Левийлилер 24 - Мукъаддес Китап

Къандиль акъкъында къарарнаме

¹ РАББИ Мусагъа бойле деди:

² – Исраиль огъулларына эмир эт ки, олар санъа, орталыкъны ярыкълаткъан лампатлар даима якъылып турсун деп, келиде басылгъан темиз зейтюн ягъыны кетирсинлер.

³ Харун эр вакъыт акъшамдан сабагъадже лампатларны Корюшюв Чадырында, Шаатлыкъ Сандыгъыны сакълагъан перденинъ огюнде, РАББИнинъ огюнде къойсун. Сизинъ эписи несиллеринъизге бу – эбедий низамнамедир.

⁴ Олар эр вакъыт темиз къандиль устюнде, РАББИнинъ огюнде лампатларны къойсунлар.

Пителер акъкъында къарарнаме

⁵ Энъ яхшы богъдай унуны алып, он эки пите пишир. Эр питеде эки чанакъ ун олсун.

⁶ Оларны алтышар-алтышар эки сырагъа РАББИнинъ огюне темиз стол устюне къой.

⁷ Эр бир сыра устюне темиз къокъулы май къой. Бу, эслетме оларакъ, пите янында олып, РАББИге атеште якъыладжакъ бахшыш олсун.

⁸ Исраиль огъуллары адындан пителерни эр вакъыт, эр раатлыкъ куню РАББИ огюне къоймакъ керек. Бу, эбедий васиеттир.

⁹ Пителер Харуннынъ ве онынъ огъулларынынъки олсун. Олар пителерни азиз ерде ашасынлар. РАББИнинъ бахшышларындан бу оларгъа улу азизликтир. Бу, эбедий низамнамедир.

Аллагъа къаршы куфюр сёзлер ичюн джеза

¹⁰ Бир исраилли къадыннынъ ве мысырлы акъайынынъ бир огълу бар эди. О, исраиллилернинъ ордусына келип, бир исраилли акъайнен къавгъа этти.

¹¹ Исраилли къадыннынъ огълу РАББИнинъ Адыны яманлады ве куфюр сёзлерни айтты. Оны Мусагъа кетирдилер. Анасынынъ ады – Шеломит эди. О, Дан къабилесинден, Диврийнинъ къызы эди.

¹² Огъланны сакъчыларнынъ къолуна бердилер ве РАББИнинъ къарарыны бекледилер.

¹³ РАББИ Мусагъа бойле деди:

¹⁴ – Куфюр лаф айткъан огъланны ордудан тыш чыкъар. Айткъанларыны эшиткен эр кес онынъ башына къолларыны къойсун да, бутюн джемаат оны ташнен урып ольдюрсин.

¹⁵ Исраиль халкъына бойле айт: Алласы акъкъында куфюр сёзлер айткъан эр бир адам озь гунасы ичюн джеза алсын.

¹⁶ Алланынъ Адыны яманлагъан адам мытлакъа ольдюрильсин. Бутюн джемаат оны ташнен урып ольдюрсин. Кельмешекми, исраиллими РАББИнинъ Адыны яманласа, ольдюрильсин.

¹⁷ Башкъа адамны ольдюрген адам мытлакъа ольдюрильсин.

¹⁸ Бир айванны ольдюрген адам шу айваннынъ ерине бир айван берип одесин.

¹⁹ Ким башкъа адамны яраласа, озюне де айны шей япылсын.

²⁰ Къырыкъ ичюн къырыкъ, козь ичюн козь, тиш ичюн тиш къаршылыкъ олсун. Бир адам башкъасыны насыл яраласа, оны да айны яраласынлар.

²¹ Бир айванны ольдюрген адам айваннынъ акъкъыны тёлесин. Башкъа адамны ольдюрген адам исе ольдюрильсин.

²² Эм кельмешекни, эм исраиллини айны бойле суд этинъиз. Мен – РАББИм, сизинъ Алланъыз.

²³ Муса буларны Исраиль огъулларына бильдиргенинден сонъ, куфюр сёзлерни айткъан адамны ордудан тыш чыкъардылар ве ташларнен урып ольдюрдилер. РАББИ Мусагъа насыл буюргъан олса, Исраиль огъуллары ойле де яптылар.