Левийлилер 11 - Мукъаддес Китап

Арам ве элял айванлар акъкъында

¹ РАББИ Мусагъа ве Харунгъа бойле деди:

² – Исраиль огъулларына бойле айт: Ер юзюнде яшагъан бутюн айванлардан буларны ашамагъа мумкюн.

³ Туякълары болюнген, я да экиге айырылгъан ве кевшекни кевшеген эр бир айванны ашанъыз.

⁴ Лякин кевшекни кевшеген ве туякълары экиге болюнген айванлардан мына буларны ашаманъыз. Девени ашаманъыз, чюнки о, кевшекни кевшесе де, онынъ экиге болюнген туякълары ёкъ. О, сиз ичюн арамдыр.

⁵ Къая къоянны ашаманъыз, чюнки о, кевшекни кевшесе де, онынъ экиге болюнген туякълары ёкъ. О, сиз ичюн арамдыр.

⁶ Тавшанны ашаманъыз, чюнки о, кевшекни кевшесе де, онынъ экиге болюнген туякълары ёкъ. О, сиз ичюн арамдыр.

⁷ Домузны ашаманъыз, чюнки туякълары болюнген, я да экиге айырылгъан олса да, о, кевшемей. О, сиз ичюн арамдыр.

⁸ Бу айванларнынъ этини ашаманъыз, олюсине де токъунманъыз. Олар сиз ичюн арамдыр.

⁹ Сувда яшагъанларнынъ эписинден буларны ашамакъ мумкюн. Сувда, денъизде я да дерьяларда яшагъан ялдавучларынен пуллары олгъанларнынъ эр тюрлю сойларыны ашанъыз.

¹⁰ Сувда ялдагъанларнынъ ве яшагъанларнынъ эписи сойларындан, денъиздеки ве дерьялардаки пулларынен ялдавучлары олмагъан сойлары сиз ичюн арамдыр.

¹¹ Булар сиз ичюн арам; этлерини ашаманъыз, олюлери де сиз ичюн пистир.

¹² Сувда яшагъан бутюн пулларынен ялдавучлары олмагъан сойлары сиз ичюн арам.

¹³ Мына бу къушлардан игренинъиз, буларны арам сайып, ашаманъыз: къарталны, акъбабаны, денъиз къарталыны,

¹⁴ шаинни, санкъурны ве онынъ ич бир союны,

¹⁵ къузгъунны ве онынъ ич бир союны,

¹⁶ девекъушуны, миявкъушны, чагъаланы, къыргъыйны ве онынъ ич бир союны,

¹⁷ пугъуны, бакъланны, аджибабаны,

¹⁸ акъ байкъушны, къашыкъ къушны, леш къарталыны,

¹⁹ лейлекни, балыкъ чильни ве онынъ ич бир союны, опепопны ве яркъанатны.

²⁰ Къанатлары олгъан, лякин ерге дёрт аягъынен баскъан боджеклернинъ эписи сиз ичюн арамдыр.

²¹ Къанатлары олгъан, ерге дёрт аягъынен баскъан боджеклерден тек узун баджакълы аякъларыны сычрамакъ ичюн къуллангъан базыларыны ашамагъа мумкюн.

²² Буларны ашанъыз: чёль сарынчкъаны ве онынъ союны, адий сарынчкъаны ве онынъ союны, чегертки ве онынъ союны, ве чырчырнаны ве онынъ союны.

²³ Къалгъан башкъа эписи дёртаякълы ве къанатлы олгъан боджеклер сиз ичюн арам.

²⁴ Сизни арам этеджек шейлер булардыр: айтылгъанларнынъ олюсине токъунгъан эр ким акъшамгъадже арам олур.

²⁵ Ким буларнынъ олюсини къолуна алса, урбасыны ювмакъ керек ве акъшамгъадже арам олур.

²⁶ Туякълары болюнген, амма экиге айырылмагъан, эм де кевшекни кевшемеген эр бир айван сиз ичюн арамдыр. Оларгъа токъунгъан эр бир адам арам олур.

