Къадылар 8 - Мукъаддес Китап

Гидон мидьянлыларны енъе

¹ Эфраимлилер Гидонгъа келип, онъа: – Сен не ичюн ойле яптынъ? Мидьянлыларгъа къаршы дженкке чыкъкъанда, не ичюн бизлерни чагъырмадынъ? – дедилер. Олар пек ачувлы лаф эте эдилер.

² Лякин Гидон оларгъа бойле джевап берди: – Меним япкъанларым сизинъкисине коре не? Эфраимлилернинъ энъ сонъки салкъымлары Авиэзер топлагъан юзюм берекетинден яхшыдыр!

³ Сизинъ элинъизге Алла мидьянлыларнынъ Орев ве Зеев адлы башлыкъларыны берди. Меним япкъанларымны сизинъ япкъанларынъызнен тенъештирмек биле олмаз. Гидоннынъ сёзлерини эшиткен сонъ, оларнынъ ачувы ятышты.

⁴ Гидон ве онынъ учь юз аскери Иорданнынъ ялысына чыкъып, о бир тарафкъа кечтилер. Олар пек ёрулды, амма душманны къуваламагъа вазгечмедилер.

⁵ Гидон Сукъкъот сакинлерине: – Меним пешимден кеткен адамларыма отьмек беринъиз. Олар пек ёргъун. Мен Мидьян падишалары Зевах ве Цалмуннанынъ пешинден къувалайым! – деди.

⁶ Лякин Сукъкъот укюмдарлары онъа: – Сен не? Зевах ве Цалмуннаны енъдинъми ёкъса? Не ичюн биз санъа отьмек береджек экенмиз? – дедилер.

⁷ Гидон оларгъа: – Шу сёзлеринъиз ичюн, РАББИ меним къолума Зевах ве Цалмуннаны берген сонъ, мен сизинъ беденлеринъизни арманда киби чёль тикенлеринен ве когемлеринен джезаларым! – деди.

⁸ Гидон Пенуэл тарафкъа ёнельди ве Пенуэл сакинлерине айны риджада булунды. Пенуэл сакинлери де, Сукъкъот сакинлери киби, айны бойле джевап бердилер.

⁹ Гидон оларгъа: – Мен гъалебе къазанып къайткъанда, сизинъ къулленъизни йыкътырырым! – деди.

¹⁰ Зевах ве Цалмунна он беш бинълик ордусынен Къаркорда тура эдилер. Булар бутюн шаркъий къабилелернинъ ордусындан къалгъаны эди. Дженкте 120 000 аскер ольдюрильген эди.

¹¹ Гидон Новах ве Ёгбеханынъ шаркъ тарафындаки кочебелернинъ ёлундан келип, бир шей беклемеген душман ордусына уджюм этти.

¹² Зевах ве Цалмунна къачып кеттилер. Гидон оларнынъ пешинден къувалап, эки мидьян падишасыны, эм Зевах, эм Цалмуннаны якъалады ве оларнынъ бутюн ордусыны шашырды.

¹³ Сонъ Ёаш огълу Гидон сеферден къайтаяткъанда, Херес ёкъушындан кете эди.

¹⁴ О, сукъкъотлы бир яшны тутып соргъугъа огъратты. Яш исе шеэрнинъ бутюн башлыкълары ве акъсакъалларнынъ джедвелини, 77 кишини онъа тизип берди.

¹⁵ Гидон Сукъкъот сакинлерине келип: – Мына Зевах ве Цалмунна! Сизлер, Зевах ве Цалмуннаны тутмагъаным ичюн, манъа ве ёрулгъан адамларыма аш бермейджекмиз, деп, меним устюмден кульдинъиз, – деди.

¹⁶ Сонъра шеэр акъсакъалларыны якъалап, чёль тикенлерини ве когемлерини алып, Сукъкъот сакинлерини джезалады.

