Къадылар 20 - Мукъаддес Китап

Халкъ Биньямин къабилесини джезаламагъа къарар чыкъара

¹ Эписи исраиллилер, бутюн джемаат – Дандан Беэр-Шевагъадже яшагъан халкъ ве Гиладнынъ сакинлери – эписи, бир адам киби, Мицпа шеэринде РАББИнинъ огюнде топлаштылар.

² Анда халкънынъ эписи ёлбашчылары, бутюн Исраиль къабилелерининъ ёлбашчылары бар эди. Анда Алланынъ бутюн халкъы, къылычнен силялангъан 400 000 джаяв аскери топлашты.

³ Биньямин къабилеси исраиллилернинъ Мицпада топлашкъаны акъкъында хабер алды. Исраиллилер: – Бу яман шей насыл олды? – деп сорадылар.

⁴ Ольдюрильген апайнынъ акъайы левийли: – Мен джариемнен Биньямин топракъларындаки Гивагъа кельдим. Анда геджелемеге истедим.

⁵ Геджеси Гиванынъ сакинлери келип, мен отургъан эвни сардылар, мени ольдюрмеге истедилер. Олар джариемни зорлап, намусына токъундылар. О ольди.

⁶ Мен исе онынъ джеседини парча-парча кесип, оларны исраиллилернинъ эр бир топракъ пайларына йибердим. Олар Исраильде айып ве акъылсыз шей яптылар.

⁷ Энди исе, исраиллилер, тюшюнинъиз ве шимди къарар чыкъарынъыз! – деди.

⁸ Бутюн халкъ, бир адам киби турып: – Бизлер эвлеримизге къайтмайджакъмыз, чадырларымызгъа кетмейджекмиз.

⁹ Гивагъа бойле япаджакъмыз: джерепке коре онъа уджюм этеджекмиз.

¹⁰ Биз Исраиль къабилелерининъ 100 адамындан 10 киши, 1 000 адамдан 100 киши, 10 000 адамдан 1 000 киши айыраджакъмыз. Олар бутюн орду ичюн емек тапсын. Орду Биньямин топракъларындаки Гивагъа кетеджек. Япкъан акъылсызлыгъынен Исраильни масхара эткен гивалылардан интикъам аладжакъмыз! – дедилер.

¹¹ Бутюн исраилли акъайлар, бир адам киби, берабер Гивагъа кетмеге топлаштылар.

¹² Исраиль къабилелери бутюн Биньямин къабилесине эльчилер йиберип: – Сизлер насыл этип бойле мушкюль джинает япа бильдинъиз?

¹³ Бизге шу гивалы олмайджакъларны беринъиз! Биз оларны ольдюрип, Исраильни яманлыкътан темизлейджекмиз, – дедилер. Амма биньяминлилер агъалары исраиллилерни динълемеге истемедилер,

¹⁴ оларнен дженклешмек ичюн, эписи шеэрлеринден чыкъып, Гивада топлаштылар.

¹⁵ Шу куню шеэрлерден чыкъкъан, дженкке къылычнен силялангъан 26 000 биньяминли аскер кельди. Бундан гъайры, Гивадан 700 энъ яхшы аскер кельди.

¹⁶ Ордуда 700 энъ яхшы солакъай аскер бар эди. Олар сапандан таш атып, сачны биле урып ола эдилер.

¹⁷ Исраиллилернинъ исе (Биньямин къабилесини саймайып), 400 000 киши топланды. Олар эписи къылычнен силялангъан эди. Эр бири теджрибели аскер эди.

Биньяминлилерге къаршы дженк

¹⁸ Исраиллилер Бет-Эль шеэрине келип, Алладан: – Бизни Биньямин къабилесине къаршы ким алып бараджакъ? – деп сорадылар. РАББИ джевап берип: – Сизлерни Ехуда алып бараджакъ, – деди.

¹⁹ Саба исраиллилер Гиванынъ якъынларында ерлештилер.

²⁰ Исраилли акъайлар Биньямин къабилесинен дженклешмеге чыкътылар. Гиванынъ къаршысында исраиллилер дженкке азырланып турдылар.

²¹ Шу куню Биньямин къабилесининъ аскерлери Гивадан чыкъып, исраиллилерге уджюм эттилер, 22 000 кишини ольдюрдилер.

²² Исраиллилер кучюни топлап, кене дженк этмек ичюн сыранен турдылар. Кене тюневин тургъан ерде ерлештилер.

²³ Исраиль огъуллары кетип, акъшамгъадже РАББИнинъ огюнде агъладылар ве Ондан: «Къардашларымыз биньяминлилернен дженкни девам этейикми, ёкъмы?» – деп сорадылар. РАББИ джевап берип: «Оларнен дженклешинъиз!» – деди.

²⁴ Бойле этип, экинджи куню де исраиллилер Биньямин аскерлерине къаршы чыкътылар.

²⁵ Биньяминлилер экинджи куню де Гивадан чыкъып, исраиллилерге уджюм эттилер ве даа къылычнен силялангъан 18 000 аскер ольдюрдилер.

²⁶ Сонъ исраиллилер бутюн ордусынен Бет-Эльге кеттилер. Анда РАББИнинъ огюнде отурдылар, бутюн кунь акъшамгъадже агълады ве ашамады-ичмедилер. Къурбанлар чалып, РАББИ ичюн оларны бутюнлей якътылар, аманлыкъ къурбанларыны да кетирдилер.

