Хошеа 12 - Мукъаддес Китап

¹ Эфраим бошуна ельни отлата, кунь бою шаркъ ельнинъ артындан къувалай. О, яланны ве амансызлыкъны чокълаштыра, Ашшурнен барышыкъ япа, Мысыргъа зейтюн ягъыны алып кете.

² РАББИ Ехуданы да суд этеджек, Якъупны да япкъан ишлерине коре джезалайджакъ, япкъанларына коре акъкъыны береджек.

³ Якъуп ана къурсагъында биле къардашыны тепти, буюген сонъ исе Алланен курешти.

⁴ О, Мелекнен курешти ве енъди, агълап, Онынъ мераметини къыдырды. О, Алланы Бет-Эльде тапты ве анда Онен лакъырды этти.

⁵ РАББИ исе – Ордуларнынъ Алласыдыр, Онынъ Ады – РАББИдир.

⁶ Бунынъ ичюн Алланъа къайтынъыз, мерамет эйленъиз ве адалетли суд этинъиз, эр вакъыт Алланъа ишанынъыз.

Алла гуна ичюн къабаатлай

⁷ Ялан теразени къолда туткъан алыш-веришчилер алдатмагъа север.

⁸ Эфраим де бойле дей: «Мен бай олдым, чокъ барлыкъ топладым, Бутюн эткен ишлеримде гуна сайыладжакъ ич бир къабаатны тапамайджакълар».

⁹ Амма Мен, Мысырдан башлап, – сенинъ Алланъ олгъан РАББИм, байрам куньлеринде киби, сени бир даа чадырларда ерлештиреджегим.

¹⁰ Мен пейгъамберлернен лаф эттим, Мен Озюм чокъ руя оларгъа косьтердим, пейгъамберлернен кинаели икяелерни айттым.

¹¹ Гилад шеэринде яманлыкъ бармы? Олар мытлакъа гъайып оладжакъ! Гилгал шеэринде бузавларны къурбан чалалармы? Къурбан ерлери тарла меджасындаки таш обаларына чевириледжек.

¹² Якъуп Арам тарлаларына къачты, Исраиль бир апай ичюн хызмет этти, апайына эвленмек ичюн, о, къой бакъты.

¹³ РАББИ Исраильни пейгъамбернинъ ярдымынен Мысырдан чыкъарды, пейгъамбернинъ ярдымынен О, оларны къорчалай эди.

¹⁴ Эфраим Алланы пек ачувландырды, шунынъ ичюн О, онынъ къабаатыны багъышламаз, Рабби Озь джезасыны онынъ башына тюшюрир.