Левийлилер 23 - Мукъаддес Китап

Раббининъ байрамлары акъкъында

¹ РАББИ Мусагъа бойле деди:

² – Исраиль огъулларына РАББИнинъ байрамлары акъкъында бойле айт: Бу байрамлар – РАББИнинъ байрамларыдыр. О вакъытларда азиз топлашувларны япынъыз.

³ Алты кунь чалышмакъ мумкюн, единджи куню исе – энъ муим раатлыкъ кунюдир, азиз топлашувдыр. Ишке янашманъыз. Эписи яшагъан ерлеринъизде бу – РАББИнинъ Адына раатлыкъ кунюдир.

⁴ Азиз топлашувы олгъан РАББИнинъ байрамлары булардыр. Оларны вакъты-саатинде япынъыз.

Песах ве Маясыз Пишкен Пителер Байрамы

⁵ Биринджи айда, 14-юнджи кунюнинъ акъшамы – РАББИнинъ Песахыдыр.

⁶ Айны айнынъ 15-инджи куню – РАББИнинъ Маясыз Пишкен Пителер Байрамыдыр. Еди кунь девамында такос пителер ашанъыз.

⁷ Биринджи куню азиз топлашув япынъыз, ишке янашманъыз.

⁸ Еди кунь девамында РАББИге атеште бутюнлей якъыладжакъ къурбанларны кетиринъиз. Единджи куню мукъаддес топлашув япынъыз, ишке янашманъыз.

⁹ РАББИ Мусагъа бойле деди:

¹⁰ – Исраиль огъулларына бойле айт: Мен сизге береджек топракъкъа кельгенинъизден сонъ, берекет джыйгъанда, берекетинъизнинъ биринджи культесини руханийге беринъиз.

¹¹ Культе къабул олунсын деп, руханий оны РАББИнинъ огюнде, раатлыкъ кунюнинъ экинджи куню салласын.

¹² Культе салланаджакъ куню бир йыллыкъ къусурсыз къозуны бутюнлей якъыладжакъ къурбан оларакъ РАББИге чалынъыз.

¹³ Къозунен берабер ашлыкъ бахшышы оларакъ зейтюн ягъынен къарыштырылгъан эки чанакъ энъ яхшы богъдай унуны кетиринъиз. О, РАББИ ичюн атеште якъыладжакъ къурбан, хош къокъу олсун. Шу бахшышнен берабер ичимлик бахшышы оларакъ ярым чанакъ шарап кетиринъиз.

¹⁴ Алланъызгъа бу къурбанны чаладжакъ кунюне къадар янъы берекеттен япылгъан бир тюрлю отьмекни, къавурылгъан богъдай данелерини я да тазе богъдай данелерини ашаманъыз. Бутюн яшагъан ерлеринъизде сизинъ эписи несиллеринъизге бу – эбедий низамнамедир.

Берекет Байрамы

¹⁵ Раатлыкъ кунюнинъ экинджи куньден башлап, яни культе салландырыладжакъ кунюнден башлап, еди толу афта сайынъыз.

¹⁶ Единджи раатлыкъ кунюнинъ экинджи кунюне къадар элли кунь сайынъыз. О куню РАББИге тазе ашлыкъ бахшышыны кетиринъиз.

¹⁷ Яшагъан ерлеринъизден РАББИге салландырыладжакъ къурбан оларакъ эки отьмек кетиринъиз. Отьмеклер эки чанакъ энъ яхшы богъдай унундан ве экши хамырдан япылсын. Бу – РАББИ ичюн биринджи махсуллар салландырыладжакъ бахшышы олсун.

¹⁸ Отьмеклернен берабер бутюнлей якъыладжакъ къурбан оларакъ РАББИге бир йыллыкъ еди къозу ве туварлардан бир бузав ве эки къочкъарны кетиринъиз. Олар РАББИ ичюн бутюнлей якъыладжакъ къурбанлар олсун. Оларнен берабер ашлыкъ бахшышыны ве ичимлик бахшышыны кетиринъиз. Булар – РАББИ ичюн атеште якъыладжакъ бахшыш, хош къокъу олсун.

¹⁹ Гуна ичюн къурбан оларакъ бир текени, аманлыкъ къурбаны оларакъ бир йыллыкъ эки къозуны союнъыз.

²⁰ Руханий буны, эм де салландырыладжакъ биринджи махсуллар отьмеклерини ве эки къозуны РАББИнинъ огюнде салласын. Булар – РАББИнинъ азиз бахшышлары, олар руханийнинъки олсун.

²¹ О куню илян этинъиз ве мукъаддес топлашув япынъыз. Ишке янашманъыз. Бутюн яшагъан ерлеринъизде сизинъ эписи несиллеринъизге бу – эбедий низамнамедир.

