Къадылар 21 - Мукъаддес Китап

Исраиллилер Биньямин къабилеси ичюн къадынларны тапалар

¹ Исраилли акъайлар Мицпа шеэринде къызларыны Биньямин къабилесининъ акъайларына апай оларакъ бермемеге ант эттилер.

² Сонъ исе исраиллилер Бет-Эльге келип, РАББИнинъ огюнде отурып, акъшамгъадже окюр-окюр агъладылар.

³ – Я РАББИ, Исраильнинъ Алласы! Не ичюн Исраильде буларнынъ эписи олып кечти? Энди Исраильнинъ бир къабилеси эксик олды! – дедилер.

⁴ Келеджек куню, саба эрте, исраиллилер турып, анда къурбан ерини къурдылар ве къурбанлар чалып, бутюнлей якътылар ве аманлыкъ къурбанларыны кетирдилер.

⁵ Исраиль огъуллары: – Исраильнинъ эписи къабилелеринден ким РАББИнинъ огюне кельмеген? – деп сорадылар. Олар кимде-ким Мицпагъа РАББИнинъ огюне турмагъа кельмесе, ольдюриледжек, деген буюк къаргъыш эткен эдилер.

⁶ Исраиль огъуллары къардашлары Биньямин къабилесине языкъсындылар ве: – Энди Исраиль бир къабилесинден марум олды.

⁷ Насыл этип, сагъ къалгъанларгъа апай тапмакъ мумкюн? Биз РАББИнинъ огюнде озюмизнинъ къызларымызны оларгъа бермемеге ант эттик!

⁸ Олар бири-бирлеринден: – Исраиль къабилелеринден Мицпагъа, РАББИнинъ огюне турмагъа кельмеген бир кимсе ёкъ экенми? – деп сорап башладылар. Сорап, не бильсинлер: Явеш-Гиладдан кимсе ордугъа къошулмагъан, кимсе топлашувгъа кельмеген экен.

⁹ Ордунынъ аскерлерини сайып, ады-адынен айткъан сонъ, Явеш-Гиладдан кимсе кельмегени белли олды.

¹⁰ О заман джемаат анда 12 000 джесюр аскер йиберип, оларгъа бойле буйрукъ бердилер: – Барынъыз да, Явеш-Гиладнынъ бутюн сакинлерини ольдюринъиз, апайларны балаларынен берабер ёкъ этинъиз.

¹¹ Эмиримиз бойле: анда эписи акъайларны ве акъай къолу тийген къадынларны айырып ёкъ этинъиз!

¹² Явеш-Гилад сакинлери арасында акъай эли тиймеген 400 къыз тапылды. Оларны Ханаандаки Шилогъа, исраиллилернинъ ордусына кетирдилер.

¹³ Сонъ Исраиль джемааты, Риммон къаясында сакъланып отургъан Биньямин аскерлерине эльчилер йиберип, барышыкъ илян эттилер.

¹⁴ О вакъыт Биньямин огъуллары эвлерине къайтып кельдилер, ве оларгъа Явеш-Гиладда ольдюрмеген къызларыны бердилер. Амма къызлар эр кеске етишмеди.

¹⁵ Халкъ Биньямин къабилесине языкъсынды, чюнки РАББИ Исраиль къабилелерининъ бирлигини сакъламагъан эди.

¹⁶ Джемаатнынъ акъсакъаллары: – Биньямин къабилесининъ бутюн апайлары ольдюрильди. Сагъ къалгъанларгъа насыл этип апай тапмакъ мумкюн? – деп сорадылар.

¹⁷ – Биньямин къабилесини сакъламакъ керек. Исраильнинъ къабилеси гъайып олмасын.

¹⁸ Лякин биз къызларымызны оларгъа берип оламаймыз, – дедилер. Исраиль огъуллары ант этип: «Кимде-ким озь къызыны Биньямин къабилесинден олгъан акъайгъа берсе, лянетленеджек!» – деген эдилер.

¹⁹ Ахыры сонъу: – Эр йылы Шилода РАББИнинъ байрамы ола, – дедилер. Шило Бет-Эльнинъ шималинде, Бет-Эльден Шекемге кеткен ёлнынъ шаркъында ве Левонанынъ дженюбинде ерлешкендир.

²⁰ Биньяминлилерге бойле буюрдылар: – Анда барып, юзюм багъчаларында сакъланынъыз.

²¹ Шилодаки къызлар ойнамагъа чыкъкъанда, юзюм багъчасындан чапып чыкъып, оларны тутунъыз. Эр кес озюне Шилодан бирер къыз алып, Биньямин топракъларына къайтсын.

²² Къызларнынъ баба я да агъалары бизге шикяет этип кельселер, биз оларгъа: «Бизни аджынъыз, къызларынъызны бизде къалдырынъыз! Эр биримиз дженкте озюне апай алып оламадыкъ! Бундан да гъайры, сиз оларгъа апай бермединъиз, демек, сизде къабаат ёкъ!» – дермиз.

²³ Биньямин къабилесининъ акъайлары ойле де яптылар: озь сайысына коре оюн ойнагъан къызларны хырсызлап алдылар. Сонъ озь топракъ пайына къайттылар, шеэрлерини гъайрыдан къурдылар ве анда яшап башладылар.

²⁴ Исраиллилер де о вакъыт эр кес озь къабилесине, озь союна къайтып кетти. Эр кес озь топрагъына кетти.

²⁵ О заманларда Исраильде падиша ёкъ эди, эр кес озюне догъру корюнген шейни япа эди.