²⁷ Сонъ исраиллилер РАББИден акъыл сорадылар. О заманда Алланынъ Васиет Сандыгъы анда эди,

²⁸ ве Харун огълу Элазарнынъ огълу Пинехас онынъ огюнде хызмет эте эди. – Къардашларымыз олгъан Биньямин къабилесинен дженкни девам этейикми? – деп сорадылар исраиллилер. – Я да дженкни токътатайыкъмы? РАББИ оларгъа джевап берип: – Дженклешинъиз! Ярын Мен оларны къолларынъызгъа берерим! – деди.

²⁹ Сонъ исраиллилер Гиванынъ чевре-четинде сакълы аскерлерни къойдылар.

³⁰ Учюнджи куню исраиллилер кене Биньямин къабилесинен дженклешмеге чыкътылар ве эвелькиси киби Гиванынъ къаршысында сыранен турдылар.

³¹ Биньямин аскерлери исраилли ордусына атылдылар ве шеэринден узакълаштылар. Олар, эвель япкъаны киби, исраиллилерни эки ёлда ольдюрип башладылар: Бет-Эль ёлунда ве Гиванынъ тарла ёлунда оларнынъ артындан къуваладылар, отузгъа якъын исраиллини ольдюрдилер.

³² Биньямин къабилесининъ аскерлери: «Биз оларны эвелькиси киби ольдюрирмиз!» – деп тюшюндилер. Исраиллилер исе къачкъан киби олып, биньяминлилерни шеэрден узакълаштырып, ёлгъа чекмеге истедилер.

³³ Исраиллилернинъ бутюн ордусы еринден кочип, Баал-Тамар янында сыраландылар. Гиванынъ гъарбында сакъланып отургъан болюк исе еринден турды.

³⁴ Бутюн Исраильден топлангъан он бинъ энъ яхшы аскер Гивагъа таба арекет этти. Уруш пек агъыр эди. Биньямин къабилесининъ аскерлери, магълюбиетке огърармыз деп, тюшюнмедилер.

³⁵ РАББИ исраиллилернинъ огюнде биньяминлилерни къырып ташлады. Шу куню исраиллилер биньяминлилернинъ ордусында къылычнен силялангъан 25 100 кишини ольдюрдилер.

Биньяминлилернинъ енъилюви

³⁶ Биньямин аскерлерининъ енъилювини корьгенде, исраиллилер Биньямин ордусындан чекильди, Гиванынъ янында сакъланып отургъан аскерлерге умют эттилер.

³⁷ Шимди бу аскерлер сакълангъан ерлеринден Гивагъа таба ашыкъып кельдилер, шеэрге атылып, ичине кирдилер ве анда эр кесни къылычнен ольдюрдилер.

³⁸ Исраиллилер ве сакълы отургъан адамларнынъ арасында бойле анълашма бар эди: шеэрнинъ ичинде атеш якъылып, шеэрден тютюн котериледжек.

³⁹ Исраиллилер дженк мейданындан чекилип башлагъанда, Биньямин къабилесининъ аскерлери энди отузгъа якъын адам ольдюрген эдилер ве: «Исраиллилерни биринджи урушта олгъаны киби, къырып ташлайыкъ», – деп белледилер.

⁴⁰ Тамам шу вакъытта шеэрнинъ устюнден тютюн диреги котерильди. Биньямин аскерлери арткъа бакъса, не корьсюнлер – бутюн шеэрлерини янгъын къаплагъан, тютюни тап коклерге котерильген.

⁴¹ Исраиллилернинъ ордусы арткъа бурулды, Биньямин аскерлерини исе шиддетли къоркъу сарды: олар белягъа огърагъаныны анъладылар.

⁴² Биньяминлилер сахрагъа кеткен ёлдан къачып башладылар. Лякин уруштан къачалмадылар. Шеэр тарафындан кельген исраиллилер алкъагъа тюшкенлерни ёкъ этип башлады.

⁴³ Биньямин аскерлери алкъагъа тюштилер. Оларны Ноха шеэринден къуваладылар ве Гиванынъ гъарбындаки ерлерге къувалап кирсеттилер.

⁴⁴ Биньяминлилернинъ 18 000 аскери гъайып олды – эр бири джесюр аскер эди.

⁴⁵ Къалгъан Биньямин аскерлери сахрагъа, Риммон къаясына къачтылар. Олар ёллардан къачып кеткенде, исраиллилер даа 5 000 адам эсир алдылар. Исраиллилер оларны тап Гидомгъадже къуваладылар ве даа 2 000 адам ольдюрдилер.

⁴⁶ Шу куню джеми оларакъ Биньямин аскерлеринден къылычнен силялангъан 25 000 киши ольдюрильди, эписи джесюр аскерлер эди.

⁴⁷ Алты юз Биньямин аскерлери сахрагъа, Риммон къаясына къачтылар. Олар анда, Риммон къаясында дёрт ай девамында къалдылар.

⁴⁸ Исраиллилер Биньямин къабилесининъ ерлерине къайтып, къалгъан адамларны къылычнен ольдюрдилер, эм шеэрнинъ сакинлерини, эм айванларыны, эм де ёлда расткельген эр кимни ёкъ эттилер. Ёлда расткельген эр бир шеэрни якътылар.