Къадылар 7 - Мукъаддес Китап

Гидон дженкке азырлана

¹ Саба эрте Еруббаал (яни Гидон) ордусынен кетип, ордусыны Харод чокърагъы янында ерлештирди. Мидьянлыларнынъ ордусы шималь тарафында, Морэ дагъынынъ янындаки вадийде эди.

² РАББИ Гидонгъа: – Сеннен берабер пек чокъ адам бар. Мидьянлыларны сизинъ къолунъызгъа бермем. Ёкъса исраиллилер Меним огюмде бурунларыны котерип, озюмиз озьлеримизни къуртардыкъ, дейджеклер.

³ Халкъкъа илян эт: «Ким къоркъып къалтыраса – кери къайтсын, Гилад дагъларындан кетсин!» – деди. Бундан сонъ, 22 000 аскер эвине къайтып кетти, 10 000 исе къалды.

⁴ РАББИ Гидонгъа: – Халкъ аля даа пек чокъ! Оларны чокъракъ янына алып бар, Мен анда санъа аскерлерни сайлап аладжагъым. Мен санъа: «Бу киши сеннен берабер кетеджек», – десем, шу адам кетеджек. Кимни исе: «Бу сеннен кетмейджек», – десем, шу адам къаладжакъ, – деди.

⁵ Гидон адамларыны чокъракъ башына кетиргенде, РАББИ онъа: – Ким копек киби, тилинен лыкъыр-лыкъыр сув ичсе, оларны бир тарафкъа къой. Ким тизлерине чёкип сув ичсе, оларны башкъа тарафкъа къой, – деди.

⁶ Авучындан сув ичкенлер 300 киши олды. Къалгъанлары исе тизлерине чёкип сув ичтилер.

⁷ РАББИ Гидонгъа: – Шу 300 кишининъ кучюнен Мен сизлерге гъалебе береджегим – мидьянлыларны сенинъ къолунъа береджегим. Къалгъанлары исе эвлерине къайтып кетсин, – деди.

⁸ Халкъта олгъан бутюн емекни алдылар, бундан гъайры боруларыны да алдылар. Исраиллилерни эв-эвине йиберип, Гидон озюнен берабер 300 киши къалдырды. Мидьянлыларнынъ ордусы исе ашагъыда, вадийде эди.

⁹ Шу гедже РАББИ Гидонгъа: – Ашагъы тюш де, оларнынъ ордусына уджюм эт. Мен оларны сенинъ къолунъа бердим.

¹⁰ Эгер бармагъа къоркъсанъ, ордугъа хызметчинъ Пуранен берабер бар,

¹¹ олар не айткъанларыны динъле. Сонъ сенинъ джесюрлигинъ артар, ве сен оларнынъ ордусына уджюм этерсинъ, – деди. Гидон ве хызметчиси Пура душман ордусынынъ къаравул тургъан ерлерине тюштилер.

¹² Мидьянлылар, амалеклилер ве шаркъий къабилелер вадийде ерлешкен эдилер. Оларнынъ сайысы сарынчкъа киби чокъ эди. Оларнынъ денъиз къуму киби сайысыз деве сюрюлери бар эди.

¹³ Гидон якъынджа келип, бир киши башкъасына озь тюшюни айткъаныны эшитти: – Мен тюшюмде мидьянлыларнынъ ордусындан балабан томалакъ арпа отьмегининъ юварланып кеткенини корьдим. Чадыргъа якъынлашып, чадыргъа урулды ве оны авдарды. Отьмек чадырны авдарды, ве чадыр йыкъылды, – деди.

¹⁴ Экинджиси: – Бу исраилли Ёаш огълу Гидоннынъ къылычы! – деди. – Алла мидьянлыларны ве бутюн бу ордуны онынъ къолуна берди.

¹⁵ Гидон бу тюшнинъ тарифини ве манасыны эшиткен сонъ, тизлерине йыкъылды. Сонъ исраиллилернинъ ордусына къайтты ве: – Турунъыз! РАББИ мидьянлыларнынъ ордусыны бизим элимизге берди! – деп илян этти.

¹⁶ Гидон 300 адамны учь болюкке больди. Эр бир аскерге бирер бору ве гугюм ичинде сакълангъан мешъаль берди.

¹⁷ – Манъа бакъынъыз, меним киби япынъыз, – деп эмир этти аскерлерине. – Мен ордунынъ кенарына якъынлашкъанда, мен не япсам, сизлер де шуны япынъыз.

¹⁸ Бизлер, мен ве меннен олгъанлар бору чаладжакъмыз. Сизлер де ордунынъ чевре-четинде борулар чалынъыз ве: «РАББИ ве Гидон ичюн!» – деп къычырынъыз.

¹⁹ Гедженинъ ярысы кечкенде, къаравуллар денъишкен вакъыттан сонъ, Гидон ве онынъ юз аскери ордунынъ кенарына якъынлашып, борулар чалды ве къолларындаки гугюмлерини къырдылар.

²⁰ Эписи аскерлер, эр учь къысымлардаки аскерлер бору чалып, гугюмлерини къырдылар. Сол къолларында мешъаль, сагъ къолларында боруларыны тутып, бору чалды ве: – РАББИ ве Гидон ичюн къылыч! – деп къычырдылар.

²¹ Олар ордунынъ чевре-четинде, эр бири озь еринде турды. Ордудакилер исе шашмалады, багъыра-чагъыра къачып башладылар.

²² Учь юз аскер борулар чалгъанда, РАББИ ойле япты ки, ордудаки кишилер силяларыны бир-бирлерине къаршы догъурттылар. Оларнынъ ордусы Церера тарафкъа тап Бет-Шиттагъа къадар къачып барды. Озен янына, Таббат янындаки Авел-Мехолагъа къадар къачып кеттилер.

²³ Сонъ Нафталий ве Ашер къабилелеринден ве Менашшенинъ бутюн къабилесинден олгъан исраиллилерни чагъырды, ве оларнынъ эписи мидьянлыларнынъ пешине тюштилер.

²⁴ Гидон Эфраим дагъларына хаберджилер йиберип: – Мидьянлыларнынъ къаршысына дагълардан тюшюнъиз. Озеннинъ кечит ёлуны къапатынъыз. Иорданнынъ ялысыны Бет-Барагъа къадар къапатынъыз! – деп чагъыртты. Эфраимлилер топлашып, озеннинъ кечит ёлуны къапаттылар, бутюн Иорданнынъ ялысыны Бет-Барагъа къадар къапаттылар.

²⁵ Мидьянлыларнынъ эки ёлбашчысыны – Орев ве Зеевни якъаладылар. Оревни Цур-Оревде, Зеевни исе Екев-Зеев еринде ольдюрдилер. Исраиллилер мидьянлыларны къуваладылар. Гидонгъа исе Иорданнынъ артындан Орев ве Зеевнинъ башларыны кетирдилер.