Йирмея 47 - Мукъаддес Китап

Фелестинлилер акъкъында къарар

¹ Фыравун Гъаза шеэрини урмаздан эвель, РАББИден Йирмея пейгъамберге фелестинлилер акъкъында бойле хабер кельди:

² – РАББИ бойле дей: Мына, шималь тарафтан сувлар юкселелер, ташкъын бир дерья олып, ер юзюни, устюндеки шеэрни ве анда яшагъанларны къаплайджакъ. О заман адамлар ярдымгъа чагъыраджакълар, мемлекетте бутюн яшагъанлар аджджы агълайджакъ.

³ Кучьлю атларнынъ котерген тапырдысы, ат арабаларынынъ шаматасы, копчеклернинъ гудюрдиси эшитиледжек. Бабалары балаларына айланып бакъмайджакъ, эллеринде кучь къалмайджакъ.

⁴ О куню фелестинлилернинъ эписине олюм келеджек, Тир ве Сидоннынъ къалгъан ярдымджылары ёкъ этиледжек, РАББИ Къафтор адасында къалгъан фелестинлилерни харап этеджек.

⁵ Гъазада яшагъанларнынъ башлары тыраш этиледжек, Ашкелон шеэринде сеслер эшитильмейджек. Вадийде къалгъанлар! Беденлеринъизни даа чокъ яралайджакъсызмы?

⁶ Вай-вай-вай, РАББИнинъ къылычы, не заман ятышаджакъсынъ? Къынынъа къайтып, вазгеч ве тынчлан!

⁷ Амма ятышмакънынъ чареси бармы? Ашкелон шеэринде ве денъиз ялысында яшагъанларны уджюм этмеге РАББИ буюрды! Оны анда РАББИ ёллады!