Къадылар 9 - Мукъаддес Китап

Авимелек

¹ Еруббаалнынъ огълу Авимелек Шекем шеэрине дайыларына келип, оларгъа ве бутюн къартбабасынынъ союна бойле сёзлернен мураджаат этти:

² – Шекем сакинлерине айтынъыз: «Сизге не яхшы оладжакъ: сизни Еруббаалнынъ етмиш огълу, я да бир киши идаре этсинми? Унутманъыз ки, мен сизинъ къан-къандан, кемик-кемиктен догъмушынъызым».

³ Анасынынъ агъалары шу сёзлернинъ эписини Шекем сакинлерине айтып бердилер. Оларнынъ юреклери Авимелекке ынтылды, ве олар: «Эбет, о бизим догъмушымыз», – дедилер.

⁴ Олар Авимелекке Баал-Берит эвинден етмиш кумюш бердилер. Шу парагъа Авимелек чешит ярамай ве шаталакъ адамларны топлады, ве олар онынъ пешинден кетти.

⁵ Сонъ Авимелек бабасынынъ эвине, Офра шеэрине кельди ве озь етмиш агъа-къардашларыны, Еруббаалнынъ огъулларыны бир ташта ольдюрди. Тек Еруббаалнынъ кичик огълу Ётам сагъ къалды, чюнки о, сакъланып къуртулды.

⁶ Сонъра Шекемнинъ бутюн сакинлери ве бутюн Бет-Милло топлашып, Шекем шеэринде, эмен терекнинъ янында Авимелекни падиша яптылар.

⁷ Ётамгъа буны хабер эткенден сонъ, о, Геризим дагъынынъ тёпесине чыкъып, юксек сеснен къычырды: – Эй, Шекем сакинлери! Мени эшитинъиз, Алла да сизни эшитир!

⁸ Бир заманларда тереклер озьлерине падиша къоймакъ истедилер. Зейтюн терегине: «Айды, бизим падишамыз ол», – дедилер.

⁹ Лякин о, джевап къайтарып: «Я мен озюмнинъ зейтюн ягъымны бермектен вазгечейимми? Бу ягънен Аллагъа ве инсанларгъа урьмет косьтерелер. Мен башкъа тереклернинъ устюнден пытакъларымны саллап турайыммы?» – деди.

¹⁰ Сонъ тереклер инджир терегине: «Айды, сен бизим падишамыз ол», – дедилер.

¹¹ Лякин о, джевап къайтарып: «Я меним татлылыгъым? Мен энди оны къалдырайыммы, озь яхшы мейваларымны бермектен вазгечейимми? Мен башкъа тереклернинъ устюнден пытакъларымны саллап турайыммы?» – деди.

¹² Сонъ тереклер юзюмге: «Айды, сен бизим падишамыз ол», – дедилер.

¹³ Лякин о, джевап къайтарып: «Мен озюмнинъ шарабымны бермектен вазгечейимми? О, Алланы ве инсанларны къувандыра. Мен башкъа тереклернинъ устюнден пытакъларымны саллап турайыммы?» – деди.

¹⁴ Сонъунда тереклер когем чалысына: «Айды, сен бизим падишамыз ол», – дедилер.

¹⁵ О исе джевап берип: «Эгер мени керчектен де падиша япсанъыз, айды, келинъиз, меним талдамда сакъланынъыз. Эгер мени падиша япмасанъыз, когем чалысындан атеш чыкъар ве бутюн Ливан кедрлерини ёкъ этер!» – деди.

¹⁶ Сизлер Авимелекни падиша этип, догъру ве инсафлы шей яптынъызмы? Сиз Еруббаалгъа ве онынъ эвлятларына яхшы шей яптынъызмы? Еруббаалгъа ляйыкъ догъру акъкъыны бердинъизми?

¹⁷ Меним бабам сизлер ичюн дженклешти, сизни мидьянлылардан къуртармакъ ичюн, джаныны аджымады.

¹⁸ Сизлер исе шимди онынъ союна къаршы исьян котердинъиз, онынъ огъулларыны ольдюрдинъиз. Бир ташта етмиш кишини ольдюрдинъиз! Авимелекни исе, тек догъмушынъыз олгъаны ичюн, Шекем сакинлерине падиша этип къойдынъыз. О исе, бабама къуллукъ эткен апайнынъ огълу.

