Икметли сёзлер 1 - Мукъаддес Китап

Икметли сёзлернинъ макъсады

¹ Исраиль падишасы, Давут огълу Сулейманнынъ икметли сёзлери:

² Бу икметли сёзлер – икметнинъ ве огютнинъ манасына етмеге ве акъыллы лафларны анъламагъа,

³ акъыл-ферасет, инсафлыкъ, адалетлик ве догърулыкъ акъкъында огютлерни алмагъа истеген адамлар ичюн.

⁴ Саде адамгъа олар зекяны, яш огълангъа – бильги ве ферасетни берерлер.

⁵ Оларны эшитип, икметли адам бильгилерини арттырыр ве акъыллы адам яхшы насиатлар тапар.

⁶ Сонъ о, икметли сёзни ве кинаели икяени, акъыл саиплерининъ лафларыны ве оларнынъ тапмаджаларыны анълар.

Яшларгъа насиат

⁷ Бильгининъ башы – РАББИден къоркъмакътыр, огютни ве икметни бир шей ерине корьмеген адам – ахмакътыр.

⁸ Динъле, огълум, бабанънынъ огютини ве ананънынъ эмирини ташлама.

⁹ Олар башынъа – гузель тадж, бойнунъа да – ильвандыр.

¹⁰ Огълум, эгер гуналы адамлар сени яманлыкъ япмагъа къандырсалар, разы олма.

¹¹ Эгер олар санъа: «Юр бизнен, тузакъта сакъланып, къабаатсыз адамны бир манасы олмайып беклермиз, ольдюрирмиз оны.

¹² О бир дюнья – тири алда адамларны, мезар – бутюн алда онъа тюшкенлерни киби, бойле де биз оларны тири ютармыз.

¹³ Чешит тюрлю къыйметли мал-мульк алып, эвлеримизни гъаниметке толдурып-ташырармыз.

¹⁴ Бизнен берабер джереп чекерсинъ, эпимизнинъ пара кисеси бир оладжакъ», – деселер,

¹⁵ огълум, оларнен берабер ёлгъа чыкъма, оларнынъ ёлуна аягъынъ басмасын,

¹⁶ чюнки оларнынъ аякълары яманлыкъкъа чапалар, олар къан тёкмеге ашыкъалар.

¹⁷ Къушларнынъ козю огюнде тузакъны къоймакъ бошунадыр,

¹⁸ олар исе озьлерининъ къаныны тёкмек ичюн, тузакъ япалар, сакъланып, джанларыны гъайып этелер.

¹⁹ Адалетсиз къазанчкъа къызгъан эр кимнинъ сонъу бойледир: бу къазанч, онъа саип олгъан адамларнынъ джаныны ала.

Икмет чагъыра

²⁰ Икмет сокъакъларда къычыра, мейданларда сесини котере,

²¹ топлашувларынынъ баш ерлеринде чагъыра, шеэрлернинъ араба къапусында бойле сёзлерни айта:

²² «Эй, саде адамлар, саделикни не вакъыткъадже севеджексинъиз? Мыскъылджылар не вакъыткъадже мыскъылламакътан кейф чатаджакълар? Акъылсызларнынъ не вакъыткъадже бильгини корьмеге козьлери олмайджакъ?

²³ Меним опькеме къулакъ асынъыз, сонъ мен сизге озь рухумны тёкеджегим, сёзлеримни айтаджагъым.

²⁴ Мен чагъырдым – сиз эшитмединъиз, къолумны узаттым – абайлагъан адам олмады.

²⁵ Эписи насиатларымны ред эттинъиз, опькелеримни де къабул этмединъиз.

²⁶ Онынъ ичюн мен де сизинъ белянъыз устюнден кулерим, сизни дешет баскъанда, мен де сизни мыскъылларым.

²⁷ Сизни дешет фуртуна киби баскъанда ве беля къасыргъа киби сарып алгъанда, къайгъы ве сыкъынты тюбюнде къалгъанынъызда, къуванырым.

²⁸ О заман мени чагъыраджакълар, лякин мен эшитмейджегим, саба-танъдан мени къыдыраджакълар, лякин тапалмайджакълар.

²⁹ Олар бильгиден нефрет эттилер ве РАББИден къоркъуны озьлерине сайлап алмадылар.

³⁰ Олар насиатымны къабул этмедилер, опькелеримни де аякъ асты эттилер.

³¹ Онынъ ичюн туткъан ёлларынынъ мейвасыны ашайджакълар, озь тюшюнджелеринден тояджакълар.

³² Саделернинъ инатлыгъы озьлерини гъайып этеджек, акъылсызларнынъ гъамсызлыгъы озьлерининъ башына етеджек.

³³ Мени динълеген адам исе, яманлыкътан къоркъмайып, раат ве тынч яшайджакъ».