Левийлилер 16 - Мукъаддес Китап

Элялланув акъкъында

¹ РАББИнинъ огюне ябанджы атешнен кельген Харуннынъ эки огълунынъ олюминден сонъ, РАББИ Мусанен лаф этти.

² РАББИ Мусагъа бойле деди: – Харун агъанъа айт ки, онъа ольмемек ичюн, перденинъ артындаки Энъ Мукъаддес Ерге, Сандыкънынъ устюндеки Мерамет Ерининъ огюне истеген вакътында кирмесин. Мерамет Ерининъ устюнде Мен булут ичинде корюнирим.

³ Харун Энъ Мукъаддес Ерге гуна ичюн къурбан яш бузавынен ве бутюнлей якъыладжакъ къурбанлыкъ къочкъарынен кирсин.

⁴ Устюне мукъаддес кетен халат кийсин, тюбюнде кетен штан олсун, белини кетен къушакънен багъласын ве кетен чалма сарсын. Бу – мукъаддес урбалардыр. Озю сувнен ювунгъан сонъ, о, оларны кийсин.

⁵ О, Исраиль огъулларынынъ джемаатындан гуна ичюн къурбан оларакъ эки текени ве бутюнлей якъыладжакъ къурбан оларакъ бир къочкъарны алсын.

⁶ Харун озь гунасы ичюн къурбан оларакъ бир бузавны кетирсин ве бойле этип, озю ве къорантасы ичюн одеме этсин.

⁷ Сонъ эки текени алсын ве оларны РАББИнинъ огюнде, Корюшюв Чадырынынъ кириши огюнде къойсун.

⁸ Харун эки теке акъкъында джереп чексин. Бир теке РАББИге олсун, экинджиси къувалансын.

⁹ Харун джерепте РАББИге тюшкен текени алсын ве оны гуна ичюн къурбан оларакъ чалсын.

¹⁰ Джерепке коре къуваланаджакъ текени исе РАББИнинъ огюнде тири алда къойсун, онынъ ярдымынен одеме этсин ве сонъ оны сахрагъа къуваласын.

¹¹ Харун озь гунасы ичюн къурбан оларакъ бузавны кетирсин, онынъ ве онынъ эви ичюн одеме этсин ве гунасы ичюн къурбан бузавны чалсын.

¹² РАББИнинъ огюндеки къурбан еринден къорларны алсын, комюр табагъына толдурсын, уфалгъан хош къокъулы отлардан эки толу авуч алып, перде артына кирсетсин.

¹³ Анда къокъулы отларны РАББИнинъ огюнде атеш устюне къойсун. Къокъу булуты Шаатлыкъ устюндеки Мерамет Ерини къаплар. Харун ойле япса, ольмез.

¹⁴ Сонъ бузавнынъ бираз къаныны алсын ве пармагъынен Мерамет Ерининъ устюне, шаркъ тарафына сепсин. Бираз къанны озь пармагъынен Мерамет Ерининъ огюне еди кере сепсин.

¹⁵ Сонъ халкънынъ адына гуна ичюн къурбан оларакъ текени чалсын, онынъ къаныны перде артына кирсетсин, бузавнынъ къанынен не япкъан олса, айны шуны япсын: оны Мерамет Ерининъ устюне ве Мерамет Ерининъ огюне сепсин.

¹⁶ Бойле этип, Мукъаддес Ер ичюн, Исраиль халкъынынъ арамлыгъы, джинаетлери ве эр бир гуналары ичюн одеме этсин. Оларнен берабер булунгъан, оларнынъ арамлыкълары ичинде ерлешкен Корюшюв Чадырынен айны шуны япсын.

¹⁷ Харун Мукъаддес Ерде одеме этмек ичюн киргенден тышары чыкъмагъандже, Корюшюв Чадырында башкъа ич бир кимсе булунмасын. Бойлеликнен, о, озю, къорантасы ве бутюн Исраиль джемааты ичюн одеме этсин.

¹⁸ Харун РАББИнинъ огюндеки къурбан ерине чыкъсын ве онынъ ичюн одеме этсин. Бузавнынъ бираз къаныны ве текенинъ бираз къаныны алсын ве къурбан ерининъ бойнузларына эр тарафлама къойсун.

¹⁹ Сонъ бираз къанны пармагъынен къурбан ерине еди кере сепсин. Бойле этип, оны азиз этсин ве Исраиль огъулларынынъ арамлыкъларындан элялласын.

Къуваланаджакъ теке

²⁰ Мукъаддес Ер ичюн, Корюшюв Чадыры ве къурбан ери ичюн одеме этип битирсин. Сонъ тири текени кетирсин.

²¹ Харун тири текенинъ башына къолларыны къойсун ве онынъ устюнден Исраиль огъулларынынъ бутюн къабаатларыны, джинаетлерини, гуналарыны айтсын ве оларнынъ эписини текенинъ башына юклесин. Сонъ бу иш ичюн айырылгъан бир адамнен бу текени сахрагъа йиберсин.

²² Адам текени сахрагъа ёлласын, ве теке бутюн къабаатларны адам олмагъан ерге алып кетсин.

²³ Харун Корюшюв Чадырына кирсин, Энъ Мукъаддес Ерге киргенинде, устюне кийген кетен урбаларыны чыкъарсын ве оларны анда къалдырсын.

²⁴ О, азиз ерде сувнен ювунсын ве озь урбаларыны кийсин. Сонъ чыкъсын ве озюнинъ ве халкънынъ адына бутюнлей якъыладжакъ къурбанларны кетирсин ве бойле этип, озю ве халкъы ичюн одеме этсин.

²⁵ Гуна ичюн къурбаннынъ ягъыны къурбан ерининъ устюнде якъсын.

²⁶ Къуваланаджакъ текени алып кеткен адам урбаларыны ве озь беденини сувнен ювсун. Сонъ ордугъа кирсин.

²⁷ Гуна ичюн къурбан оларакъ чалынгъан ве къанлары Мукъаддес Ерде одеме этмек ичюн къулланылгъан бузавны ве текени ордудан тыш чыкъарсынлар ве оларны терилеринен, этлеринен ве арамлыкъларынен берабер якъсынлар.

²⁸ Буларны якъкъан адам озь урбаларыны ве озь беденини сувнен ювсун. Сонъ ордугъа кирсин.

Одеме этюв куню

²⁹ Сиз ичюн бойле эбедий низамнаме олсун: единджи айнынъ онунджы куню алчакъгонъюлли олунъыз ве ишке янашманъыз. Эм озьлеринъиз, эм аранъызда яшамакъ ичюн ерлешкен кельмешеклер буны япсынлар.

³⁰ Шу куню сизлер ичюн одеме этелер, РАББИнинъ огюнде сиз азиз олунъыз деп, сизлерни бутюн гуналарынъыздан темизлейлер.

³¹ О кунь сиз ичюн энъ муим раатлыкъ кунюдир. Алчакъгонъюлли олунъыз. Бу – эбедий низамнамедир.

³² Бабасы ерине руханийликке багъышлангъан ве ягънен сюртюльген руханий одеме этсин. О мукъаддес кетен урбаларыны кийсин

³³ ве Азиз Ер ве Корюшюв Чадыры ичюн одеме этсин. Къурбан ери, руханийлер ве бутюн джемаат халкъы ичюн де одеме этсин.

³⁴ Бу сиз ичюн эбедий низамнаме олсун: Исраиль халкъынынъ бутюн гуналары ичюн йылда бир кере одеме этсинлер. РАББИ Мусагъа насыл буюргъан олса, ойле де япылгъан эди.