Левийлилер 12 - Мукъаддес Китап

Догъувдан сонъ темизленюв акъкъында

¹ РАББИ Мусагъа бойле деди:

² – Исраиль огъулларына бойле айт: Бир къадын юкке къалып огълан бала тапкъан сонъ, еди кунь девамында арам олур. Устю кирленген куньлеринде киби, о, арам олур.

³ Секизинджи куню бала сюннет этильсин.

⁴ Къадын 33 кунь беклеп, къанларындан темизленсин. Ич бир азиз шейге токъунмасын, темизленюв куньлери битмегендже, Азиз Ерге якъынлашмасын.

⁵ Къадын къыз бала тапкъан сонъ исе, эки афта девамында арам олур. Устю кирленген куньлеринде киби, о, арам олур. Сонъра о, 66 кунь беклеп, къанларындан темизленсин.

⁶ Огълан я да къыз бала ичюн темизленюв куньлери кечкен сонъ, къадын руханийге, Корюшюв Чадырынынъ киришине бутюнлей якъыладжакъ къурбан оларакъ бир йыллыкъ къозуны, эм де гуна ичюн къурбан оларакъ гогерджин баласыны я да кийик гогерджинни кетирмек керек.

⁷ Руханий буны РАББИнинъ огюне кетирсин ве къадын ичюн одеме этсин. Сонъ о, озь къанларындан темиз оладжакъ. Огълан я да къыз бала тапкъан къадын акъкъындаки къанун будыр.

⁸ Эгер бу къадын къойны кетирип оламаса, эки кийик гогерджинни я да эки гогерджин баласыны кетирсин. Биринджиси – бутюнлей якъыладжакъ къурбан, экинджиси – гуна ичюн къурбан олсун. Руханий онынъ ичюн одеме этсин, ве къадын темиз оладжакъ.