Левийлилер 18 - Мукъаддес Китап

Озь яшайышында азизлик акъкъында

¹ РАББИ Мусагъа бойле деди:

² – Исраиль халкъына бойле айт: Мен – РАББИм, сизинъ Алланъыз.

³ Сизлер яшагъан Мысыр топрагъындаки адамларнынъ япкъанларыны япманъыз. Мен сизни алып кетеджек Ханаан топрагъындаки адамларнынъ япкъанларыны да япманъыз. Оларнынъ низамнамелерине коре яшаманъыз.

⁴ Меним къарарларымны беджеринъиз, Меним низамнамелеримни тутунъыз ве оларгъа коре яшанъыз. Мен – РАББИм, сизинъ Алланъыз.

⁵ Меним низамнамелеримни ве къарарларымны тутунъыз ве беджеринъиз. Оларны беджерген адам оларнынъ ярдымынен яшайджакъ. Мен – РАББИм.

⁶ Ич кимсе озь сой-сопунен ятмагъа ниетленмесин. Мен – РАББИм.

⁷ Ананънен ве бабанънен ятма. Ананънен ятма. О, сенинъ ананъдыр.

⁸ Бабанънынъ апайынен ятма. Бу – бабанънынъ аврет ерлерининъ ачылышыдыр.

⁹ Озь татанънен, къызкъардашынънен, бабанънынъ къызынен я да ананънынъ къызынен ятма. Олар сенинъ къорантанъда я да башкъа къорантада догъгъан олса да, эп бир оларнен ятма.

¹⁰ Огълунънынъ къызынен я да къызынънынъ къызынен ятма. Бу – сенинъ аврет ерлеринънинъ ачылышыдыр.

¹¹ Бабанъдан догъгъан, бабанънынъ апайынынъ къызынен ятма. О – сенинъ татанъ я да къызкъардашынъ. Онен ятма.

¹² Аланънен ятма. О – бабанънынъ догъмушыдыр.

¹³ Тизенънен ятма. О – ананънынъ догъмушыдыр.

¹⁴ Эмдженънен ятма ве онынъ апайына якъынлашма. О, сенинъ дудунъдыр.

¹⁵ Келининънен ятма. О – огълунънынъ апайыдыр, онен ятма.

¹⁶ Дудунънен ятма. Бу – агъанънынъ аврет ерлерининъ ачылышыдыр.

¹⁷ Къадыннен ве онынъ къызынен ятма. Огълунынъ къызынен ве къызынынъ къызынен ятмагъа ниетленме. Олар къадыннынъ якъын сойларыдыр. Бу – яманлыкътыр.

¹⁸ Къадынгъа ве онынъ татасына бирден эвленме. Ёкъса олар бири-бирини куньлер. Сенинъ апайынъ сагъ олгъанда, онынъ татасынен я да къызкъардашынен ятма.

¹⁹ Апайынъ устю кирли олгъанда, онен ятмакъ ичюн якъынлашма.

²⁰ Башкъа адамнынъ апайынен ятма. Ёкъса сен урлугъынъны йиберип, арамланырсынъ.

²¹ Эвлятларынъны атештен кечирип, Молек путуна берме ве бунынънен Алланънынъ Адыны яманлама. Мен – РАББИм.

²² Апайнен яткъанынъ киби, акъайнен ятма. Бу, пистир.

²³ Насылдыр айваннен ятма. Ёкъса сен урлугъынъны йиберип, арамланырсынъ. Къадын да джынсий мунасебетте булунмакъ ичюн айваннынъ огюне турмасын. Бу, пистир.

²⁴ Бутюн айтылгъанларынен озюнъни арамламанъыз. Мен огюнъизден бутюн къувалайджакъ халкълар айны бу ишлернен озьлерини арамладылар.

²⁵ Бутюн топракъ арам олды. Шунынъ ичюн Мен халкъларны бутюн яманлыкълары ичюн джезаларым, ве ер юзю онынъ устюнде яшагъанларны къусаджакъ.

²⁶ Сизлер исе, эм исраиллилерден олгъан, эм аранъызда яшагъан кельмешеклерден олгъан эр кес Меним низамнамелеримни ве къарарларымны беджеринъиз, бу пис ишлерни япманъыз.

²⁷ Бу топракъта сизден эвель яшагъан халкълар бутюн бу пис шейлерни япа эдилер, ве топракъ арам олды.

²⁸ Топракъ сизден эвель яшагъан халкъларны къускъаны киби, сиз топракъны арамлайджакъ вакъытта о, сизлерни де къусаджакъ.

²⁹ Бойле пис шейлерни япкъан адамларнынъ джанлары халкъ арасындан ёкъ этиледжеклер.

³⁰ Буюргъанларымны беджеринъиз ве сизден эвель олгъан адамларнынъ пис низамнамелерини тутманъыз, оларнынъ себебинден арам олманъыз. Мен – РАББИм, сизинъ Алланъыз.