Йирмея 40 - Мукъаддес Китап

Йирмея Гедальянен къала

¹ Ерусалимде яшагъанлар ве ехудалылар Вавилонгъа сюргюн этильгенде, къаравуллар башлыгъы Невузарадан оларнынъ арасында зынджырларнен багълангъан Йирмеяны тапып, оны Рама шеэринден азат эткен сонъ, РАББИден Йирмеягъа хабер кельди.

² Къаравуллар башлыгъы Невузарадан Йирмеяны алды ве онъа: – РАББИ, сенинъ Алланъ, бу ерге яман беля тюшеджегини эвельден бильдирди, – деди.

³ – Энди РАББИ беляны тюшюрип, айткъаныны япты. Сизлер РАББИнинъ сесини динълемединъиз, Онынъ огюнде гуна къазандынъыз, онынъ ичюн булар башынъызгъа тюшти.

⁴ Мына, мен бугунь къолларынъда олгъан зынджырлардан сени азат этем. Эгер меннен Вавилонгъа кетмеге истесенъ, юр, мен сени бакъарым. Меннен Вавилонгъа кетмеге истемесенъ исе, къал. Мына, бутюн топракъ козюнъ огюнде. Джанынъ къайда истесе, анда кет.

⁵ Эгер къаладжакъ олсанъ, Шафаннынъ торунына, Ахикъамнынъ огълу Гедальягъа кет ве онен халкъ арасында къал. Вавилон падишасы оны Ехуда шеэрлерине башлыкъ этип къойды. Я да джанынъ къайда истесе, анда кет. Сонъ къаравуллар башлыгъы Йирмеягъа аш-сув ве бир бахшыш берип, оны йиберди.

⁶ Йирмея Ахикъамнынъ огълу Гедальягъа, Мицпа шеэрине кельди ве онен берабер мемлекетте къалгъан халкъ арасында яшап башлады.

Гедальянынъ олюми

⁷ Чёллерде сакълангъан эписи орду башлыкълары ве оларнынъ адамлары, Вавилон падишасы Ахикъамнынъ огълу Гедальяны мемлекетке башлыкъ этип къойгъаныны, ве акъайларны, апайларны, балаларны ве Вавилонгъа сюргюн этильмеген фукъарелерни онынъ къолларына берильгенини эшиткенде,

⁸ олар Мицпа шеэрине Гедальягъа кельдилер. Нетаньянынъ огълу Исмаил, Къареахнынъ огъуллары Ёханан ве Ёнатан, Танхуметнинъ огълу Серая, нетофалы Офайнынъ огъуллары, маакъалынынъ огълу Изанья ве оларнынъ адамлары кельдилер.

⁹ Шафаннынъ торуны, Ахикъамнынъ огълу Гедалья оларнынъ ве адамларнынъ огюнде ант этип: – Къасдийлилерге хызмет этмеге къоркъманъыз. Бу ерде къалып, Вавилоннынъ падишасына хызмет этинъиз, ве сизде эписи яхшы олур.

¹⁰ Мен Мицпада къалып, бизге келеджек къасдийлилерге хызмет этеджегим. Сизлер исе шарап, яз мейваларыны, зейтюн ягъыны топланъыз, савутларынъызгъа къоюнъыз ве ерлешкен шеэрлеринъизде яшанъыз, – деди.

¹¹ Вавилон падишасы ехудалыларнынъ базыларыны къалдырып, оларгъа Шафаннынъ торуныны, Ахикъамнынъ огълу Гедальяны башлыкъ этип къойгъаныны Моав топрагъында, Аммон огъулларынынъ мемлекетинде, Эдомда ве башкъа мемлекетлерде яшагъан ехудалыларнынъ эписи эшиттилер,

¹² къувалангъан ерлеринден къайтып, Ехуда топрагъына, Мицпа шеэрине, Гедальягъа кельдилер, пек чокъ шарап ве яз мейваларыны джыйдылар.

¹³ Къареахнынъ огълу Ёханан ве чёллерде сакълангъан эписи орду башлыкълары Мицпагъа, Гедальягъа кельдилер

¹⁴ ве онъа: – Билесинъми, Аммон огъулларынынъ падишасы Баалис Нетаньянынъ огълу Исмаилни сени ольдюрмеге ёллады? – дедилер. Амма Ахикъамнынъ огълу Гедалья оларгъа инанмады.

¹⁵ О заман Къареахнынъ огълу Ёханан Мицпа шеэринде Гедальягъа гизлиден: – Манъа Нетаньянынъ огълу Исмаилни ольдюрмеге разылыкъ бер, – деди. – Кимсенинъ хабери олмаз. Онъа сени ольдюрмеге ёл бермеге керекми? Ёкъса, сенде топлангъан эписи ехудалылар дагъыладжакъ, Ехудадан къалгъаны да гъайып оладжакъ.

¹⁶ Амма Ахикъамнынъ огълу Гедалья Къареахнынъ огълу Ёханангъа: – Буны этме! Исмаил акъкъында айткъанынъ яландыр, – деди.