²⁷ Дёртаякълы айванлардан панджаларынен ерге басып юргенлер сиз ичюн арамдыр. Оларнынъ олюсине токъунгъан эр бир адам акъшамгъадже арам олур.

²⁸ Оларнынъ олюсини къолуна алгъан адам озь урбасыны ювдурсын. Акъшамгъадже о, арам олур. Бу айванлар сиз ичюн арамдыр.

²⁹ Ер юзюнде огъул чыкъаргъан махлюкълардан булар сиз ичюн арамдыр: кёр сычан, сычан, кесертки ве онынъ сою,

³⁰ геккон, варан, саламандра ве хамелеон.

³¹ Ер юзюнде огъул чыкъаргъан махлюкълардан булар сиз ичюн арамдыр. Оларнынъ олюсине токъунгъан эр ким акъшамгъадже арам олур.

³² Эгер оларнынъ олюси бир шейге тюшсе, о шей арам олур: эр бир агъач савут, я да урба, я да тери, я да чувал, я да башкъа бир ишке ярагъан шей арамланаджакъ. Оларны сув ичине къоймакъ керек. Акъшамгъадже олар арам оладжакъ, сонъра исе темизленеджек.

³³ Булардан бири балчыкъ бардакъкъа тюшсе, ичиндеки арамланаджакъ. Савутны парламакъ керек.

³⁴ Бу савуттан ичине сув къошулгъан эр бир аш, эм де ичине бойле савуттан къошулгъан сувнен ичимлик арам оладжакъ.

³⁵ Шу махлюкъларнынъ олюси ненинъ устюне тюшсе, оны арамлар. Собанен оджакъны бозмакъ керек. Олар арам ве сиз ичюн арам къаладжакъ.

³⁶ Ялынъыз чокъракъ ве таш ичинде оюлып япылгъан хавузнынъ суву темиз къаладжакъ. Шу махлюкъларнынъ олюсине токъунгъан адам арам олур.

³⁷ Эгер бу махлюкъларнынъ олюси сачыладжакъ урлукъ устюне тюшсе, о урлукъ темиз олур.

³⁸ Амма олюси сувгъа къоюлгъан урлукъ устюне тюшсе, урлукъ сиз ичюн арамдыр.

³⁹ Эти ашалгъан айванлардан бири ольгенде, онынъ олюсине токъунгъан адам акъшамгъадже арам олур.

⁴⁰ Айваннынъ олюсини ашагъан адам озь урбаларыны ювсун ве акъшамгъадже арам олур. Онынъ олюсини алып кеткен адам да урбаларыны ювсун ве акъшамгъадже арам олур.

⁴¹ Ер юзюнде огъул чыкъаргъан махлюкълар сиз ичюн арамдыр, оларны ашамагъа олмаз.

⁴² Къурсакъ устюнде сюйрекленгенлерни, дёртаякълы юргенлерни я да чокъаякълы махлюкъларны, эм де ер юзюнде огъул чыкъаргъан ич бир махлюкъларны ашаманъыз, чюнки олар арамдыр.

⁴³ Насылдыр огъул чыкъаргъан махлюкълар себебинден джанларынъызны пис этменъиз, оларнынъ себебинден озьлеринъизни арамламанъыз.

⁴⁴ Мен – РАББИм, сизинъ Алланъыз. Озьлеринъизни азиз этинъиз. Азиз олунъыз, чюнки Мен азизим. Ер юзюнде сюйрекленген махлюкънынъ себебинден джанынъызны арамламанъыз.

⁴⁵ Мен – РАББИм. Сизинъ Алланъыз олмакъ ичюн, Мен сизни Мысыр топрагъындан чыкъардым. Шунынъ ичюн азиз олунъыз, чюнки Мен азизим.

⁴⁶ Айванлар, къушлар, сувда ве ер юзюнде эр бир чокълашкъан ве къыбырдагъан махлюкълар акъкъында къанун будыр.

⁴⁷ Арам шейни элял шейден айырынъыз, эти ашамагъа мумкюн олгъан айванларны мумкюн олмагъан айванлардан айырынъыз.