²² Топрагъынъызда берекет оргъанда, тарланынъ кенарларыны орманъыз. Оракъ вакътында ерге тюшип къалгъан башакъларны джыйманъыз. Буны фукъарелерге ве кельмешеклерге къалдырынъыз. Мен – РАББИм, сизинъ Алланъыз.

Боруларнен Бильдирильген Байрам

²³ РАББИ Мусагъа бойле деди:

²⁴ – Исраиль огъулларына бойле айт: Единджи айнынъ биринджи кунюнде сизге раатлыкъ куню олсун. Бу – Боруларнен Бильдирильген Байрамдыр. Сизде мукъаддес топлашув олсун.

²⁵ Ишке янашманъыз, РАББИге атеште якъыладжакъ къурбанларны кетиринъиз.

Одеме Куню

²⁶ РАББИ Мусагъа бойле деди:

²⁷ – Единджи айнынъ онунджы куню Одеме Куню олсун. Мукъаддес топлашув япынъыз. Алчакъгонъюлли олунъыз. РАББИге атеште якъыладжакъ къурбанларны кетиринъиз.

²⁸ О куню ишке янашманъыз. Бу – Одеме Кунюдир. Бу куню Алланъыз олгъан РАББИнинъ огюнде сизинъ ичюн одеме этильсин.

²⁹ О куню алчакъгонъюлли олмагъан, ашагъан ве ичкен адам халкънынъ арасындан ёкъ этильсин.

³⁰ Эгер о куню бир адам бир ишке янашса, о джанны Мен халкънынъ арасындан ёкъ этерим.

³¹ Ишке янашманъыз. Бутюн яшагъан ерлеринъизде сизинъ эписи несиллеринъизге бу – эбедий низамнамедир.

³² Бу, сиз ичюн энъ муим раатлыкъ кунюдир. Алчакъгонъюлли олунъыз. Айнынъ докъузынджы куню акъшамдан, бу акъшамдан айланыр акъшамгъа къадар раатлыкъ куню япынъыз.

Чалашлар Байрамы

³³ РАББИ Мусагъа бойле деди:

³⁴ – Исраиль огъулларына бойле айт: Айны единджи айнынъ 15-инджи куню Чалашлар Байрамы олсун. Еди кунь девамында РАББИ ичюн байрам япынъыз.

³⁵ Биринджи куню мукъаддес топлашув япынъыз, ишке янашманъыз.

³⁶ Еди кунь девамында РАББИге атеште якъыладжакъ бахшышларны кетиринъиз. Секизинджи куню мукъаддес топлашув япынъыз ве РАББИге атеште якъыладжакъ бахшышларны кетиринъиз. Бу, байрамнынъ сонъки топлашувыдыр. Ишке янашманъыз.

³⁷ Булар – РАББИнинъ байрамларыдыр. Оларнынъ вакътында мукъаддес топлашувларны япмагъа, РАББИге атеште бутюнлей якъыладжакъ къурбанларны, ашлыкъ бахшышларыны, башкъа къурбанларны ве ичимлик бахшышларыны озь вакъты-саатинде кетирмеге керек.

³⁸ Буларны РАББИнинъ раатлыкъ куньлеринден айры, башкъа бахшышларынъыздан айры, адакъ бахшышларынъыз ве озь истегинен берильген бахшышларынъыздан айры РАББИге кетиринъиз.

³⁹ Единджи айнынъ 15-инджи кунюнде, топрагъынъызда берекетни оргъан сонъ, еди кунь девамында РАББИнинъ байрамыны япынъыз. Биринджи ве секизинджи куню раатлыкъ куню олсун.

⁴⁰ Биринджи куню дюльбер тереклернинъ пытакъларыны, хурма тереклерининъ пытакъларыны, кенъ япракълы тереклернинъ пытакъларыны, озен талларнынъ пытакъларыны алынъыз ве Алланъыз олгъан РАББИнинъ огюнде еди кунь девамында къуванынъыз.

⁴¹ Эр йыл еди кунь девамында РАББИнинъ бу байрамыны япынъыз. Бутюн яшагъан ерлеринъизде сизинъ эписи несиллеринъизге бу – эбедий низамнамедир. Байрамны единджи айда япынъыз.

⁴² Еди кунь чалашларда яшанъыз. Бутюн ерли исраиллилер чалашларда яшасын.

⁴³ Сонъра сизинъ эвлятларынъыз билир ки, Мен Исраиль огъулларыны Мысыр топрагъындан алып чыкъкъанымда, оларны чадырларда ерлештирдим. Мен – РАББИм, сизинъ Алланъыз.

⁴⁴ Бойле этип, Муса Исраиль халкъына РАББИнинъ байрамлары акъкъында айтты.