Хагъгъай 1 - Мукъаддес Китап

Рабби Сарайны гъайрыдан къурмагъа буюра

¹ Падиша Дарьявешнинъ падишалыгъынынъ экинджи йылында, алтынджы айнынъ биринджи куню Хагъгъай пейгъамберге РАББИден бойле хабер кельди. О, Ехуда акимине Шеалтиэлнинъ огълу Зеруббавелге ве баш руханийге Ехоцадакънынъ огълу Ехошуагъа шуны айтты:

² Бу – Ордулар РАББИсининъ сёзлери: – Шу халкъ: «РАББИнинъ Эвини гъайрыдан къурмагъа вакъыт даа кельмеди», – деди.

³ РАББИ Хагъгъай пейгъамбернен исраиллилерден шойле сорады:

⁴ – Бу Эв йыкъылып яткъанда, сиз гузель эвлерде яшагъанынъыз яхшымы?

⁵ Шунынъ ичюн Ордуларнынъ РАББИси шимди шойле дей: – Япкъан ишлеринъизни яхшы тюшюнинъиз.

⁶ Сиз чокъ сачтынъыз, амма аз берекет алдынъыз. Ашайсынъыз, амма тоймайсыз. Ичесиз, амма даа ичмеге истейсиз. Кийинесинъиз, амма къызынмайсынъыз. Пара къазанасынъыз, лякин оны тешик кисеге къоясынъыз.

⁷ Ордуларнынъ РАББИси шойле дей: – Япкъан ишлеринъизни яхшы тюшюнинъиз.

⁸ Дагъларгъа чыкъыныз, агъач кетиринъиз, Меним Эвимни гъайрыдан къурунъыз. Сонъра анда Меним разылыгъым ве Шуретим оладжакъ, – дей РАББИ.

⁹ – Чокъ беклединъиз, амма аз алдынъыз, эвлеринъизге кетиргенинъизни Мен ельге савурдым. Не ичюн? Чюнки Меним Эвим йыкъылып ята, – дей Ордуларнынъ РАББИси. – Сизлер исе эр биринъиз озь эвинъизнен огърашасынъыз.

¹⁰ Шу себептен де коктен ягъмур ягъмай, чыкъ тюшмей, топракъ да озь махсулыны бермей.

¹¹ Мен топракъкъа ве дагъларгъа къургъакълыкъ ёлладым. Шунынъ ичюн топракънынъ ич бир берекети – не богъдай, не янъы шарап, не тазе зейтюн ягъынынъ берекети ёкъ. Эм адамлар, эм айванлар къыйнала, къолларынъызнынъ ишлери де файдасыз.

Халкъ Раббининъ эмирини беджере

¹² Шеалтиэлнинъ огълу Зеруббавел, баш руханий Ехоцадакънынъ огълу Ехошуа ве бутюн къалгъан халкъ Алласы РАББИнинъ сёзлерини ве Алласы РАББИ ёллагъан Хагъгъай пейгъамбернинъ сёзлерини динъледилер. Халкъ РАББИден къоркъып башлады.

¹³ Сонъ РАББИ ёллагъан РАББИнинъ хаберджиси Хагъгъай халкъкъа шойле деди: – «Мен сизлернен!» – дей РАББИ.

¹⁴ РАББИ Ехуданынъ акими Шеалтиэл огълу Зеруббавелнинъ рухуны, баш руханий Ехоцадакъ огълу Ехошуанынъ рухуны ве бутюн къалгъан халкънынъ юрегини котерди. Олар келип, озь Алласынынъ, Ордулар РАББИсининъ Эвинде ишни башладылар.

¹⁵ Бу, падиша Дарьявеш падишалыгъынынъ экинджи йылында, алтынджы айнынъ 24-юнджи куню олып кечти.