¹⁷ Пенуэлнинъ къуллесини исе бозып ташлады ве шеэрнинъ сакинлерини ольдюрди.

¹⁸ Гидон Зевах ве Цалмуннагъа: – Таворда къайсы кишилерни ольдюрдинъиз? – деди. – Олар сен киби эдилер. Корюнишлери падиша огъулларынынъ корюниши эди, – дедилер Зевах ве Цалмунна.

¹⁹ Гидон оларгъа: – Олар меним агъаларым, анамнынъ огъуллары эди. РАББИнен ант этем, эгер сиз оларны сагъ къалдыргъан олсанъыз, мен де сизлерни ольдюрмез эдим, – деди.

²⁰ Сонъ Етерге, озюнинъ буюк огълуна: – Оларны ольдюр, – деди. Лякин огълан даа пек яш эди ве къылычыны къынындан чыкъармагъа къоркъты.

²¹ Зевах ве Цалмунна Гидонгъа: – Бизни сен озюнъ ольдюр. Адам насыл буюк олса, кучю де о къадар буюктир, – дедилер. Гидон оларны ольдюрди ве девелерининъ боюнларында асылгъан безеклерни алды.

²² Исраиллилер Гидонгъа риджа эттилер: – Сен бизни мидьянлылардан къуртаргъанынъ ичюн, бизим укюмдарымыз ол. Сенден сонъ огълунъ укюмдарлыкъ япсын, сонъ исе торунынъ.

²³ Лякин Гидон джевап берип: – Мен сизинъ укюмдарынъыз олмайджам. Огълум да олмайджакъ. Сизни РАББИ укюм этсин, – деди.

²⁴ Сонъ девам этти: – Меним сизге бойле риджам бар: эр кес манъа дженк авындан бирер сыргъа берсин. Душманларынынъ чокъ алтын сыргъасы бар эди, чюнки олар исмаиллилер эди.

²⁵ – Эбет, берермиз! – дедилер исраиллилер ве бир джюббе тёшеп, озьлерининъ авындан бирер сыргъа къойдылар.

²⁶ Гидон алгъан алтын сыргъалар 17 кило къадар алтын олды. Бундан гъайры безеклер, боюнгъа асыладжакъ ильванлар, Мидьян падишаларынынъ къою мор кийимлери ве девелернинъ боюнларына асыладжакъ герданлыкълар бар эди.

²⁷ Шу алтындан Гидон эфод яптырды ве оны озюнинъ Офра шеэринде къойды. Анда бутюн исраиллилер, ороспу киби олып, шу эфодгъа табындылар. Эфод Гидон ве онынъ сою ичюн тузакъ олды.

²⁸ Мидьянлылар исраиллилерге бойсунды ве бир даа башларыны котерип оламадылар. Гидоннынъ сагъ олгъан вакътында, 40 йыл девамында мемлекетте тынчлыкъ девам этти.

Гидоннынъ олюми

²⁹ Ёаш огълу Еруббаал къайтып кельди ве эвинде яшады.

³⁰ Гидоннынъ етмиш огълу бар эди, чюнки апайлары чокъ эди.

³¹ Олардан гъайры, Шекемде яшагъан джариеси де онъа огъул догъды. Онынъ адыны Авимелек къойды.

³² Ёаш огълу Гидон пек къарт олып кечинди ве Авиэзер союнынъ Офра шеэринде, бабасы Ёашнынъ къабринде дефн олунды.

³³ Гидоннынъ олюминден сонъра исраиллилер кене ороспуланып, Баалларгъа табынып башладылар ве озюне Баал-Беритни алла оларакъ яптылар.

³⁴ Исраиллилер, оларны чевре-четиндеки яшагъан эписи душманлардан къуртаргъан Алласы олгъан РАББИни хатырламай эдилер.

³⁵ Еруббаалнынъ, яни Гидоннынъ союна да, Гидон Исраильге япкъан эйиликлери ичюн, мерамет эйлемедилер.