Левийлилер 15 - Мукъаддес Китап

Арамлангъан адамлар акъкъында къанун

¹ РАББИ Мусагъа ве Харунгъа бойле деди:

² – Исраиль огъулларына бойле илян этинъиз: Адамнынъ беденинден бир акъув олгъанда, озь акъувындан о адам арамдыр.

³ Акъувы ичюн арамлыкъ акъкъында къанун будыр. Акъув акъа берсе де, акъып битсе де, адам энди арамдыр.

⁴ Акъувы олгъан адамнынъ яткъан эр тюрлю тёшеги, отургъан эр бир ери арамдыр.

⁵ Ким онынъ яткъан ерине токъунса, озюни ве озь урбаларыны сувнен ювмакъ керек. Акъшамгъадже о, арам олур.

⁶ Ким акъувы олгъан адамнынъ отургъан ерине отурса, озюни ве озь урбаларыны сувнен ювмакъ керек. Акъшамгъадже о, арам олур.

⁷ Ким акъувы олгъан адамнынъ тенине токъунса, озюни ве озь урбаларыны сувнен ювмакъ керек. Акъшамгъадже о, арам олур.

⁸ Акъувы олгъан адам темиз адамгъа тюкюрсе, шу адам озюни ве озь урбаларыны сувнен ювмакъ керек. Акъшамгъадже о, арам олур.

⁹ Акъувы олгъан адам отургъан эр араба акъшамгъадже арам олур.

¹⁰ Ким онынъ отургъан бирде-бир шейге токъунса, акъшамгъадже арам олур. Ким буларнынъ бирде-бир шейини ташыса, о, озюни ве озь урбаларыны сувнен ювмакъ керек. Акъшамгъадже о, арам олур.

¹¹ Акъувы олгъан адам къолларыны ювмаздан биревге токъунса, о адам озюни ве озь урбаларыны сувнен ювмакъ керек. Акъшамгъадже о, арам олур.

¹² Акъувы олгъан адам бирде-бир балчыкъ бардакъкъа токъунса, оны парламакъ керек. Агъачтан япылгъан эр бир савутны сувнен ювмакъ керек.

¹³ Акъувы олгъан адамнынъ акъувы кесильген сонъ, о темизленмек ичюн еди кунь беклесин. Сонъ о, урбаларыны ювсун. Озь беденини о, чокъракъ сувунен ювмакъ керек. Сонъ о, темиз олур.

¹⁴ Секизинджи куню о, эки кийик гогерджинни я да эки гогерджин баласыны алсын, РАББИнинъ огюне, Корюшюв Чадырынынъ киришине кельсин ве оларны руханийге берсин.

¹⁵ Руханий бирини гуна ичюн къурбан оларакъ, экинджисини исе бутюнлей якъыладжакъ къурбан оларакъ кетирсин. Бойле этип, руханий онынъ акъувы ичюн РАББИнинъ огюнде одеме этсин.

¹⁶ Бир акъайнынъ урлугъы акъкъанда, о, бутюн беденини сувнен ювсун. Акъшамгъадже о, арам олур.

¹⁷ Урлукъ тийген эр бир урба я да териден япылгъан шей де ювулсын. Акъшамгъадже о, арам олур.

¹⁸ Акъай къадыннен ятып, акъайда урлугъы акъкъанда, олар экиси де сувнен ювунсынлар. Акъшамгъадже олар арам олур.

¹⁹ Къадыннынъ устю кирленгенде, онынъ беденинден къан акъкъанда, о, темизленмек ичюн, еди кунь беклесин. Онъа токъунгъан эр ким акъшамгъадже арам олур.

²⁰ Устю кирленген вакътында, темизленюв вакътында къадыннынъ эр яткъан, эм де эр отургъан ери арам олур.

²¹ Ким къадыннынъ тёшегине токъунса, озюни ве озь урбаларыны сувнен ювмакъ керек. Акъшамгъадже о, арам олур.

²² Ким къадыннынъ отургъан насылдыр шейине токъунса, озюни ве озь урбаларыны сувнен ювмакъ керек. Акъшамгъадже о, арам олур.

²³ Къадыннынъ яткъан тёшегине я да отургъан шейине токъунгъан эр кес акъшамгъадже арам олур.

²⁴ Эгер акъайы онен ятса, онынъ арамлыгъы акъайына кечеджек. О акъай еди кунь арам олур, ве о, ятаджакъ тёшек де арам олур.

²⁵ Къадыннынъ устю кирленген куньлеринден тыш вакъытта онынъ къан акъувы олгъанда, я да акъув адеттеки куньлеринден сонъ девам эткенде, устю кирленген куньлериндеки киби, бутюн акъув куньлеринде о, арам олур.

²⁶ Устю кирли олгъан вакътында киби, бутюн акъув вакътында о яткъан эр бир тёшек, эр бир отургъан шей арам олур. Бу, устю кирленген вакътында, темизленюв вакътында олгъан арамлыкъкъа ошай.

²⁷ Оларгъа токъунгъан эр ким арам олур. О озюни ве озь урбаларыны сувнен ювмакъ керек. Акъшамгъадже о, арам олур.

²⁸ Онынъ акъувы биткен сонъ, къадын еди кунь беклесин. Сонъ о, темиз олур.

²⁹ Секизинджи куню о, эки кийик гогерджинни я да эки гогерджин баласыны алсын ве оларны руханийге, Корюшюв Чадырынынъ киришине кетирсин.

³⁰ Руханий бирини гуна ичюн къурбан оларакъ, экинджисини исе бутюнлей якъыладжакъ къурбан оларакъ чалсын. Бойле этип, руханий онынъ акъувы ичюн РАББИнинъ огюнде одеме этсин.

³¹ Бойле этип, Исраиль огъулларыны арамлыкътан къорчаланъыз. Ойле олмаса, оларнынъ арасында олгъан Мескенимни арамлайджакълар ве озь арамлыгъында оледжеклер.

³² Будыр – адамны арам эткен акъув ве урлукънынъ акъувы акъкъында къанун,

³³ эм де темизленюв вакътында устю кирленген къадын, акъувлары олгъан акъай я да къадын, арам олгъан къадыннен яткъан акъай акъкъында къанундыр.