Къануннынъ текрары 33 - Мукъаддес Китап

Муса Исраиль къабилелерини багъышлай

¹ Ольмезден эвель, Алланынъ адамы Муса Исраиль огъулларына багъышлавлар тилеп,

² шай деди: – РАББИ Синайдан кельди, Сеир дагъларында ачылды, Паран дагълы топрагъындан нурнен пейда олды, азизлернинъ ордуларынен кельди, онъ къолунда Къанун атеши бар эди.

³ О, халкъыны керчектен севе. Эписи азизлер Сенинъ къолунъда, олар аякъларынъда топлашалар, айткъанларынъа къулакъ асалар.

⁴ Муса бизге Къанунны буюрды, о – Якъуп джемаатынынъ мирасыдыр.

⁵ Халкънынъ башлыкълары къабилелернен берабер топлашкъанда, о, Ешуруннынъ падишасы эди.

⁶ Яшасын Рубен ве ольмесин, лякин акъайлары аз сайылы олсун.

⁷ Ехуда къабилесине буны айтты: – Я РАББИ, Ехуданынъ сесини эшит, оны халкъына кетир. Озюни Озь къолларынен къорчалай; онъа душманларына къаршы ярдымджы ол.

⁸ Левий къабилесине шай деди: – Тум ве Ур алетлери сенинъ инсафлы адамынъдадыр. Сен оны Масса еринде сынадынъ, Мерива сувлары янында онен давалаштынъ.

⁹ О, ана-бабасы акъкъында бойле деди: «Мен оларны бакъмадым». О, агъа-къардашларыны танымагъан, озь балаларыны бильмеген, лякин о, Сенинъ сёзлеринъни сакълагъан, васиетинъни къорчалагъан.

¹⁰ Олар Якъупны къарарларына огретирлер, Исраильни – Сенинъ Къанунынъа. Олар огюнъде къокъулы отларны якъарлар, къурбан еринъе айванларны бутюнлей къоярлар.

¹¹ РАББИ, онынъ къудрети огъурлы олсун, туткъан ишлеринден разы ол. Онъа къаршы тургъанларны ве оны кореджек козьлери олмагъанларны, аякъ устюнде турып оламасынлар деп, аякъларындан ур.

¹² Биньямин къабилесине шай деди: – РАББИнинъ севгилиси янында хавфсыз яшар. РАББИ оны эр кунь сакълай; Биньямин Онынъ омузлары ортасында раат отура.

¹³ Юсуф къабилесине шай деди: – РАББИ онынъ топрагъына коклернинъ, чыкъларнынъ ве ашагъыда акъкъан сувларнынъ энъ яхшы берекетини берсин,

¹⁴ кунеште оськен ве айлар кетирген энъ яхшы махсулларны,

¹⁵ къадимий дагъларнынъ энъ яхшысыны ве эски байырларнынъ энъ яхшысыны,

¹⁶ топракънынъ энъ яхшысыны ве онынъ боллугъыны берсин. Тикенли чалыда Булунгъаннынъ разылыгъы Юсуфнынъ башына, агъа-къардашларындан сайлангъан бирисининъ манълайына олсун.

¹⁷ Онынъ биринджи догъгъан бугъасы – онынъ сайгъысы, бойнузлары – кийик бугъанынъ бойнузлары киби, оларнен о, ернинъ башкъа четинедже олгъан халкъларны тюртеджек. Бу – Эфраимнинъ он бинълери ве Менашшенинъ бинълеридир.

¹⁸ Зевулун къабилесине шай деди: – Къуван, Зевулун, эвинъден чыкъкъанынъда, ве сен, Йиссакъар, – озь чадырларынъда.

¹⁹ Олар халкъларны дагъгъа тараф чагъырырлар, анда догъру къурбанларны чаларлар. Олар денъизнинъ боллугъынен ве къумда сакълы хазинелернен кейфленирлер.

²⁰ Гъад къабилесине шай деди: – Гъаднынъ топракъларыны кенълештирген адам бахтлы олсун! О, арслан киби яшай, къолны ве башны парчалай.

²¹ О, озюне ернинъ биринджисини сайлап алды, анда оны башлыкънынъ пайы бекледи. О, халкънынъ башлыкъларынен кельди, РАББИнинъ догъру истегини ве Исраильге берильген къарарларыны беджерди.

²² Дан къабилесине шай деди: – Дан – арслан яврусыдыр, Башан еринден секирип тюше.

²³ Нафталий къабилесине шай деди: – Нафталийнен РАББИнинъ бол разылыгъы ве Онынъ номай берекети. О, денъизнинъ ве дженюптеки топракънынъ саиби.

²⁴ Ашер къабилесине шай деди: – Огъуллардан энъ бахтлы – Ашердир. онен агъа-къардашларынынъ разылыгъы олсун, аягъыны зейтюн ягъына батырсын.

²⁵ Къапуларынъдаки мандаллары – демир ве бакъырдандыр, къудретинъ куньлеринъе тенъ оладжакъ.

²⁶ Ешуруннынъ Алласына ошагъан ёкъ! О, коклер устюнден санъа ярдымгъа Озь Шуретинде булутлар устюнде келе.

²⁷ Эбедий Алла – сени сакълагъан ердир, сени эбедиен къудрети къорчалай. О, душманларынъны огюнъден къувалай ве: «Ёкъ эт!» – айта.

²⁸ Исраиль хавфсыз яшай, Якъуп янъгъызлыкъта ашлыкъ ве шарапкъа толу топрагъында тура, ве коклерден онъа чыкълар тюшелер.

²⁹ Исраиль, сен не де бахтлысынъ! Санъа ошагъан ким бар? РАББИ къуртаргъан халкъсынъ! О – сени къорчалагъан къалкъанынъдыр ве шуретинънинъ къылычыдыр. Огюнъде душманларынъ ялтакъланалар, сен исе оларнынъ ибадет тёпелерини аякъларынънен басасынъ.