¹⁹ Эгер сизлер бугунь Еруббаалгъа ве онынъ эвлятларына догъру ве инсафлы шей япкъан олсанъыз, айды, Авимелекке къувана беринъиз, о да сизге къувансын.

²⁰ Эгер де догъру ве инсафлы шей япмагъан олсанъыз, Авимелектен атеш чыкъсын ве Шекем сакинлерини ве Бет-Миллоны якъсын! Шекем сакинлеринден ве Бет-Миллодан атеш чыкъып, Авимелекни якъсын!

²¹ Бундан сонъ Ётам Беэр шеэрине къачып кетти. Агъасы Авимелектен узакъкъа кетип, анда ерлешти.

²² Авимелек Исраильге учь йыл падишалыкъ этти.

²³ Лякин Алла Авимелек ве Шекем сакинлерининъ арасына бир яман рух йиберди, ве шекемлилер Авимелекке хаинлик япып башлады.

²⁴ Еруббаалнынъ етмиш огълунынъ олюми, оларнынъ тёкюльген къаны ичюн, эм оларны ольдюрген къардашы Авимелек, эм оларны ольдюрмеге Авимелекке ярдым эткен шекемлилер де акъкъыны тёлейджек эдилер.

²⁵ Авимелекни тузакъкъа алмакъ ичюн, Шекем сакинлери бир къач адамны дагъларнынъ тёпесинде къойдылар, бу ёлдан кеткен-кечкен эр бир адамны чайпап башладылар. Бу хаберни Авимелекке еткиздилер.

²⁶ Эвед огълу Гъаал озь агъа-къардашларынен берабер Шекем шеэрине кельди. Шекем сакинлери онъа умют багъладылар.

²⁷ Юзюм багъчаларына кетип, махсулларыны джыйдылар, юзюмни юзюм сыкъкъан ерде сыкътылар, байрам яптылар. Сонъ озь аллаларынынъ эвине кетип, ашады-ичти ве Авимелекни сёгдилер.

²⁸ Эвед огълу Гъаал: – Авимелек ким олгъан? Шекем де ким олгъан? Бизлер Авимелекке хызмет этейикми? О, Еруббаалнынъ огълу дегильми? Зевул онынъ ярдымджысы дегильми? Шекем бабасы Хаморнынъ адамларына хызмет этинъиз! Биз не ичюн Авимелекке хызмет этмек керекмиз?

²⁹ Мен шу халкъны идаре этсем, Авимелекнинъ къокъусыны биле къалдырмаз эдим! – деди. Сонъ Авимелекке хабер йиберди: «Ордунъны топла, дженкке чыкъ!»

³⁰ Шеэрнинъ башлыгъы Зевул, Эвед огълу Гъаалнынъ лафларыны эшитип, яман ачувланды.

³¹ О, гизлиден Авимелекке хаберджилер йиберип: «Шекемге Эвед огълу Гъаал озь догъмушларынен берабер кельди. О, шеэрлилерни санъа къаршы къозгъай.

³² Сен гедже келип, адамларынънен берабер шеэрнинъ тышында сакъланып отур,

³³ саба эрте исе кунеш чыкъкъанынен, шеэрге уджюм эт. Гъаал адамларынен берабер къаршынъа чыкъар да, сен оларны не истесенъ, япарсынъ», – деди.

³⁴ Геджеси Авимелек бутюн ордусынен берабер сеферге чыкъты. Олар дёрт болюкке болюнип, Шекемнинъ тышында сакъландылар.

³⁵ Эвед огълу Гъаал шеэр араба къапусында тургъанда, сакълангъан Авимелек ве адамлары пейда олды.

³⁶ Гъаал оларны корип, Зевулгъа: – Дагъдан насылдыр адамлар келе, – деди. – Бу адамлар дегиль, дагъларнынъ талдалары, – деди Зевул.

³⁷ Лякин Гъаал кене: – Бу адамлар, олар ернинъ энъ юксек байырындан тюшелер! Ана, даа бир къысым Фалджыларнынъ Эменинден келеята, – деди.

