Йирмея 49 - Мукъаддес Китап

Аммон акъкъында къарар

¹ Аммон огъуллары акъкъында РАББИ бойле дей: – Исраильнинъ огъуллары ёкъмы, аджеба? Ёкъмы мирасчысы? Ойле олса, не ичюн Милкъом алласы Гъад топрагъыны запт этти? Не ичюн онъа ибадет эткенлер Гъаднынъ шеэрлеринде яшай?

² Онынъ ичюн, – дей РАББИ, – ойле куньлер келеяталар ки, Аммон огъулларынынъ Рабба шеэринде дженк давушлары эшитиледжек, Рабба бакъымсыз байыргъа чевириледжек янындаки шеэрлери якъыладжакъ, ве исраиллилер эвельки сабыларына башлыкъ этеджеклер, – дей РАББИ.

³ – Эй, Хешбон, агъла! Ай шеэри харап этильди! Рабба къызлары, ярдымгъа чагъырынъыз, чувал токъумаларына сарылып, агъланъыз, къораларны бойлап юрюнъиз. Милкъом алласы руханийлери ве башлыкъларынен берабер сюргюнликке кетеджек.

⁴ Вадийлеринънен не макътанасынъ? Вадийинъ гъайып оладжакъ! Эй, саткъын къыз! Сен байлыгъынъа ишанып: «Манъа къаршы ким чыкъып олур?» – дей эдинъ.

⁵ Бутюн чевре-четинъден башынъа дешет тюшюреджегим, – дей Ордуларнынъ РАББИ-ТААЛЯсы. – Сизлерни къувалап, чевре-четке дагъытаджакълар, къачкъанларны кимсе топлап оламайджакъ.

⁶ Сонъунда исе Аммон огъулларыны эсирликтен къайтараджагъым, – дей РАББИ.

Эдом акъкъында къарар

⁷ Ордуларнынъ РАББИси Эдом акъкъында бойле дей: – Энди Теман шеэринде акъыл къалмадымы? Акъыллы адамларда огют биттими? Икметлери бозулдымы?

⁸ Аркъаларынъызны чевирип, къачынъыз! Къобаларда сакъланынъыз, эй, Дедан топрагъында яшагъанлар! Исавнынъ белясыны башларына тюшюреджегим. Вакъты-саати кельди, Мен Эдомны джезалайджагъым.

⁹ Юзюм джыйгъанлар санъа кельсе эди, мытлакъа бир къач салкъым къалдырыр эди. Гедже хырсызлар кельсе эди, керегини алыр эди.

¹⁰ Мен исе Исавны чыр-чыплакъ этерим, гизли ерлерини ачарым, сакъланып оламайджакъ! Эвлятлары, агъа-къардашлары, къомшулары – эписи гъайып олды, озьлери ёкъ олды.

¹¹ Оксюз балаларынъны ташлап кет, Мен джанларыны сакъларым, Манъа тул къадынларынъ да ишансын.

¹² РАББИ бойле дей: – Гъазабыма толу къадеден къабаатсызлар биле ичеджеклер. Сен исе джезадан къачынаджакъсынъмы? Ёкъ! Джезасыз къалмайджакъсынъ! Гъазабыма толу къадеден мытлакъа ичеджексинъ!

¹³ Озюмнен ант этем, – дей РАББИ, – Боцра шеэри харап ве масхара оладжакъ, бакъымсыз олып, оны къаргъайджакълар, эписи шеэрлери де эбедиен йыкъыкъ оладжакълар.

¹⁴ РАББИден бир хабер алдым, халкъларгъа хаберджи ёлланды: «Топланынъыз да, онъа къаршы кетинъиз, дженкке чыкъынъыз!»

¹⁵ – Мен сени халкълар арасында уфакъ этерим, адамлар санъа хор бакъаджакъ.

¹⁶ Сен къая чатлакъларында, байыр тёпелеринде яшадынъ, лякин шефкъатсызлыгъынъ ве юрек къопайлыгъынъ сени алдатты. Сен, къартал киби, юксек ерлерде юванъны яптынъ, амма сени андан да ашагъы тюшюририм, – дей РАББИ.

¹⁷ – Эдом къоркъунчлы шейге чевириледжек, янындан кечкен эр кес шашып къаладжакъ, башына тюшкен беляларны корип, тап сызгъырып аладжакъ!

¹⁸ Содом, Гомора ве чевредеки шеэрлер насыл йыкъылгъан олса, – дей РАББИ, – анда да кимсе ерлешмейджек, инсан огълу анда яшамайджакъ.

¹⁹ Иорданнынъ чалылыгъындан ешиль отлакъларгъа арслан чыкъкъаны киби, Мен де апансыздан оларгъа атылып, эдомлыларны къувалайджагъым, ёлбашчыларыны джезаларым. Манъа ошагъан ким бар? Менден ким сорап олур? Манъа къаршы тураджакъ ёлбашчы бармы?

