханий адакъ берген адамнынъ алына коре адамнынъ фиятыны кессин.

⁹ Берильген адакъ РАББИге къурбанлыкъкъа келишкен айван олса, РАББИге берильген эр шей азиз олсун.

¹⁰ Адакъны денъиштирмеге олмаз. Яхшынынъ ерине ярамай я да ярамайнынъ ерине яхшысыны къоймагъа олмаз. Эгер айванны денъиштирселер, денъиштирильген айванларнынъ экиси де азиз къурбанлыкъ оладжакълар.

¹¹ Эгер адакъ РАББИге къурбан чалынмайджакъ арам айванлардан бири олса, оны руханийге косьтермек керек.

¹² Руханий, айван яхшы я да ярамай олгъанына къарар чыкъарсын. Руханий къыйметини насыл кессе, ойле де олсун.

¹³ Лякин бир адам айванны къайтарып сатын алмагъа истесе, бильдирильген къыйметке къыйметнинъ беште бир пайыны къошып тёлесин.

¹⁴ Эгер бир адам озь эвини РАББИнинъ азизлиги деп багъышласа, руханий онынъ яхшы я да ярамай олгъанына къарар чыкъарсын. Руханий къыйметини насыл кессе, ойле де олсун.

¹⁵ Адакъ берген адам озь эвини къайтарып сатын алмагъа истесе, бильдирильген къыйметке къыйметнинъ беште бир пайыны къошып тёлесин. Сонъ эв онынъки олсун.

¹⁶ Эгер бир адам озь пайындан бир тарланы РАББИге адамагъа истесе, тарлагъа сачыладжакъ урлукъ микъдарына коре къыймет кесильсин. Беш чувал арпа урлугъы сачыладжакъ тарланынъ къыймети 50 кумюш олсун.

¹⁷ Эгер тарласыны юбилей йылындан башлап адаса, юкъарыдаки фият къалсын.

¹⁸ Эгер юбилей йылындан сонъ адаса, руханий юбилей йылынадже къалгъан йылларнынъ сайысына коре къыйметини кесип, фиятыны эксильтсин.

¹⁹ Эгер адакъны берген адам тарласыны къайтарып сатын алмагъа истесе, бильдирильген къыйметке къыйметнинъ беште бир пайыны къошып тёлесин. Сонъ тарла онынъки олсун.

²⁰ Лякин тарласыны сатын алмаздан эвель, тарла башкъа бир адамгъа сатылса, тарланы къайтарып сатын алмагъа олмаз.

²¹ Юбилей йылы кельгенде, бойле тарла, РАББИге айырылып багъышлангъан шей киби, РАББИнинъ азизлиги олсун ве руханийлерге кетсин.

²² Эгер бир адам озь пайындан олмагъан, лякин сатын алынгъан тарланы РАББИге адаса,

²³ руханий юбилей йылына къадар кечеджек йылларгъа коре тарлагъа къыймет кессин. Айны шу куню фиятыны тёлемек керек, ве тарла РАББИнинъ азизлиги олсун.

²⁴ Юбилей йылында тарла кимден сатын алынгъан олса, о адамнынъ къолуна кечсин, пайынынъ саибине кетсин.

²⁵ Эр кескен къыйметинъ мукъаддес шекельнинъ чекисине коре эсасланмакъ керек. Бир шекельде йигирми гера бар.

²⁶ Биринджи догъгъан айванларны адакъ оларакъ багъышламагъа олмаз. Биринджи догъгъанлар – РАББИнинъдир. Бузав оламы, къозу-улакъ оламы, о эп бир РАББИнинъдир.

²⁷ Эгер айван арам айванлардан олса, бильдирильген къыйметке къыйметнинъ беште бир пайыны къошып, оны сатын алмагъа керек. Адам айванны сатын алмаса, оны бильдирильген къыйметинъе башкъа адамгъа сатмакъ керек.

²⁸ РАББИге багъышлангъан ич бир шейни, бир адам озь мал-мулькюнден РАББИге айырып берген ич бир шейни – адам оламы, айван оламы, топракъ пайынынъ тарласы оламы – сатмагъа ве сатын алмагъа олмаз. Эр айырылып багъышлангъан шей – РАББИнинъ улу азизлигидир.

²⁹ РАББИге айырылып багъышлангъан ич бир адамны сатын алмагъа олмаз. О, мытлакъа ёкъ этильсин.

³⁰ Топракъ берекетининъ он пайда бир пайы – ернинъ урлукъ берекетинден ве тереклерининъ мейваларындан онда бир пайы – РАББИнинъкидир. Бу, РАББИнинъ азизлигидир.

³¹ Бир кимсе онда бир пайыны сатын алмагъа истесе, онынъ къыйметине беште бир пайыны къошып тёлесин.

³² Туварларнынъ ве къой-эчкилернинъ онда бир пайы – чобаннынъ таягъы тюбюнде кечкен эр бир онуджы айван РАББИге азиз бахшыш олсун.

³³ Айванларны яхшыгъа ве ярамайгъа айырмагъа олмаз, бирини башкъасына денъиштирмеге олмаз. Эгер айванлар денъиштирильсе, денъиштирильген айванларнынъ экиси де азиз бахшыш олсун ве оларны къайтарып сатын алмагъа олмаз.

³⁴ Синай дагъында Исраиль огъуллары ичюн Мусагъа буюргъан РАББИнинъ эмирлери будыр.