Хошеа 7 - Мукъаддес Китап

¹ Мен Исраильге шифа берген вакътында, Эфраимнинъ къабааты ве Самариенинъ ярамазлыгъы ачыла. Олар алдата, хырсызлар эвлерге кире, сокъакъ бою айдутлар сыдыра.

² Мен оларнынъ яманлыкъларыны унутмайджагъым, олар исе бунынъ акъкъында тюшюнмей. Энди япкъан ишлери оларны сарар, козюм огюнден кетмез.

Акъыл огретювге Исраиль садакъатсызлыкъ бильдире

³ Олар яманлыкъларынен – падишаны къувандыра, яланларынен – башлыкъларыны шенълендире.

⁴ Оларнынъ эписи фурундаки атешке ошай: фурунджы атешни якъкъан сонъ, хамырны баса ве онъа минмеге ёл бере, алевни исе бир даа къарыштырмагъа керекмей. Олар да сёнмейип, ороспулыкътан къызара.

⁵ Падишанынъ байрамларында башлыкълар шараптан хасталана. Падиша исе макътанчакъларнен анълаша.

⁶ Фитнелерден юреклери, фурун киби, яна, бутюн гедже ачувлары къыбырдай, сабасына исе, алев киби, парылдай.

⁷ Оларнынъ эписи – фурун киби къызгъын, ёлбашчыларны ютып битирелер. Оларнынъ эписи падишалары йыкъылды, лякин кимсе Мени ярдымгъа чагъырмай.

⁸ Эфраим халкъы башкъа халкъларнен къарышты, Эфраим чевирильмеген отьмекке ошады.

⁹ Ябанджылар онынъ кучюни ашады, о исе буны бильмеди. Башы чаларды, онынъ хабери исе ёкъ.

¹⁰ Исраильнинъ къопайлыгъы – озюне къаршы шааттыр. Бунъа бакъмадан да, олар РАББИге, Алласына къайтмады, Оны къыдырмады.

¹¹ Эфраим акъылсыз гогерджин киби олды: де мысырлыларны ярдымгъа чагъыра, де Ашшургъа кете.

¹² Олар кеткен вакътында, Мен агъымны устьлерине атаджагъым, кокте учкъан къушларны киби, оларны ерге тюшюреджегим. Джемаат эшиткен япкъан яманлыкълары ичюн, Мен оларны джезаларым.

¹³ Менден узакълашкъанлары ичюн, башларына беля! Менден вазгечкенлери ичюн, олар ёкъ этиледжек! Мен оларны къуртардым, олар исе Меним акъкъымда ялан айтты.

¹⁴ Олар тёшеклеринде агълагъанда, джан-юректен Менден ярдым сорамай. Отьмек ве шарап ичюн топланалар, Менден исе узакълашалар.

¹⁵ Мен оларгъа акъыл огреттим, къолларына кучь бердим, олар исе Манъа къаршы яманлыкъ тюшюнди.

¹⁶ Олар къайтты, амма Юдже Раббиге дегиль, ишанчсыз яй киби олды. Башлыкъларыны арсыз тиллери ичюн къылычнен ольдюрир, бунынъ ичюн оларнынъ устюнден Мысыр топрагъында кулерлер.