Хавакъкъукъ 1 - Мукъаддес Китап

¹ Хавакъкъукъ пейгъамберге руясында берильген пейгъамберлик.

Хавакъкъукънынъ Раббиге биринджи шикяети

² – Я РАББИ! Мен Сени чагъырам. Сен мени даа не къадар эшитмейджексинъ? Зорбалыкъ акъкъында къычырам. Не къадар мени къуртармайджакъсынъ?

³ Нечюн яманлыкъны манъа косьтересинъ, нечюн бу беляларны козьлерим коре? Козюм огюнде йыкъылув ве зорбалыкъ, душманлыкъ ве къавгъалар токътамай.

⁴ Шу себептен къанун озь кучюни джойды, адалетли суд ёкъ. Яманлыкъ япкъан адам инсафлыны енъе, ве адамлар догърулыкъны бозалар.

Раббининъ джевабы

⁵ – Башкъа халкъларгъа бакъынъыз, къулакъ асынъыз ве шашып къалынъыз! Сизинъ куньлеринъизде ойле бир иш япаджагъым ки, эгер сизге айтып берселер, инанмаз эдинъиз.

⁶ Мен шимди къасдийлилерни котереджегим. Бу халкъ – мераметсиз ве фикирсиз, олар ер юзюнде долашалар, озьлерининъ олмагъан топракъларны тартып алалар.

⁷ Бу, къоркъунчлы ве вахший бир халкътыр. Олар озь-озюне къанун язалар ве озьлерини юксельтелер.

⁸ Оларнынъ атлары леопардлардан тез, акъшам чыкъкъан къашкъырлардан вахшийдир. Атлар туякъларынен ерни ура, атлылары узакълардан келелер, авына атылгъан къартал киби, учып келелер.

⁹ Оларнынъ эписи зорбалыкъ япмакъ ичюн келе, оларнынъ ордулары шаркъий ель киби огге кече ве къумдан чокъча эсирлер ала.

¹⁰ Къасдийлилер падишаларны мыскъыллай, башлыкъларнынъ устюнден куле. Эр бир къавийлештирильген къале устюнден кулип, диварларнынъ тёпесинедже топракъ обалап, къалелерни эллерине алалар.

¹¹ Олар боран киби келип кечелер, лякин къабаатлы олурлар, чюнки оларнынъ алласы – озь кучюдир.

Хавакъкъукънынъ экинджи шикяети

¹² – РАББИ-Таалям, меним Мукъаддес Аллам! Чокътан берли Сен булунасынъ! Биз ольмейджекмиз! Я РАББИ, Сен къасдийлилерни тек бизни суд этмеге ёлладынъ. Меним Къаям! Оларны Ехуда халкъыны джезаламагъа йибердинъ.

¹³ Сенинъ саф козьлеринъ яманлыкъкъа бакъып оламаз, Сен акъсызлыкъкъа даянып оламайсынъ. Айса не ичюн имансызларгъа бакъып отурасынъ? Ярамазлар инсафлыларны ёкъ эткенде, не ичюн индемейсинъ?

¹⁴ Не ичюн адамларны денъиздеки балыкълар киби эттинъ, сюйрелип юрген махлюкълар киби ёлбашчысыз къалдырдынъ?

¹⁵ Душман оларны къармакънен тута, сачмаларнен сувдан чыкъара, балыкъ агъларынен авлай, бу себептен де къувана ве севине.

¹⁶ Шунынъ ичюн олар сачмаларына къурбан кетирелер, балыкъ агъларына къокъулы отларны якъалар, – агълар оларны бай эте, бол-бол ашлар кетире.

¹⁷ Не вакъыткъадже олар агъларыны толдураджакъ ве бошатаджакълар, не вакъыткъадже токътамайып, халкъларны аджымайып ольдюреджеклер?