Къадылар 10 - Мукъаддес Китап

Тола

¹ Авимелектен сонъ Йиссакъар къабилесинден Додо огълу Пуанынъ огълу Тола Исраильнинъ къуртарыджысы олды. О, Эфраим дагъларындаки Шамир шеэринде яшай эди.

² Тола 23 йыл девамында Исраильнинъ къадысы олды. Олюминден сонъра оны Шамирде дефн эттилер.

Яир

³ Ондан сонъ гиладлы Яир ёлбашчы олды. О, 22 йыл девамында Исраильнинъ къадысы эди.

⁴ Яирнинъ отуз огълу бар эди, эр бирининъ озь эшеги бар эди, ве отуз кою бар эди. Бу койлер шимдиге къадар Хаввот-Яир деген адны ташый; олар эписи Гилад топрагъындадыр.

⁵ Яир ольди ве Къамонда дефн этильди.

Йифтах

⁶ Исраиллилер РАББИнинъ огюнде ярамай ишлер япмагъа девам эте эдилер, Баал ве Ашторет путларына, арамлыларнынъ аллаларына, сидонлыларнынъ аллаларына, моавлыларнынъ аллаларына, Аммон огъулларынынъ аллаларына ве фелестинлилернинъ аллаларына хызмет эте эдилер. РАББИден вазгечип, Онъа хызмет этмедилер.

⁷ РАББИ Исраильге гъазапланды ве оны фелестинлилерге ве аммонлыларгъа сатты.

⁸ Шу йылдан башлап, олар исраиллилерни сыкъыштырып, эзиетлеп башладылар. Он секиз йыл девамында Иордан артында, аморлыларнынъ топракъларындаки Гиладда яшагъан исраиллилерни эзиетледилер.

⁹ Сонъунда аммонлылар Иордан озенинден кечип, Ехуда, Биньямин ве Эфраим къабилелеринен дженклешмеге башладылар. Исраиллилернинъ башына буюк беля тюшти.

¹⁰ Исраиллилер РАББИге ялвардылар: – Я РАББИм, Сенинъ огюнъде гуна яптыкъ! Алламыздан вазгечип, Баал путларына табынып башладыкъ, – дедилер.

¹¹ РАББИ оларгъа джевап берип: – Сизни мысырлылар ве аморлылар, аммонлылар, фелестинлилер ве

¹² сидонлылар, амалеклилер, маонлылар къыйнады. Ве сиз Манъа ялваргъанынъыз сайын, сизни оларнынъ къолларындан къуртара эдим.

¹³ Лякин сизлер Менден вазгечип, башкъа аллаларгъа хызмет этип башладынъыз. Шунынъ ичюн эндиден сонъ сизни къуртармайджагъым!

¹⁴ Барынъыз, озюнъиз сайлап алгъан аллаларгъа ялварынъыз. Олар сизни белядан къуртарсын! – деди.

¹⁵ Исраиллилер РАББИге: – Биз гуна яптыкъ! Бизге не япмагъа истесенъ, яп, тек шимди къуртар, – дедилер.

¹⁶ Олар ят аллаларны терк этип, РАББИге хызмет этип башладылар. Бундан сонъ РАББИ исраиллилернинъ азап чеккенине бакъып оламады.

¹⁷ Аммонлылар дженкке чыкъып, ордусыны Гиладда ерлештирдилер. Исраиллилер исе ордусыны топлап, Мицпанынъ янында ерлештилер.

¹⁸ Гилад ёлбашчылары да, орду да, бири-бирине: – Ким бизлерни аммонлыларгъа къаршы дженкке алып бараджакъ? Ким алып барса, Гилад сакинлерини де идаре этеджек! – деди.