Левийлилер 14 - Мукъаддес Китап

Тедавийленген адамларнынъ темизленюви акъкъында

¹ РАББИ Мусагъа бойле деди:

² – Мына тери хасталыгъы олгъан адамны насыл темизлемек акъкъында къанундыр. Меселени руханийге бильдирсинлер.

³ Руханий ордудан тыш чыкъып, хастаны бакъсын. Эгер хаста озь тери хасталыгъындан тюзелип яхшы олгъан олса,

⁴ руханий темизленеджек адам ичюн эки тири элял къушны, кедр терегини, ачыкъ къырмызы йипни ве эзов отуны алып кетирмеге буюрсын.

⁵ Руханий чокъракъ сувунен толдурылгъан балчыкъ бардакъ устюнде бир къушны соймагъа эмир этсин.

⁶ Сонъ руханий сагъ къалгъан къушны алсын ве оны, эм де кедр терегини, ачыкъ къырмызы йипни ве эзов отуны чокъракъ сувунынъ устюнде союлгъан къушнынъ къанына батырсын

⁷ ве тери хасталыгъындан темизленеджек адамгъа еди кере сепсин. Сонъ руханий хастаны темиз деп илян этсин, тири къушны исе чёльге йиберсин.

⁸ Темизленеджек адам урбаларыны ювсун, бутюн сачларыны тыраш этсин, сувнен ювунсын, ве сонъра темиз оладжакъ. Сонъ онынъ ордугъа кирмеге акъкъы оладжакъ, амма еди кунь о озь чадырындан тыш яшасын.

⁹ Единджи куню о башындаки бутюн сачларыны, сакъалыны, къашларыны ве тенинде олгъан бутюн сачларны тыраш этсин, урбаларыны ювсун, беденини де сувнен ювсун. Сонъ о, темиз оладжакъ.

¹⁰ Секизинджи куню о, эки къусурсыз къозуны, бир йыллыкъ къусурсыз къойны, ашлыкъ бахшышы оларакъ зейтюн ягъынен къарыштырылгъан учь чанакъ энъ яхшы богъдай унны ве бир кучюк бардачыкъ зейтюн ягъыны алып кетирсин.

¹¹ Темизлеген руханий бутюн бу шейлерни ве темизленеджек адамны РАББИнинъ огюне Корюшюв Чадырынынъ кириши огюне къойсун.

¹² Руханий бир къозуны алып, оны кучюк бардачыкъ зейтюн ягъынен берабер къабаат ичюн къурбан оларакъ кетирсин ве салландырыладжакъ бахшыш оларакъ РАББИнинъ огюнде котерсин.

¹³ О, къозуны азиз ерде, гуна ичюн къурбан ве бутюнлей якъыладжакъ къурбан союлгъан ерде сойсун. Къабаат ичюн бу къурбан – гуна ичюн къурбан кибидир. О, руханийнинъки олсун. Бу – улу азизликтир.

¹⁴ Руханий къабаат ичюн къурбаннынъ бираз къаныны алсын ве темизленеджек адамнынъ онъ къулагъынынъ мемесине, онъ къолунынъ баш пармагъына ве онъ аягъынынъ баш пармагъына сюртсюн.

¹⁵ Сонъ руханий бираз зейтюн ягъыны сол авучына тёксюн,

¹⁶ онъ къолунынъ пармагъыны сол авучындаки ягъгъа батырсын ве РАББИнинъ огюне еди кере ягъны сепсин.

¹⁷ Сонъ авучындаки ягъны руханий темизленеджек адамнынъ онъ къулагъынынъ мемесине, онъ къолунынъ баш пармагъына, онъ аягъынынъ баш пармагъына, къабаат ичюн къурбандан олгъан къан ерлерине сюртсюн.

¹⁸ Авучында къалгъан зейтюн ягъыны руханий темизленеджек адамнынъ башына къойсун ве РАББИнинъ огюнде онынъ ичюн одеме этсин.

¹⁹ Руханий гуна ичюн къурбанны кетирсин, темизленеджек адамнынъ ичюн одеме этсин ве оны озь арамлыгъындан темизлесин. Сонъра о, бутюнлей якъыладжакъ къурбанны кетирсин.

²⁰ Руханий бутюнлей якъыладжакъ къурбанны ве ашлыкъ бахшышыны къурбанлыкъ устюне къойсун. Бойле этип, о адам ичюн одеме этсин. Сонъ о, темиз оладжакъ.

²¹ Эгер адам фукъаре олып, буларны алмагъа чареси олмаса, о, озю ичюн одеме этмеге, къабаат ичюн къурбан оларакъ, салландырыладжакъ бахшыш оларакъ бир къозуны алып кетирсин, эм де ашлыкъ бахшышы оларакъ зейтюн ягъынен къарыштырылгъан бир чанакъ энъ яхшы богъдай унуны ве бир кучюк бардачыкъ зейтюн ягъыны алып кетирсин.

²² Эм де кучю олгъаны къадар, эки кийик гогерджинни я да эки гогерджин баласыны алсын. Олардан бири – гуна ичюн къурбан, экинджиси исе – бутюнлей якъыладжакъ къурбан олсун.

²³ Темизленювининъ секизинджи куню о, оларны руханийге, Корюшюв Чадырынынъ киришине, РАББИнинъ огюне кетирсин.

²⁴ Руханий къабаат ичюн къурбан къозусыны ве кучюк бардачыкъ зейтюн ягъыны алсын ве буларны салландырыладжакъ бахшыш оларакъ РАББИнинъ огюнде котерсин.

