Къадылар 5 - Мукъаддес Китап

Девора ве Баракънынъ йыры

¹ Шу куню Девора ве Авиноамнынъ огълу Баракъ бойле тюркю йырладылар:

² Ёлбашчылары Исраильни алып кеткенде, халкъ дженкке чыкъкъанда, РАББИге шукюрлер этинъиз!

³ Эй, падишалар, динъленъиз, укюмдарлар, эшитинъиз! Мен йырлайджагъым, РАББИге йырлайджагъым! Исраильнинъ Алласы олгъан РАББИге чалгъы чаладжагъым!

⁴ РАББИ, Сен Сеирден кельгенде, Эдом тарлаларындан кельгенде, ер юзю титреди, коклерден ягъмурлар ягъды, булутлар сувларыны тёкти.

⁵ РАББИнинъ огюнде дагълар титреди, Исраиль Алласы олгъан РАББИнинъ огюнде Синай титреди!

⁶ Анат огълу Шамгъарнынъ заманларында, Яэльнинъ куньлеринде ёллар бом-бош олды, ёлджулар айланчыкъ ёллардан кете эдилер.

⁷ Исраильнинъ койлеринде ич бир адам ёкъ эди. Олар гъайып олып кетти. Сонъ мен, Девора, пейда олдым, Исраильде мен, бир ана, пейда олдым!

⁸ Олар янъы аллаларны сайлап алды, шунынъ ичюн шеэрлернинъ къапусына дженк кельди! Къыркъ бинъ исраиллининъ къылыч ве къалкъанлары къайда къалды?

⁹ Юрегим Исраиль ёлбашчыларына, аскерликке кеткен Исраиль халкъына ынтыла! РАББИни шуретленъиз!

¹⁰ Эй, бем-беяз эшеклерде кеткенлер, паалы эгерлерде отургъанлар, ёллардан джаяв кеткенлер, дикъкъат этинъиз!

¹¹ Къуюлар янында сюрюлерни больген адамларнынъ сеслери РАББИнинъ къусурсыз ишлери акъкъында йырлайджакълар, Исраиль ёлбашчыларынынъ ишлери акъкъында айтаджакълар! О заманда РАББИнинъ халкъы шеэрлернинъ къапуларына келеджек!

¹² Тур, Девора, тур! Тур, тур, тюркю йырла! Тур, Баракъ! Авиноам огълу, эсирлеринъни алып кель!

¹³ Сагъ къалгъан йигитлер мырзаларгъа кельди, манъа РАББИнинъ халкъы кельди, кучьлю аскерлер кельди!

¹⁴ Эфраимден Амалекнинъ топрагъында яшагъанлар кельди, сенинъ артынъдан Биньямин сенинъ халкъынънен кельди! Макирден ёлбашчылар кельди, Зевулундан реберлернинъ таякъларыны алгъанлар кельдилер!

¹⁵ Йиссакъар ёлбашчылары – Деворанен берабер! Йиссакъар ве Баракъ вадийге джаяв ашыкъты! Рубеннинъ сойлары тюшюнджелерге далгъан.

¹⁶ Чобан къавалыны динълеп, къошлар янында не отурасынъ? Рубен сойлары терен тюшюнджелерге далгъан.

¹⁷ Гилад Иорданнынъ артында къалды, Дан нечюн гемилерде ерлешти? Ашер денъиз ялысында ерлешкен, корьфезлерде къалгъан.

¹⁸ Зевулун олюмге къаршы чыкъты, юксеклерде, дагъларда Нафталий ойле де япты!

¹⁹ Мына падишалар дженкке чыкъты. Танаакъ янында, Мегиддо сувларынынъ янында Ханаан падишалары дженкке чыкъты, лякин кумюш чайпап аламадылар!

²⁰ Йылдызлар коклерден дженкке кириштилер, коклерден чыкъып, Сисеранен дженк эттилер!

²¹ Кишон дерьясы оларны сюрип атты, къадимий дерья Кишон буны япты. Меним джаным, илери юр! Къуветли ол!

²² Атлар туякъларынен ерни урдылар, къудретли атлар чаптылар.

²³ РАББИнинъ Мелеги эмир этти: – Мероз шеэрини лянетленъиз! Эписи сакинлери лянет олсун! Олар РАББИге ярдымгъа кельмедилер, къудретлилерге къаршы чыкъып ярдым этмедилер!

²⁴ Кенли Хевернинъ апайы Яэль къадынлар арасында багъышлансын! Чадырларда яшагъан къадынлар арасында багъышлансын!

²⁵ Сисера сув сорады – Яэль онъа сют берди, мырзаларгъа ляйыкъ мешребеде онъа къаймакъ кетирди.

²⁶ Сонъ къолуна къазыкъны, сагъ элине – ишчилернинъ чёкючини алды ве Сисераны урды, онынъ башыны ярды, ярды, чекесини тешти!

²⁷ Акъай аякълары тюбюне йыкъылып, ятты, аякълары тюбюне йыкъылды. Къайда эгильген олса, анда да олип йыкъылды.

²⁸ Сисеранынъ анасы пенджереден бакъа, агълап, пенджере пармакълыгъындан къычыра: «Нечюн кельмей онынъ дженк арабасы? Арабаларынынъ тапырдысы нечюн кеч къалды?»

²⁹ Акъыллы ханымлары онъа шойле дей, озю-озюне ойле джевап бере:

³⁰ «Дженкте тюшкен авны пайлашалар. Эр аскерге бирер я экишер къыз! Сисеранынъ авы – ренкли басмалар, ренкли, орьнекли басмалар. Ишлемели, орьнекли басмадан эки кийим – дженкте къазанылгъан малдыр!»

³¹ Я РАББИ, бутюн душманларынъ ёкъ олсун! РАББИни севгенлер исе кунешке бенъзей, кучь толу чыкъкъан кунешке бенъзей! Бундан сонъ 40 йыл девамында мемлекет тынч яшады.