²⁰ Шунынъ ичюн Эдом акъкъында РАББИнинъ къарарыны, Теман шеэринде яшагъанлар акъкъында ниетини эшитинъиз! Керчектен де, къой-эчкилернинъ энъ уфакъларыны да хырсызлайджакъ, яшагъан ерлерини бом-бош къалдыраджакълар.

²¹ Йыкъылгъанларынынъ гудюрдисинден ер сарсыладжакъ, ярдымгъа чагъыргъанларнынъ сеслери тап Къызыл денъизге къадар эшитиледжек.

²² О, къартал киби, котерилип, тез учаджакъ, къанатларыны Боцранынъ устюнде ачаджакъ. Дерди туткъан къадын киби, о куню кучьлю эдомлылар къалтырайджакъ.

Дамаск акъкъында къарар

²³ Дамаск акъкъында. Хамат ве Арпад шеэрлери масхара олды; яман бир хабер эшитип, рухтан тюштилер, далгъалангъан денъиз дайын, тынчланып оламайлар.

²⁴ Дамаск такъаттан кесильди, аркъасыны чевирип, къачмагъа азырланды, къоркъу тюбюнде къалды, дерди туткъан къадынны киби, оны сыкъынты ве агъры сарды.

²⁵ Насыл олды да, шуретли шеэр, къуванчымнынъ шеэри бакъымсыз къалды?

²⁶ Яш огъланлары сокъакъларда ольдюриледжек, о куню эписи аскерлери гъайып оладжакъ, – дей Ордуларнынъ РАББИси.

²⁷ – Дамаскнынъ диварларыны якъаджагъым, атеш Бен-Хададнынъ сарайларыны ёкъ этеджек.

Кедар ве Хацор халкълары акъкъында къарар

²⁸ Вавилон падишасы Невукъаднеццар ургъан Хацор падишалыкълары ве Кедар акъкъында РАББИ бойле дей: – Турунъыз, Кедаргъа къаршы чыкъынъыз, куньдогъуш тарафында яшагъанларны ёкъ этинъиз!

²⁹ Чадырларынен къой-эчкилери тутуладжакъ, чадыр перделери, савут-сабалары ве девелери алынаджакъ; оларгъа: «Орталыкъны къоркъу къаплады!» – деп къычыраджакълар.

³⁰ Къачынъыз, долашынъыз, терен чукъурларда сакъланынъыз, эй, Хацор адамлары, – дей РАББИ. – Вавилон падишасы Невукъаднеццар сизге къаршы къарар чыкъарды, яманлыкъ япмагъа тюшюнди.

³¹ Турунъыз, эсен-аман, гъамсыз-къасеветсиз яшагъан халкъкъа къаршы чыкъынъыз, – дей РАББИ. – Оларнынъ не къапулары, не килитлери бар, олар озьлери яшайлар.

³² Девелери гъаниметке алынаджакъ, къой-эчкилернинъ чокъусы хырсызланаджакъ. Зулюф сачларыны къыркъкъанларны ернинъ дёрт тарафына дагъытаджагъым, эр тарафтан оларгъа беля кетиреджегим, – дей РАББИ.

³³ Хацор шакъалларнынъ яшагъан ери оладжакъ, эбедий сахрагъа чевириледжек, анда кимсе ерлешмейджек, инсан огълу анда яшамайджакъ.

Элам мемлекети акъкъында къарар

³⁴ Цидкия Ехудада падишалыкъ этип башлагъанда, РАББИден Йирмея пейгъамберге Элам акъкъында бойле хабер кельди:

³⁵ – Ордуларнынъ РАББИси бойле дей: Бакъынъыз! Мен Эламнынъ яйыны, эсас кучюни къыраджагъым.

³⁶ Коклернинъ дёрт тарафындан Эламгъа къаршы дёрт ель кетиреджегим, Эламны алып, чевре-четке дагъытаджагъым. Къувалангъан эламлылар чешит тюрлю халкъларнынъ арасында ерлешеджеклер.

³⁷ Ойле япарым ки, эламлылар душманлары огюнде къоркъаджакълар, джанларыны къыдыргъанларнынъ огюнде оларнынъ отьлери патлайджакъ, оларгъа яман беляны, ачувымнен гъазабымны тюшюреджегим, – дей РАББИ. – Артларындан къылычны ёллайджагъым, оларны бутюнлей ёкъ этеджегим.

³⁸ Эламда тахтымны къояджагъым, андаки падишаны ве башлыкъларны ёкъ этеджегим, – дей РАББИ.

³⁹ – Амма сонъки куньлерде Эламны эсирликтен къайтараджагъым, – дей РАББИ.