²⁵ Къабаат ичюн къурбан къозусыны чалсын. Руханий къабаат ичюн къурбаннынъ бираз къаныны алсын, темизленеджек адамнынъ сагъ къулагъынынъ мемесине, онъ къолунынъ баш пармагъына ве онъ аягъынынъ баш пармагъына сюртсюн.

²⁶ Сонъ руханий сол авучына бираз зейтюн ягъыны тёксюн.

²⁷ Сагъ пармагъыны сол авучнынъ ягъына батырсын ве РАББИнинъ огюнде еди кере сепсин.

²⁸ Сонъ авучындаки ягъны руханий темизленеджек адамнынъ онъ къулагъынынъ мемесине, онъ къолунынъ баш пармагъына, онъ аягъынынъ баш пармагъына, къабаат ичюн къурбандан олгъан къан ерлерине сюртсюн.

²⁹ Авучында къалгъан зейтюн ягъыны руханий темизленеджек адамнынъ башына къойсун ве РАББИнинъ огюнде онынъ ичюн одеме этсин.

³⁰ Темизленеджек адамнынъ кетирген шейине коре, о, бир кийик гогерджинни я да бир гогерджин баласыны алсын

³¹ ве бир къушны гуна ичюн къурбан оларакъ кетирсин, экинджисини исе ашлыкъ бахшышынен берабер бутюнлей якъыладжакъ къурбан оларакъ кетирсин. Бойле этип, руханий темизленеджек адам ичюн РАББИнинъ огюнде одеме этсин.

³² Бу, тери хасталыгъы олгъан, амма темизленген вакътында ёкъсул олгъан адам акъкъында къанундыр.

Эв устюндеки куф акъкъында

³³ РАББИ Мусагъа ве Харунгъа бойле деди:

³⁴ – Мен сизге мульк оларакъ береджек Ханаан топрагъына киргенинъизде, топрагъынъыздаки эвлеринъизге куфни ёлласам,

³⁵ эв саиби руханийге барсын, эвинде куфке ошагъан шей пейда олгъаны акъкъында хабер этсин.

³⁶ Руханий эвге кирмезден эвель, онынъ буюргъанына коре, эв ичиндеки эписи шейлерни тышкъа чыкъарсынлар. Ёкъса эв ичиндеки бутюн шейлер арам оладжакълар. Бундан сонъ руханий эвни корьмеге кельсин.

³⁷ О, куфке бакъсын. Эгер эв диварларындаки куф ешильтим я да къырмызылы лекелер олып, диварнынъ ичине кирип кеткен олса,

³⁸ руханий эвден киришине чыкъсын ве эвни еди куньге къапатсын.

³⁹ Единджи куню руханий артына къайтсын ве кене эвни бакъсын. Эгер о, куф диварлар бою даркъалгъаныны корьсе,

⁴⁰ руханий куфлю ташларны чыкъармагъа ве шеэрден тышарыгъа, арам бир ерге атмагъа буюрсын.

⁴¹ Эвнинъ ичини къырсынлар ве къырылгъаныны шеэрден тышарыгъа, арам бир ерге тёксюнлер.

⁴² Чыкъарылгъан ташларнынъ ерине башкъа ташларны къойсунлар, эвни янъы тобанлы балчыкънен сыласынлар.

⁴³ Ташлары чыкъарылып, сылавы къырылып, янъыдан сылангъан эвнинъ диварларында куф кене пейда олса,

⁴⁴ руханий барып эвни бакъсын. Куф эв бою даркъалгъан олса, бу – кечиджи куфтир. Эв арамдыр.

⁴⁵ Бу эвни йыкъмакъ керек, ташларыны, тахталарыны, бутюн сылавыны да шеэрден тышарыгъа, арам бир ерге атмакъ керек.

⁴⁶ Эвнинъ къапалы олгъан куньлеринде эвге кирген бирев акъшамгъа къадар арам олур.

⁴⁷ О эвде ятып юкълагъан я да аш ашагъан адам озь урбаларыны ювмакъ керек.

⁴⁸ Эвни янъыдан сылагъандан сонъ, руханий эвге кирип бакъкъанда, куф даркъалмагъаныны корьсе, руханий эвни темиз деп илян этсин, чюнки куф кечкен эди.

⁴⁹ Эвни темизлемек ичюн, о, эки къушны, кедр терегини, ачыкъ къырмызы йипни ве эзов отуны алсын

⁵⁰ ве чокъракъ сувунен толдурылгъан балчыкъ бардакъ устюнде бир къушны чалсын.

⁵¹ Сонъ кедр терегини, эзов отуны, ачыкъ къырмызы йипни ве тири къушны алсын, оларны союлгъан къушнынъ къанына ве чокъракъ сувуна батырсын, эвнинъ устюне еди кере сепсин.

⁵² Бойле этип, о, эвни къушнынъ къанынен, чокъракъ сувунен, тири къушнен, кедр терегинен, эзов отунен ве ачыкъ къырмызы йипнен темизлейджек.

⁵³ Сонъра тири къушны шеэрден тыш, тарлагъа йиберсин ве эв ичюн одеме этсин. Сонъ эв темиз олур.

⁵⁴ Эр тюрлю тери хасталыгъы, къуйпа,

⁵⁵ урба устюндеки ве эв ичиндеки куф,

⁵⁶ шишик, къабукълы яра ве парлакъ лекелер акъкъында къанундыр. Булар не вакъыт арам, не вакъыт темиз олгъаны бу къанунгъа коре белли олсун. Тери хасталыгъы ве куф акъкъындаки къанун будыр.