³⁸ О заман Зевул онъа: – Я сен айтмагъан эдинъми: «Авимелек ким олгъан? Бизлер Авимелекке хызмет этейикми?» Ана энди бакъ, сен кореджек козюнъ олмагъан адамлар келеята! Бар да, оларнен дженклеш! – деди.

³⁹ Бундан сонъ Гъаал шекемлилерни алып барды ве Авимелекнен дженкке киришти.

⁴⁰ Лякин Авимелектен къачып башлады, Авимелек оларнынъ артына тюшти ве тап шеэр араба къапуларына къадар къувалады ве чокъусыны ольдюрди.

⁴¹ Бундан сонъ Авимелек Арумада ерлешти. Зевул исе Гъаалны ве догъмушларыны Шекемден къувып чыкъарды.

⁴² Экинджи куню шекемлилер шеэрден чыкътылар. Бунынъ хабери Авимелекке келип етти.

⁴³ О, ордусыны учь къысымгъа болип, тарлада сакъланып отурды. Шеэрден чыкъаяткъан адамларны корип, оларгъа уджюм этти ве эписини ольдюрди.

⁴⁴ Авимелек озюнинъ отрядынен шеэр къапусыны запт этти, къалгъан эки отряд исе шеэрден чыкъкъанларгъа атылып, эписини ольдюрди.

⁴⁵ Бутюн кунь Авимелек ве шекемлилер арасында дженк девам этти. Авимелек шеэрни къолуна алды, шеэрнинъ сакинлерини ольдюрди. О, Шекемни тар-мар этти, шеэр олгъан ерге исе туз септи.

⁴⁶ Шекем Къуллесининъ сакинлери олып кечкен вакъиалар акъкъында бильген сонъ, Эль-Берит ибадетханенинъ къалесинде топлаштылар.

⁴⁷ Шекем Къуллесининъ сакинлери эписи анда топлаштылар, деген хаберни Авимелекке етиштирдилер.

⁴⁸ Авимелек адамларыны Цалмон дагъына кетирип, балталарны алып, тереклерден пытакълар кести, оларны омузына атты ве аскерлерине: – Мен не япкъанымны корьдинъиз. Тез олунъыз, меним япкъанымны сизлер де япынъыз! – деди.

⁴⁹ Аскерлер де пытакълар кесип, Авимелекнинъ артындан кеттилер. Къаленинъ чевре-четине пытакъларны къойып якътылар. Бойле этип Шекем Къуллесинде отургъанларнынъ эписи, бинъ акъай-апай ольди.

⁵⁰ Сонъ Авимелек Тевец шеэрине ёл алды. Тевецни алкъагъа алды ве запт этти.

⁵¹ Шеэрнинъ ортасында яхшы пекитильген бир къулле бар эди. Тевецнинъ акъай-апайлары, шеэрнинъ бутюн сакинлери анда къачып сакъландылар. Къапуны къапатып, къулленинъ энъ тёпесине чыкътылар.

⁵² Авимелек къуллени къолгъа алмакъ ичюн сарды. Къуллени якъмакъ ниетинде, къулленинъ къапусына якъынлашкъанда,

⁵³ насылдыр къадын Авимелекнинъ башына дегирмен ташынынъ парчасыны атты да, къафасыны ярды.

⁵⁴ Авимелек аман озь силя ташыгъан хызметчисини чагъырып, онъа эмир этти: – Къылычынъны чыкъар да, мени ольдюр. Меним акъкъымда: «Оны апай ольдюрди», – демесинлер. Хызметчиси къылычыны онъа саплады, ве Авимелек ольди.

⁵⁵ Онынъ ольгенини корьген исраиллилер озь эвлерине къайтып кеттилер.

⁵⁶ Бойле этип, бабасына къаршы япкъан джинаети, етмиш агъа-къардашыны ольдюргени ичюн, Алла Авимелекни джезалады.

⁵⁷ Алла, япкъан джинаетлери ичюн шекемлилерни де джезалады. Бойлеликнен, Еруббаал огълу Ётамнынъ къаргъышы ерине кельди.